Zozue 6 - Bibeli do fee

Inɛi Izirɛli ŋau à jɛ inɛi Zeriko ŋa igũ

¹ Wee inɛi Zeriko ŋa à cĩmbo anu koofai ilu nŋa fei dim dim na irii inɛi Izirɛli ŋa. Inɛ kãma ci ya lɔ nɔ inɛ kãma mɔ ci ya fita.

² Ŋɔi Aɔ̃ Lafɛ̃ɛ í sɔ̃ Zozue má í ni, cɔ ǹ daaɛ Zeriko si awɔ do ilaaluɛ do sooge kaasãanɛɛ ŋa fei.

³ Awɔ do woo ja igũ ŋau fei i nɛ i maa kaako iluu ŋa, ajɔ akã fei i ya kaakoɛ gbakã akã ŋa, nɔ i ce bɛɛbɛ ŋa hee ku to ajɔ mɛɛfa.

⁴ Woo wee mɛɛjei á cua do wajui kpakoi akabuuu, aŋa fei aa maa mu kuui akã akã. Si ajɔ mɛɛjesiau aa nɛ i kaako iluu ŋai tuuba mɛɛje nɔ woo wee ŋau a maa fã kuu ŋau.

⁵ Bii à na à fã kuuu à mɔɔ, inɛ fei á dɔ̃ anui igũi nla nla. Waati bɛɛbɛi bindii iluu á cukui do araɛ, nɔ inɛ fei ku sɛi ku dasi inɔ iluu ku maa ce igũ. Inɛ fei á sɛii ku maa too wajuɛ suusuu.

⁶ Iyi Aɔ̃ Lafɛ̃ɛ í fɔ bɛɛbɛ í tã, ŋɔi Zozue í kpe woo wee ŋau í sɔ̃ ŋa í ni, i so kpakoi akabuui Aɔ̃ Lafɛ̃ɛu ŋa, nɔ si inɔ nŋɛ inɛ mɛɛjei á so kuu iyi à ce do ngoi angudã kombo a maa cuaa kpakoi akabuu.

⁷ Si anyiɛ nɔ í sɔ̃ zamaau mɔ í ni, i nɛ i maa kaako iluu ŋa, nɔ woo ja igũ ŋau a maa cuaa kpakou.

⁸ Iyi Zozue í sɔ̃ ŋa bɛɛbɛ í tã, ŋɔi woo wee mɛɛje ŋa iyi à waa fã kuu nŋa ŋau à dasi kpãa. Nɔ kpakou í wa do anyi nŋa wa.

⁹ Woo ja igũ ŋau gɔgɔ ŋa à waa cuaa woo wee ŋa iyi à waa fã kuu ŋau, nɔ gɔgɔ ŋa mɔ à wa do anyi à waa too kpakou wa. Waati iyi à waa ce isɛɛnɛu à wasi kuu ŋau ku fã,

¹⁰ amma inɛ kãma kù fɔ ide si na iyi í jɔ̀ Zozue í sɔ̃ ŋa wo í ni a maà dɔ̃ anu nɔ a maà fɔ ide kãma hee koo to ajɔ iyi nŋu á na ŋa wooda.

¹¹ Bɛɛbɛi í jɔ̀ inɛ ŋau à kaako iluu do kpakou tuuba akã, si anyiɛ nɔ à nyi asɔ à koo à sũ.

¹² Iyi iju í má daadaakɔ Zozue í dede má, nɔ woo wee ŋau mɔ à so kpakou má.

¹³ Woo wee mɛɛje ŋa iyi à waa mu kuu ŋau à dasi kpãa má à waa cuaa kpakou à waa fãò kuu nŋau. Nɔ woo ja igũ ŋau gɔgɔ ŋa à waa cuaa zamaau, nɔ gɔgɔ ŋa mɔ à wa do anyii kpakou. Waati iyi à dasi kpãa à waa nɛ nɔ à wasi kuu ŋau ku fã.

¹⁴ Si ajɔ minjisiau nɔ à kaako iluu má gbakã akã à bɛi à sinda à baa asɔ má. Bɛɛbɛi à ce hee ajɔ mɛɛfa.

¹⁵ Si ajɔ mɛɛjesiau ŋɔi à dede hai amɛɛjuumá à kaako iluu fii mɛɛje si yaase bɛi à sɔ̃ ŋau. Ajɔ nŋu bɛ nŋu akãi à kaako iluu tuuba mɛɛje.

