Wer Mamit 2 - Motingʼo Loko Manyien

Nyako

¹ An maua madungʼ tik mamit mag Sharon, bende an ondanyo madongo e holo.

Wuowi

² Mana ka ondanyo motwi e dier kuthe e kaka jaherana chalo e dier nyiri.

Nyako

³ Mana kaka yiend olemo mayom manie dier yiende mamoko mag bungu, e kaka jaherana chalo e dier chwo matindo. Amor ka abet e tipone, kendo olembe milimili e dhoga.

⁴ Osetera e od budho mare, kendo herane oliero e wiya ka bendera.

⁵ Miya jip gi olemb mzabibu mosemo e chiengʼ, duog chunya gi olemo mayom, nikech hera onura.

⁶ Bade ma koracham oteno wiya to bade ma korachwich okwaka.

⁷ Un nyi Jerusalem, asiemou gi nying nyakech kod mwanda manie e thim, ni kik utug hera kata chiewe ka sa ne pok oromo.

⁸ Lingʼane, awinjo dwond jaherana kabiro! Kochikore ewi gode kobiro, kendo obiro kolengʼore ewi gode matindo.

⁹ Jaherana chalo gi mwanda manie thim. Nene kaka ochungʼ e tok ohinga, kongʼicho gie dirise manie kor ohinga, kendo kongʼicho gie bath dirisa.

¹⁰ Jaherana nowuoyo kendo nowachona niya, “Aa malo jaherana, bi wadhiyo, yaye jaber.

¹¹ Ndalo chwiri osekalo; koth osechok kendo oserumo.

¹² Maua osechako thiewo e puothe; kinde mag wer osechopo, ndalo ma akuch oduglani werie mamit koro winjore e gwengʼwa.

¹³ Yiend ngʼowu golo olembene mokwongo; thiepe mag mzabibu keyo tikgi mamit. Aa malo ibi, jaherana; bi mondo wadhiyo, yaye jaber.”

Wuowi

¹⁴ Yaye akucha manie buche manie kor lwanda; kuonde mopondo manie kor gode, yie aneye wangʼi, kendo yie awinjie dwondi; nimar dwondi mit, kendo wangʼi ber neno.

¹⁵ Maknwauru nyithind bwe ma pod tindo, maketho puothewa mag mzabibu; nikech dipo ka giketho mzabibuwa mosechako thiewo.

Nyako

¹⁶ Jaherana en mara kendo an mare; odongo maber e dier ondanyo.

¹⁷ Nyaka chop piny yawre kendo tipo mag gik moko lal, duog ira, jaherana, mana kaka mwanda gi le mamoko ringo kadok e gode.