Zaburi 140 - Motingʼo Loko Manyien

Zaburi 140

Kuom jatend wer. Zaburi mar Daudi.

¹ Resa, yaye Jehova Nyasaye, kuom joma richo, konya e lwet jo-mahundu,

² joma chano chenro maricho e chunygi kendo gitugo lweny pile pile.

³ Gipiago lewgi mabith ka lew thuol kendo kwiri mar thuond fu ni e lewgi. Sela

⁴ Rita, yaye Jehova Nyasaye, rita e lwet joma timbegi richo; konya e lwet jo-mahundu machano gajo tiendena.

⁵ Josunga chikona obadho; giseyarona gogo mondo amokie, kendo gisechikona otegu e yorega ma aluwo. Sela

⁶ Yaye Jehova Nyasaye, awachoni niya, “In Nyasacha.” Omiyo yie iwinja, yaye Jehova Nyasaye, winj ywak ma aywaknigo mondo ikecha.

⁷ Yaye Jehova Nyasaye Manyalo Gik Moko Duto, ma jakonyna motegno, in migengʼona wiya sa ma lweny ger.

⁸ Kik iyie mondo joma timbegi richo oyud gik ma chunygi gombo, yaye Jehova Nyasaye; kik iyie mondo chenrogi otimre. Sela

⁹ Mi mondo chandruok ma joma olwora bwogago, odog e wiyegi.

¹⁰ Mi mondo makaa maliel mager oolre kuomgi, ee, ne ni odirgi e mach, kata e thidhna ma nimo ji, ma ok ginyal wuokie kendo.

¹¹ Mi mondo joma ketho nying jowetegi kik dhi maber e piny, ee, ne ni masira olawo jo-mahundu mi ojukogi.

¹² Angʼeyo ni Jehova Nyasaye miyo jodhier yudo adieragi, kendo oneno ni ongʼad bura kare ne joma ochando.

¹³ Joma kare biro pako nyingi adier kendo joma ngimagi oriere tir biro dak kangima e nyimi.