Ayub 17 - Motingʼo Loko Manyien

¹ Chunya onyosore, ndalona ongʼad machiek, kendo thona ema chiegni koda.

² Jogo ma nyiera olwora koni gi koni; kendo asiko mana kaneno gero ma gin-go koda.

³ “Yaye Nyasaye, nyisa gima idwaro. En ngʼa machielo mabiro rita?

⁴ Isedino pachgi mondo kik gifweny adiera; omiyo ok ibi yie mondo gibed joloch.

⁵ Ka ngʼato ondhogo osiepne mondo oyud mwandu to gima otimono nyaka dongʼ ewi nyithinde.

⁶ “Nyasaye osemiyo abedo ngʼama ji duto goyo ngero kendo ma ka ji oneno to ngʼudho kuome olawo.

⁷ Wengena koro ok nen maber nikech kuyo ma an-go; denda duto olokore choke lilo.

⁸ Joma paro ni gin joma kare kibaji omako; kendo joma paro ni ler wacho ni ok angʼeyo Nyasaye.

⁹ Kata kamano, joma kare nosik koluwo yoregi makare, kendo joma yoregi oriere nomed bedo motegno.

¹⁰ “Un duto weyauru kendo dhiuru mabor nikech ok aneno ngʼama riek kuomu-ka.

¹¹ Ndalona osekadho, chenrona duto osekethore, kaachiel gi gik moko duto ma chunya gombo.

¹² Jogi loko otieno mi bed odiechiengʼ; ka piny otimo mudho to giwacho ni, ‘Ler ni machiegni.’

¹³ Ka dipo ni dala ma ageno dhiye en mana liel kende, kata kapo ni apedho kitandana e mudho,

¹⁴ ka dipo ni awacho ne kethruok ni, ‘In e wuonwa,’ kendo aluongo kudni ni, ‘minwa,’ kata ni, ‘nyamera,’

¹⁵ to koro geno mara ni kune? En ngʼa manyalo neno geno moro amora ma an-go?

¹⁶ Bende dodhi piny nyaka e dhorangeye mag tho? Koso bende dwalor kode nyaka ei lowo?”