Zozue 8 - Bibeli do fee

Kumui Ai

¹ Ŋɔi Aɔ̃ Lafɛ̃ɛ í sɔ̃ Zozue í ni, maà ce njo, nɔ i maà mɔngɔ munya. Gbã soogeɛ ŋa fei nɔ i koo si ilui Aiu ŋa. An daaɛ ilaalui Aiu si awɔ, nŋu do inɛɛ ŋa do iluɛ do ilɛɛu fei.

² Iluu bɛ do ilaaluɛ aa ceai bɛi ì tako ì cea Zeriko do ilaaluɛ. Amma bɛbɛi, mii ŋa iyi aa ba hai si igũu ŋa, tu ŋɛi á jɛ. Hai amani nŋa ŋa, do mɛɛmu nŋa ŋau fei iŋɛi aa nɔɔ. Yaase bɛi aa ce i jɛò igũ ŋa wee. I koo i jilɛ sooge ŋa a sì a kaako angulei iluu ku ba a zamba ŋa.

³ Ŋɔi Zozue wa ce sɔɔlu nŋu do soogeɛ ŋa fei ku ba a koo a jɛ inɛi ilui Ai ŋau igũ. Nɔ í cica sooge kaasãanɛ dubu kuntaa (30.000) í jɔ̀ à nɛ bɛ idũ.

⁴ Nɔ í sɔ̃ ŋa í ni, i koo i si angulei iluu ŋa, i maà jĩò iluu nɔ i wɛɛò sɔɔlu ŋa.

⁵ Amma amu do inɛ ŋa iyi à gbe bi tom nɔu aa ka bɔ hee kɔkɔi iluu. Waati iyi inɛ ŋau à fita à waa naa si wa bɛi takou má aa ka maa sai hai bi tu ŋa.

⁶ Aa maa lele wa wa hee ka fa ŋa ka jĩò iluu, domi aa maa ni, à waa sa nwa má bɛi à tako à sa nwa wou.

⁷ Waati bɛɛbɛi aa fita wa hai bii ì waa si ŋau nɔ i jɛ iluu igũ ŋa, domi Aɔ̃ Lafɛ̃ɛ nŋɛi á da nŋɛ iluu si awɔ.

⁸ Bii ì gba iluu ì tã, aa dasi ina ŋai bɛi Aɔ̃ Lafɛ̃ɛ í sɔ̃ ŋɛu. Bɛi ì nɛ ku ce ŋai ǹ sɔ̃ ŋɛ bɛ.

⁹ Iyi Zozue í fɔ bɛɛbɛ í tã ŋɔi í jɔ̀ sooge ŋau à nɛ, nɔ à koo à wa tengi bii aa maa siu si afei Betɛli do Ai takaɛ, do ikpa nunui alɛi Ai. Nɔ nŋu takaɛ í koo í sũ si aninii inɛ ŋa iyi à gbeu.

¹⁰ Daadaakɔ ŋɔi Zozue í dede í bɔ soogeɛ ŋau ku cɔ, nɔ nŋu do inɛ ngboi Izirɛli ŋau à gbã ŋa à bɔ ku jɛ ilui Aiu igũ.

¹¹ Ŋɔi nŋu do woo ce igũ ŋau fei à nɛ, nɔ à bɔ kɔkɔi iluu. Iyi à to tengii iluu suusuu ŋɔi à buba do awɔ njɛi kpãai inunu. Lɔɔma gɔi wa fɛɛfɛ ŋa do iluu.

¹² Ŋɔi Zozue í cica amanɛ dubu miiu (5.000) má í ni a koo a si do ikpa nunui alɛi iluu si afei Betɛli do Ai.

¹³ Waati iyi inɛ ŋau fei à ce asɔ do ikpa awɔ njɛi kpãai inunu tengi bii iluu í wa suusuu à tã, nɔ inɛ gɔ ŋa mɔ à si do ikpa nunui alɛi iluu, ŋɔi idũ ajɔ nŋu Zozue í nɛ í bɔ aninii lɔɔmau.

¹⁴ Iyi ilaalui Aiu í yɔɔ bɛɛbɛ ŋɔi í dede daadaakɔ do saasa. Nɔ nŋu do soogeɛ ŋa do inɛi ilu ŋau à bɔ lɔɔmau ku ba a koo a ce igũ aŋaò ŋa. Nɔ wee a kù mà mà inɛ gɔ ŋa à waa si nŋa do anyii iluu.

¹⁵ Ŋɔi Zozue do inɛi Izirɛli ŋau fei à jɔ̀ à waa le ŋa nɔ à sa à waa nɛ ikpa gbaau.

¹⁶ Ŋɔi inɛi ilu ŋau fei à da hãmɛ nŋa à bɔ ku lele ŋa. Ŋɔi à lele Zozue bɛɛbɛ hee à jĩò ilu nŋa.

¹⁷ Inɛmɔkɔ baa akã kù gbe si ilui Ai do Betɛli. Aŋa fei à fita à lele inɛi Izirɛli ŋa nɔ à jɔ̀ iluu a kù cĩmboɛ.

¹⁸ Ŋɔi Aɔ̃ Lafɛ̃ɛ í sɔ̃ Zozue í ni, to kakaɛ ikpa ilui Ai, domi an daɛ iluu si awɔi. Ŋɔi Zozue í to kakaɛu si iluu.

