Zozue 7 - Bibeli do fee

Kurarai Akãa do ijuukpãɛ

¹ Inɛi Izirɛli ŋau à ce kurara nla nla si mii ŋa iyi Aɔ̃ Lafɛ̃ɛ í ni a maà ti a so. Akãai í so mii ŋa iyi Aɔ̃ Lafɛ̃ɛ í ni a maà sou, ŋɔi idɔɔkɔ̃i Aɔ̃ Lafɛ̃ɛ í dede si inɛi Izirɛli ŋa. Akãau si dimii Zudaai à búu, amai Kaamii wa jɛ, Kaamiu mɔ amai Zabudii, Zabudi mɔ amai Zerai.

² Ŋɔi hai Zeriko bɛ Zozue í bɛ inɛ gɔ ŋa ikpa Ai, ilu iyi í wa ikpa nunui daakɔi Betɛliu kɔkɔi Bɛti-Avɛni í ni a koo a cɔ yaase bɛi iluu í yɛ do ilɛ ŋa iyi à waa kaakoɛ. Nɔ inɛ ŋau à koo à cɔ yaasei iluu.

³ Iyi à koo à cɔ yaasei iluu à baa, à sɔ̃ Zozue à ni, kù to hee sooge ŋau fei a koo si ilui Aiu mɔm. Amanɛ dubu minji walakɔ dubu mɛɛta í to ku kãmia iluu. Akpɔi inɛi ilu ŋau í kere í caa do iyi aa jɔ̀ sooge ŋau fei à gbɛɛji ara nŋa ngbɛ ngbɛ.

⁴ Ŋɔi zakai amanɛ dubu mɛɛta í dasi kpãa í koo, amma do kutɛ gbãai à sa à baaò wa hai bi inɛi Ai ŋau.

⁵ Nɔ inɛi ilui Ai ŋau à kpa amanɛ kuntaa do mɛɛfa si inɔ nŋa. Nɔ à lele inɛ ŋa iyi à gbe ŋau mɔ wa hai anu koofai iluu hee ku naa Sebarimu bi lɔɔmau. Ŋɔi zigii inɛ ŋau í da hee à mɔngɔ temua.

⁶ Ŋɔi Zozue í ga ibɔɛ ŋa nɔ í sɛɛbata si wajui kpakoi akabuui Aɔ̃ Lafɛ̃ɛ hai daakɔ hee alɛ í koo í lɛò, nŋu do inɛ ngboi Izirɛli ŋau, nɔ à kosi iri nŋa ŋa sãa a nyisiò inɔ kufɔ nŋa.

⁷ Ŋɔi Zozue wa ce kutɔɔ í ni, Aɔ̃ Lafɛ̃ɛ, bɛirei í ce ì jɔ̀ à kua idoi Zuudɛ̃ɛu. Ì jɔ̀ à kua idoi Zuudɛ̃ɛui ku ba ka dasi awɔi inɛi Amɔre ŋau a jɛ wa igũ a kpa wa? Í tia ka gbe nwa icei idoi Zuudɛ̃ɛu wo.

⁸ Bɛirei an yɔkɔ n ni, Aɔ̃ Lafɛ̃ɛ. Nsɛi wee awa inɛi Izirɛli ŋau à sa wa hai bi mbɛɛ nwa ŋau.

⁹ Inɛi Kanaã ŋa do inɛi ilɛ mmu ŋa iyi à gbe ŋa fei aa gbɔ baaui ideu ihɛ̃ mbɛ, nɔ aa ce anu tɔɔsi à naa à kpa wa fɛ̃ɛ fɛ̃ɛ. Bii à ce bɛɛbɛ, bɛirei aa ce ku ba inɛ ŋa a mà bɛɛrɛ nlaɛ.

¹⁰ Ŋɔi Aɔ̃ Lafɛ̃ɛ í sɔ̃ Zozue í ni, dede. Bɛirei í ce ì waa sɛɛbata bɛɛbɛ.

¹¹ Inɛi Izirɛli ŋau à ce dulum nii, a kù jirima akabuu iyi awaò ŋa à dĩ. À so mii ŋa iyi ǹ ganji ŋa ǹ ni a maà na a so. Mii ŋa iyi à sou, mii ndom ŋai, à ce ilei mii ŋau nɔ à singaɛ si aso nŋa ŋa.

¹² Na ŋɔi í jɔ̀ inɛi Izirɛli ŋa a kaa yɔkɔ a leekĩ si wajui mbɛɛ nŋa ŋa má. Aa ya maa saa mbɛɛ nŋa ŋaui, domi à baa à jɛ ilu taale ŋa, nɔ aa ce nfe nŋai. N kaa n wɛɛ do iŋɛ má bii i kù nya mii ŋa iyi ǹ ganji ŋɛ ku sou hai si anini nŋɛ.

¹³ Nsɛi, dede i koo i cea inɛ ŋau sɔɔlu a naa a kom ala. Sɔ̃ ŋa i ni a ce buki iyi á jɔ̀ a maaju, domi amu Aɔ̃ Lafɛ̃ɛi inɛi Izirɛli ŋa ǹ sɔ̃ ŋa ǹ ni à so mii ŋa iyi ǹ ganji ŋa si ku so. Na ŋɔi í jɔ̀ a kaa yɔkɔ a leekĩ si wajui mbɛɛ nŋa ŋa, í gbe hee bii à fũsi mii ŋau awɔ.

