Ayub 25 - Motingʼo Loko Manyien

Bildad odwoko Ayub

¹ Eka Bildad ja-Shua nodwoko Ayub niya,

² “Loch gi luor gin mag Nyasaye; okelo kwe e piny koa e polo.

³ Bende nitiere ngʼama nyalo kwano jolweny mag Nyasaye? En ngʼa ma ok nyal neno ler Nyasaye karieny?

⁴ Ka en kamano, to ere kaka dhano dibed ngʼat makare e nyim Nyasaye? Koso ere kaka dhano ma dhako onywolo nyalo bedo maler?

⁵ To ka kata mana dwe ema ok rieny maler bende kata mana sulwe ok ler e wangʼe,

⁶ to koro ere kaka dhano ma kudni akudani dichal e nyime?”