Jo-Kolosai 4 - Motingʼo Loko Manyien

Puonj mamoko

¹ Un ruodhi mag pinyni, daguru gi wasumbini magu kuritogi maber kendo mowinjore nikech ungʼeyo ni un bende un gi Ruodhu e polo.

² Timuru kinda kuom lemo, kurito gi paro moyawore, kendo kugoyo erokamano ni Nyasaye.

³ Wan bende lemnwauru mondo Nyasaye oyawnwa dhoot mar yalo Injili, kendo lando wach modhiero ji ngʼeyo mar Kristo momiyo koro otweya gi nyororo.

⁴ Lemnauru mondo omiya ayale e yo maler kaka owinjore atim.

⁵ Beduru gi rieko kuom joma odak e dieru kutiyo gi thuolo muyudo e yo maber.

⁶ Neuru ni wecheu obed mangʼwon man-gi ndhandhu kinde duto, mondo ungʼe kaka dudwoki ngʼato angʼata wach e yo mowinjore.

Mos mogik

⁷ Tukiko biro nyisou gik moko duto matimorena. En owadwa mageno, jatich ma ja-adiera kendo jatich Ruoth kaachiel koda.

⁸ Aore iru mondo ungʼe kaka wachal, kendo mondo ojiw chunyu.

⁹ Obiro biro gi Onesimo owadwa ma ja-adiera ma jathuru. Gibiro nyisou weche duto matimore ka.

¹⁰ Aristarko motweyago e od twech ooronu mos, kaachiel gi Mariko ma owad gi Barnaba. (Usewinjo wachne, omiyo kobiro to urwake.)

¹¹ Yesu, ma nyinge machielo en Justo, bende ooronu mos. Magi kende e jo-Yahudi wetena matiyo koda ni wach pinyruoth Nyasaye, kendo gisehoyo chunya e yore mangʼeny.

¹² Epafra ma jathuru kendo ma misumba Kristo Yesu bende omosou. Osiko olemonu matek ma ok oywe, mondo omi uchungʼ motegno, e dwaro Nyasaye duto kendo ka un gi adiera chutho.

¹³ Anyalo timo nende kaka otiyonu matek, un kaachiel gi jo-Laodikia kod jo-Hieropoli.

¹⁴ Osiepwa mwageno ma Luka jathiethwa kod Dema jomosou.

¹⁵ Kowuru mosna ni jowete man Laodikia, kendo ni Numfa gi kanisa man e ode.

¹⁶ Ka osesomnu baruwani, to neuru ni osome ni kanisa mar jo-Laodikia bende. To Un bende ukaw barupgi mondo usom.

¹⁷ Nyisuru Arkipo kama: “Ne ni itieko tich Ruoth mane omiyi.”

¹⁸ An Paulo, andikonu mosni gi lweta awuon. Kik wiu wil kod twechna e od twech. Ngʼwono obed kodu.