Zozue 9 - Bibeli do fee

Akabuu iyi à dĩ do inɛi Gabaɔ̃ɔ ŋa

¹ Ilaalui ilɛ ŋa iyi à wa ikpa nunui alɛi idoi Zuudɛ̃ɛu à gbɔ bɛi Zozue do inɛi Izirɛli ŋa à cea inɛi Ai ŋa. Laabaaui ideu í fangaa si ilu ŋa iyi à wa si iri kuta ŋau do ilu ŋa iyi à wa lɔɔma do ilu ŋa iyi à wa ikpa bi Tenku Nlau fei hee ku bɔ kɔkɔi ilɛi Libãa. Ŋɔi inɛi Hɛti ŋa do inɛi Amɔre ŋa do inɛi Kanaã ŋa do inɛi Ferɛzi ŋa do inɛi Hɛvi ŋa do inɛi Zebusi ŋa

² à tɔtɔɔ à ce gɛlɛ akã ku ba a ba Zozue do inɛi Izirɛli ŋau ku ja.

³ Amma waati iyi inɛi Hɛvi ŋa iyi à wa ilui Gabaɔ̃ɔ à gbɔ bɛi Zozue í cea ilui Zeriko do ilui Ai,

⁴ à ce bisi ku ba a maà kpa ŋa. À ce kosĩa nŋa ŋa à dasi bɔgɔ ngbo ŋa nɔ à so bɔgɔ bata ngbo ku ga ŋa iyi à sɔ à dasi vɛ̃ɛ à kãa gbankɛlɛ nŋa ŋa nɔ à dasi kpãa wa.

⁵ Ibɔ nŋa ŋa iyi à waa dasiu à gbo, nɔ baata nŋa ŋa à ga nɔ à sɔ ŋa. Pɛ̃ɛ nŋa ŋa fei à gbɛ à baa à ce buubuu.

⁶ Ŋɔi à bɔ Giligali bi asɔi Zozue do inɛi Izirɛli ŋau nɔ à sɔ̃ ŋa à ni, hai ilɛ jĩijĩi à naa ihɛ̃, nɔ à bi awaɛ ŋa ka dĩ akabuu.

⁷ Ŋɔi inɛi Izirɛli ŋau à jɛ nŋa à ni, á yɔkɔ ku jɛ kɔkɔ nwa ihɛ̃i ì wa ŋa. Bii bɛɛbɛi, kaa ce awaɛ ŋa ka dĩ akabuu.

⁸ Ŋɔi à sɔ̃ Zozue à ni, à tã sɔɔlu ka ce icɛ iyi í dasi wa fei. Amma Zozue í bee ŋa í ni, iŋɛ dimi mii ŋai, hai iwoi ì waa naa ŋa.

⁹ Ŋɔi à jɛaa à ni, awa woo ce icɛɛ ŋa hai ilɛ jĩijĩi à naa si na iyi í jɔ̀ à gbɔ idei laabaaui Aɔ̃ Lafɛ̃ɛɛ, domi à gbɔ mii ŋa iyi í ce si ilɛi Ezibiti fei

¹⁰ nɔ à gbɔ yaase bɛi í cea Sioni ilaalui ilui Hɛsebɔ̃ɔ do Ɔgu ilaalui ilɛi Basãa iyi í wa si ilui Asiterɔti, aŋa iyi à jɛ ilaalui inɛi Amɔre ŋa iyi à tako à wa icei idoi Zuudɛ̃ɛu.

¹¹ Ŋɔi inɛ ngbo nwa ŋa do inɛi ilɛ nwa ŋa fei à sɔ̃ wa à ni ka ce kosĩa nɔ ka dasi kpãa ka naa ka ba ŋɛ ka sɔ̃ ŋɛ ka ni awa woo ce icɛ nŋɛ ŋai, i jɔ̀ awaɛ ŋa ka dĩ akabuu.

¹² Pɛ̃ɛ nwa wa gbãa mbɛ wo waati iyi à soo wa hai ide à dasiò kpãa à waa naa ihɛ̃. Wee nsɛi í gbɛ í baa í ce buubuu.

¹³ Nɔ bɔgɔ bata ŋau ihɛ̃ mɔ waati iyi à dasi vɛ̃ɛ wa, titɔ̃i à wɛɛ, nsɛi wee fei ndɛɛ í baa í ga. Ibɔ nwa ŋa mɔ do baata nwa ŋa fei à gbo na isɛɛnɛ sisɔ iyi à ce wau.