¹⁴ Ala daakɔ dimi fei ku naa si wajum ikã ikã, nɔ dimi iyi an tòsi awɔ a naai do nyaanzeɛ ŋa fei nɔ nyaanze iyi ǹ tòsi awɔ, aŋa mɔ aa naai ikã ikã kpasɛ̃ do kpasɛ̃, nɔ kpasɛ̃ mɔ iyi ǹ cica aŋa mɔ aa naai amanɛ akã akã.

¹⁵ Inɛ iyi an nyisi ŋɛ n ni nŋui í so mii ŋa iyi ǹ ganji ŋɛ siu, aa jo lafɛ̃ɛi do mii iyi í nɛ fei si bɛi í kua wooda iyi amu Aɔ̃ Lafɛ̃ɛ ǹ jilɛ nɔ í ce mii ndii anyɔ si inɔi inɛi Izirɛli ŋa.

¹⁶ Ŋɔi Zozue í dede daadaakɔ nɔ í tɔtɔɔ inɛi Izirɛli ŋau fei í bɛi í jɔ̀ dimi ikã ikãu fei wa naa si wajuɛ, nɔ à tòsi dimii Zudaa awɔ.

¹⁷ Nɔ í jɔ̀ nyaanzei Zudaa ŋau à naa si wajuɛ, nɔ à tòsi nyaanzei Zera awɔ. Nɔ í jɔ̀ à naa si wajuɛ kpasɛ̃ do kpasɛ̃ ikã ikã, nɔ à tòsi kpasɛ̃i Zabudi awɔ.

¹⁸ Nɔ í jɔ̀ inɛi kpasɛ̃i Zabudi ŋau à naa si wajuɛ akã akã, nɔ à tòsi Akãa amai Kaami awɔ. Akãau tɔkui Zabudii wa jɛ, nɔ í nyi wa jɛ tɔku gbeejii Zera má si dimii Zudaa.

¹⁹ Ŋɔi Zozue í sɔ̃ɔ í ni, kpaasim, jɔ̀ i mà kulai Aɔ̃ Lafɛ̃ɛi inɛi Izirɛli ŋa nɔ i jɔ̀ iriɛ ku nɛ bɛɛrɛ. Sɔ̃m ntɔ nsɛi. Sisiim mii iyi ì ce fei, maà singaam nkãma.

²⁰ Ŋɔi Akãa í jɛa Zozue í ni, ntɔ ntɔi ǹ ce dulum bi Aɔ̃ Lafɛ̃ɛi inɛi Izirɛli ŋa. Mii iyi ǹ ce wee.

²¹ Si inɔi mii ŋa iyi à ba si igũu ǹ yɛ ibɔ kumboo kusĩa gɔ iyi à ce ilɛi Sinaa, do isɔ fũfũ kpɛkɛlɛ cĩɔ minji, do wura iyi kuwoɛ í to bubui kiloo, ŋɔi binɛm í lɔ si ŋa nɔ ǹ so ŋa. Fei ndɛɛ wa singa inɔ isa si aninii inɔ ilei acɔm bɛ nɔ isɔ fũfũu í wa lɛlɛ nŋa.

²² Ŋɔi Zozue í bɛ inɛ ŋa nɔ à sɛi à koo gbãa gbãa. Iyi à to nɔ à yɛ mii ŋau inɔ ilei acɔi Akãa bɛ, isɔ fũfũu í wa lɛlɛ nŋa.

²³ Ŋɔi à so mii ŋau wa à naa à na Zozue do inɛi Izirɛli ŋau, nɔ à jilɔɔ si wajui Aɔ̃ Lafɛ̃ɛ.

²⁴ Ŋɔi Zozue do inɛi Izirɛli ŋau fei à mu Akãa, nɔ à gba isɔ fũfũu do ibɔ kumboou do wurau nɔ à mu ama inɛmɔkɔɛ ŋa do ama inaaboɛ ŋa, do kɛtɛɛ ŋa do gbankɛlɛɛ ŋa, do angudãɛ ŋa, do iwoɛ ŋa, do ilei acɔɛ do mii ndɛɛ ŋa fei, à bɔò ŋa si lɔɔma gɔ iyi à ya kpe Akɔɔ, waatɔ wahala.

²⁵ Ŋɔi Zozue í sɔ̃ Akãa í ni, awɔi ì naa nwa wahalau ihɛ̃ wa. Nnyi Aɔ̃ Lafɛ̃ɛ á jɔ̀ awɔ mɔ ì yɛ wahala. Ŋɔi inɛi Izirɛli ŋau fei à taa kuta à kpaa nɔ à joo, nŋu do inɛɛ ŋa fei hee do mii iyi í nɛ fei.

²⁶ Nɔ à tɔtɔɔ kuta nkpɔ nkpɔ siɛ, kuta ŋau à wɛɛ baa nsɛi. Ŋɔi í ce baa nnyi à ya maa kpe inyau lɔɔmai Akɔɔ. Si anyii nŋu, ŋɔi idɔɔkɔ̃i Aɔ̃ Lafɛ̃ɛ í sũ.