Zaburi 113 - Motingʼo Loko Manyien

Zaburi 113

¹ Opak Jehova Nyasaye! Pakuru Jehova Nyasaye, yaye un jotichne, pakuru nying Jehova Nyasaye.

² Nying Jehova Nyasaye mondo opaki, sani kendo nyaka chiengʼ.

³ Nying Jehova Nyasaye onego opaki, chakre kuma chiengʼ wuokie, nyaka kuma opodhoe.

⁴ Jehova Nyasaye nigi duongʼ moyombo ogendini duto, kendo duongʼne maler oyombo polo.

⁵ En ngʼa machalo gi Jehova Nyasaye ma Nyasachwa, Jal mobet e kom loch kuma bor,

⁶ kendo makulore piny mondo ongʼi polo gi piny?

⁷ Otingʼo joma odhier malo kogolo piny e lowo; adier, ogolo joma ochando e pidh buru,

⁸ kendo oketogi gibet kaachiel gi ruodhi, mi kwan-gi kaachiel gi jotend jogi.

⁹ Omiyo dhako ma migumba bedo gi ode mi obed miyo mamor man-gi nyithinde. Opak Jehova Nyasaye!