Ngeche 23 - Motingʼo Loko Manyien

Wach mar abiriyo

¹ Ka ibedo mondo ichiem gi ruoth, non maber gima ni e nyimi,

² ka in jawuoro to dimbri nono to onyalo keto pala e dwondi.

³ Kik igomb chiembe mamit, nimar chiemono en mar wuondruok.

Wach mar aboro

⁴ Kik iwe tich bari ndasi ni mondo ibed ja-mwandu, bed gi rieko mondo iritri.

⁵ Ngʼi mwandu mana matin nono, to bangʼe gidhi, nimar adiera gibiro bedo gi bwombe, kendo gifu gidhi e kor polo ka ongo.

Wach mar ochiko

⁶ Kik icham chiemb jagwondo, kik igomb chiembe mamit,

⁷ nimar en ngʼat mosiko paro nengo mochul. Owachoni niya, “Chiem kendo methi,” to chunye ok ni kodi.

⁸ Ibiro ngʼogo mano matin mane ichamo kendo ibiro bedo ni iketho kindeni kuom pwoch mipuoyego.

Wach mar apar

⁹ Kik iwuo ne ngʼat mofuwo, nikech obiro chayo rieko mag wechegi.

Wach mar apar gachiel

¹⁰ Kik igol kidi mar kiewo machon, kata ima nyithindo maonge wuone puothegi;

¹¹ nimar Jal moritogi en ratego; obiro chwakogi e kindi kodgi.

Wach mar apar gariyo

¹² Ket chunyi ne puonj to iti ne weche mag ngʼeyo.

Wach mar apar gadek

¹³ Kik itamri kumo nyathi; nimar chwat ok nyal nege.

¹⁴ Kikumo nyathi kod kede to obiro reso chunye aa e tho.

Wach mar apar gangʼwen

¹⁵ Wuoda, ka chunyi riek, eka chunya biro bedo mamor,

¹⁶ chunya ma iye nobed mamor ka lewi wacho gima nikare.

Wach mar apar gabich

¹⁷ Kik ibed gi nyiego e chunyi nikech joricho; to kinde duto bedi gi dwaro mar luoro Jehova Nyasaye moloyo.

¹⁸ Adier, ka itimo kamano to inibed gi geno e ndalo mabiro, kendo genoni ok nongʼad oko.

Wach mar apar gauchiel

¹⁹ Wuoda, winja, eka inibed mariek, kendo ket chunyi e yo moriere tir.

²⁰ Kik iriwri gi jogo ma madho kongʼo mangʼeny kata jowuoro mohero ringʼo,

²¹ nimar jomer kod jowuoro bedo jochan, kendo nongʼno rwakogi gi lewni moti.

Wach mar apar gabiriyo

²² Winj wuonu, nikech en ema nonywoli, kendo kik icha minu ka oti.

²³ Adiera gi rieko gi puonjruok kod ngʼeyo tiend wach ema nyaka iyudi, kata dabed ni ingʼiewogi gi nengo matek.

²⁴ Wuon ngʼat makare nigi mor maduongʼ; ngʼatno man-gi wuowi mariek obedo mamor kode.

²⁵ Mad wuonu gi minu bed mamor; mad minu mane onywoli bed gi ilo.

Wach mar apar gaboro

²⁶ Wuoda, miya chunyi, kendo ket wengegi orit yorena,

²⁷ nimar dhako ma jachode en bur matut, to dhako mabayo en soko madiny.

²⁸ Ka jamecho obuto korito, to omedo keto ji ma ok jo-adiera mangʼeny e kind ji.

Wach mar apar gochiko

²⁹ En ngʼa man-gi masira? En ngʼa man-gi lit? En ngʼa man-gi lweny? En ngʼa man-gi ngʼur? En ngʼa man-gi adhonde ma ok owinjore? En ngʼa man-gi wangʼ makwar motimo remo?

³⁰ Jogo madeko oko ka kongʼo, madhi mondo gibil kongʼo mokik mayoreyore.

³¹ Kik ingʼi kongʼo kochiek mowalo, ka obabni e kikombe, ka omadhore mos kolor piny!

³² Bangʼe to okecho ka thuol kendo oketo kwiri kaka fu.

³³ Wengeni biro neno gik mayoreyore to pachi paro gik morundore.

³⁴ Ibiro chalo ngʼat ma nindo e nam mar apaka matek, ka inindo ewi apaka.

³⁵ Ibiro wacho niya, “Gigoya, to ok ahinyra! Gigoya, to ok awinji! Karangʼo ma abiro chiewoe mondo adog ameth kendo?”