¹⁶ Si tuuba mɛɛjesiau, iyi woo wee ŋau à fã kuu ŋau à mɔɔ, ŋɔi Zozue í sɔ̃ zamaau í ni, i dɔ̃ anui igũ ŋa, domi Aɔ̃ Lafɛ̃ɛ í da nŋɛ iluu si awɔ mbɛ.

¹⁷ Aa kpa inɛi ilu ŋaui hee do mii ŋa iyi à nɛ fei. Rahabu abo à ta icuui aa jɔ̀ ŋa do inɛ ŋa iyi à wa bi tɛɛ inɔ kpasɛ̃ bɛ fei. Aa jɔ̀ɔ ŋai si na iyi í jɔ̀ nŋui í gba inɛ ŋa iyi à bɛ wa ihɛ̃ ŋau í singa ŋa.

¹⁸ Amma i ce laakai ŋa i maà so nkãma iyi Aɔ̃ Lafɛ̃ɛ í ni i kpa ŋa. Bii kù jɛ bɛɛbɛ, aa na i fa nwa mii laalɔ do nfe ku ce wa ŋa.

¹⁹ Hai isɔ fũfũ do wura do isɔ nkpa do isɔ iyi í gbe fei, fei ndɛɛ ti Aɔ̃ Lafɛ̃ɛi á jɛ nɔ fei ndɛɛ bi ku singa amaniɛ ŋai á lɔ.

²⁰ Ŋɔi inɛ ŋau à dɔ̃ anu, nɔ woo wee ŋa à fã kuu ŋau. Iyi inɛ ŋau à gbɔ à fã kuu ŋau gbakã, ŋɔi aŋa fei à dɔ̃ anu hee lele, nɔ bindii iluu í cuku, nɔ à dasi inɔ iluu a ce igũ. Inɛ fei í so kpãaɛi í nɛ wa cɔò wajuɛ suusuu nɔ à gba iluu.

²¹ Nɔ à kpa zamaai iluu fei hai inɛmɔkɔ do inaabo, hai awaasũ do mɔkɔ ngbo fei. Nɔ à kpa hee do kɛtɛ ŋa do angudã ŋa do gbankɛlɛ ŋa fei.

Zozue í jɔ̀ Rahabu í wɛɛ

²² Amma waati iyi bindii ilui Zerikou í cuku, Zozue í sɔ̃ inɛ minji ŋa iyi à tako à koo à cɔ yaasei iluu í ni, i bɔ kpasɛ̃i Rahabu abo à ta icuu nɔ i fitaɛ wa, nŋu do inɛɛ ŋa fei, bɛi ì tako ì ceaa kuwãɛ ŋa.

²³ Ŋɔi à koo à gbã Rahabu wa do iyeò baaɛ, do igbãɛ do ifɔɛ ŋa, do wecĩɛ ŋa do nyaanzeɛ ŋa iyi à gbe fei. Nɔ à koo à jilɛ ŋa kɔkɔi tengi bii aŋa taka nŋa à ce asɔu.

²⁴ Nɔ à dasi iluu ina hee do mii ŋa iyi à wa bɛ fei, í gbe isɔ fũfũ do wura do isɔ nkpa do isɔ iyi í gbe fei. Mii ŋau bɛ fei, bi ku singa amanii Aɔ̃ Lafɛ̃ɛi à koo à dasi.

²⁵ Zozue í jɔ̀ Rahabu do inɛi kpasɛ̃ɛ ŋa fei à wɛɛ, si na iyi í jɔ̀ í singa inɛ minji ŋa iyi à koo à cɔ yaasei ilui Zerikou wo. Í wa si inɔi inɛi Izirɛli ŋa, nɔ tɔkuɛ ŋa à wa bɛ baa nsɛi.

²⁶ Si anyii nŋu, ŋɔi Zozue í fɔ do irii Aɔ̃ Lafɛ̃ɛ í ni, ikpe ku mu inɛ iyi á na ku dede ku ma ilui Zerikou ihɛ̃ má. Inɛ iyi í na wa bi ku teese ku ma iluu, waati iyi á nyɔ icui ile ŋau, ama yemmaɛ á kui, nɔ waati iyi í na wa masi gambo ŋau, ama kɔdaaɛ á kui.

²⁷ Aɔ̃ Lafɛ̃ɛ í wɛɛ do Zozue nɔ iriɛ í fangaa bii fei si ilɛu.