¹⁹ Iyi í to kakaɛu si iluu gbakã, ŋɔi inɛi Izirɛli ŋa iyi à waa si ŋau fei à fita hai tengi bii à waa siu do saasa à sɛi à nɛ hee inɔ ilu, nɔ gbakã à dasi iluu ina.

^20-21 Ŋɔi inɛi ilui Ai ŋau à sinda à cɔ do anyi nɔ à yɛ cua í dede si inɔ ilu nŋau hee lele, nɔ a kù nɛ bii kãma bii aa sa a bɔ má. Nɔ inɛi Izirɛli ŋa iyi à sa à waa nɛ ikpa gbaau aŋa mɔ à yɛ cua í dede si inɔ iluu. Iyi à yɔɔ bɛɛbɛ ŋɔi à mà iyi inɛ ŋa iyi à waa manjiu à to iluu awɔi. Ŋɔi à sinda si inɛi Ai ŋau wa.

²² Si bɛi inɛ ŋau à sinda à sa à waa nyi inɔ ilu, ŋɔi inɛi Izirɛli mbɔ ŋa iyi à wa inɔ iluu à fita à waa kò ŋa wa, nɔ à baa à dasi inɛi Ai ŋau awɔ ibɔ. Ŋɔi à kpa ŋa a kù jɔ̀ inɛ kãma, nɔ inɛ kãma mɔ kù ba ku sa,

²³ í gbe ilaaluu nŋu akã iyi à mu njaawɛ à koo à na Zozue.

²⁴ Waati iyi inɛi Izirɛli ŋa à kpa inɛi Ai ŋau fei à tã tengi bi gbaa bii à lele ŋa à bɔò ŋau, ŋɔi à dasi inɔ iluu à koo à kpa inɛ ŋa iyi à gbeu.

²⁵ Ajɔ nŋu si ilui Ai amanɛ dubu maateejii (12.000) à kpa, inɛmɔkɔ do inaabo.

²⁶ Bɛi Zozue í tɛ awɔɛu, bɛɛbɛ mɔi í jɔ̀ɔ, kù kɔmbaɛ má hee à koo à kpaò inɛi Ai ŋau fei à tã.

²⁷ Amma si tuubau ihɛ̃ inɛi Izirɛli ŋau à so mɛɛmu ŋa do amani ŋa iyi à ba hai si iluu í jɛ tu ŋa si bɛi Aɔ̃ Lafɛ̃ɛ í tako í sɔ̃ Zozueu wo.

²⁸ Zozue í jo ilui Aiu fei, í jɔ̀ iluu í baa í kpɔò bomma baa nsɛi.

²⁹ Ŋɔi Zozue í jɔ̀ à bagãm ilaalui Aiu si jĩi hai daakɔ hee alɛ í koo í lɛò. Iyi alɛ í lɛ ŋɔi í ni a koo a nya ikuɛu wa, ŋɔi à nyaa wa à na à nyɔɔ andɛ koofai iluu nɔ à timbi siɛ kuta ikɔ nla nla. Kuta ŋa iyi à timbi siɛu à wa bɛ baa nnyi.

À cio wooda ŋa si iri kutai Ebali

³⁰ Ŋɔi Zozue í maa Aɔ̃ Lafɛ̃ɛi inɛi Izirɛli ŋa bi kuwee si antaii iri kuta gɔ iyi à ya kpe Ebali.

³¹ Í maai do yaase bɛi Moizi woo ce icɛi Aɔ̃ Lafɛ̃ɛ í sɔ̃ inɛi Izirɛli ŋau wo. Ide ŋa iyi Moizi í sɔ̃ ŋau í nyi í kɔɔ má si tiai woodaɛ, í ni, bi kuweeu, do kuta ŋa iyi a kù gbei aa maaò ŋa. Nɔ à cea Aɔ̃ Lafɛ̃ɛ kuwee iyi à ya jo si ina fei sãa sãau do kuweei anu akã.

³² Nɔ tengi bɛ, wooda iyi Moizi í tako í kɔu, Zozue mɔ í kɔɔ má si kuta ŋa si wajui inɛi Izirɛli ŋau.

³³ Inɛi Izirɛli ŋau fei, hai inɛ ngbo nŋa ŋa do woo gbã nŋa ŋa do woo kiiti nŋa ŋau à waa leekĩi cingaa do cingaai kpakoi akabuui Aɔ̃ Lafɛ̃ɛ si wajui inɛi Levii woo wee ŋa iyi à waa so kpakoi akabuuu. Hai inɛ njoo ŋa do inɛi Izirɛli ŋau fei à wa bɛ. Inɛ ŋau à kpɛ̃ njɛi à waa munga. Inɛ gɔ ŋa à wa do ikpa cingaai iri kutai Garizimu, inɛ bubu ŋa mɔ do ikpa cingaai iri kutai Ebali. À cei dee dee bɛi Moizi woo ce icɛi Aɔ̃ Lafɛ̃ɛu í tako í na wooda í ni a ce ku ba Aɔ̃ Lafɛ̃ɛ ku weea inɛi Izirɛli ŋau.

³⁴ Si anyiɛ ŋɔi Zozue í ka ide iyi à kɔ si tiai woodau fei, iyi í jɛ idei kuwee do iyi í jɛ idei ikpe si bɛi à kɔɔ si tiai woodau.

³⁵ Nkãma kù gbe iyi Moizi í kɔ iyi Zozue kù kaa si wajui kutɔtɔɔi inɛi Izirɛli ŋau fei, hai inaabo ŋa do amu ŋa do inɛ njoo ŋa iyi à wa anini nŋa ŋau fei.