¹⁴ Ŋɔi inɛi Izirɛli ŋau à gba bubui kosĩai inɛ ŋau à jɛ, nɔ a kù sabuu Aɔ̃ Lafɛ̃ɛ ide kãma si gãmɛi inɛ ŋau má.

¹⁵ Nɔ Zozue í dĩ akabuui laakai ku sũ do inɛ ŋau. Si akabuu iyi à dĩu í jɛsi nŋu ku jɔ̀ inɛ ŋau à wɛɛ si hunde. Nɔ inɛ ngboi inɛi Izirɛli ŋau mɔ à jɛsi do kugbasi.

¹⁶ Si anyii akabuu ku dĩ nŋau iyi í ce bɛi ajɔ mɛɛta, ŋɔi inɛi Izirɛli ŋau à gbɔ iyi inɛ ŋau inɛi kɔkɔ nŋa ŋai. Aŋaò ŋa inya akã bɛ mɔm nii à wa mɔ wo.

¹⁷ Ŋɔi inɛi Izirɛli ŋau à dasi kpãa à waa koo nɔ si ajɔ mɛɛtasia à to idei inɛ ŋau. Irii ilu nŋa ŋau wee. Gabaɔ̃ɔ do Kefira do Berɔti do Kiria-Yarimu.

¹⁸ Amma a kù kpa ŋa domi inɛ ngboi Izirɛli ŋau à tako à ce kuwã do irii Aɔ̃ Lafɛ̃ɛi Izirɛliu. Ŋɔi inɛi Izirɛli ŋau à wasi ku gbagba si inɛ ngbo ŋau,

¹⁹ amma inɛ ngbo ŋau à jɛ nŋa à ni, a kaa ka yɔkɔ ka kpa inɛ ŋau má, domi à ce nŋa kuwã ntɔ ntɔ do irii Aɔ̃ Lafɛ̃ɛi Izirɛli.

²⁰ Bɛi aa ka ce nŋa wee. Aa ka jɔ̀ ŋai a maa wɛɛ nŋa ku ba ka maà ti ka fa si ara nwa idɔɔkɔ̃i Aɔ̃ Lafɛ̃ɛ wa na kuwã nwa iyi à ce nŋa.

²¹ Amma baa do iyi aa ka jɔ̀ ŋa a maa wɛɛ fei, aa ka dasi ŋa icɛi jĩi ku dai, nɔ a maa kpã nwa inyi wa. Ide iyi inɛ ngbo ŋau à jilɛ nŋa mbɛ.

²² Ŋɔi Zozue í kpe inɛi Gabaɔ̃ɔ ŋau í bee ŋa í ni, bɛirei í ce ì lɛlɛ wa ì sɔ̃ wa ì ni ide nŋɛ í jĩò ide nwa jiida jiida ŋa, nɔ wee awaɛ ŋa fei inya akã ihɛ̃i à wa.

²³ Bɛbɛi aa ka ceekpe ŋɛi nɔ i kaa fita si aru ku jɛ ŋa. Jĩi ŋai aa ya maa da ŋa, nɔ i ya maa kpã inyi i maa bɔò kpasɛ̃i Ilaaɔ̃ Lafɛ̃ɛm ŋa.

²⁴ Ŋɔi inɛi Gabaɔ̃ɔ ŋau à jɛa Zozue à ni, mii iyi í jɔ̀ à lasabu à fɔò bɛɛbɛ wee. À gbɔ iyi Aɔ̃ Lafɛ̃ɛɛ í na Moizi woo ce icɛɛ ilɛu ihɛ̃ ku jɛ tu ŋɛ. Nɔ bɛɛbɛ mɔi à gbɔ iyi aa maa kpa inɛ ŋa iyi à wa si ilɛu feii kpɛlɛ kpɛlɛ i maa nɛò wa ŋa. Na nŋu, kuto nŋɛ wa ihɛ̃ í jɔ̀ njo í mu wa ntɔ ntɔ na hunde nwa.

²⁵ Nsɛi wee à wa si awɔɛ. Ce nwa bɛi í sĩaɛ si.

²⁶ Ŋɔi Zozue í ce nŋa bɛi à fɔ à jilɛu. Kù jɛ inɛi Izirɛli ŋau à kpa ŋa,

²⁷ amma hai ajɔ nŋu bɛ í dasi ŋa icɛi jĩi ku da nɔ à maa kpãa inɛ ŋau inyi wa do ti bii aa ya cea Aɔ̃ Lafɛ̃ɛ kuwee tengi bii Aɔ̃ Lafɛ̃ɛ takaɛ á na ku cica. Nɔ baa nsɛi tɔku nŋa ŋa à waa coo.