Zozue 5 - Bibeli do fee

¹ Ilaalui inɛi Amɔre ŋa iyi à wa ikpa nunui alɛi idoi Zuudɛ̃ɛu do ilaalui inɛi Kanaã ŋa iyi à wa kɔkɔi tenkuu à gbɔ iyi Aɔ̃ Lafɛ̃ɛ í jɔ̀ inyii idoi Zuudɛ̃ɛu í gbɛ si wajui inɛi Izirɛli ŋa hee à kua. Ŋɔi njo í mu ŋa hee a kaa yɔkɔ a leekĩ si waju nŋa má.

Bango ku dasii inɛi Izirɛli ŋa ilui Giligali

² Waati bɛɛbɛ Aɔ̃ Lafɛ̃ɛ í sɔ̃ Zozue í ni, ce kasɛi kuta ŋa nɔ i dasi inɛi Izirɛli ŋa iyi à waa dede nsɛi ŋau mɔ bango.

³ Nɔ Zozue í ce kasɛi kuta ŋa nɔ í dasi inɛi Izirɛli ŋau bango si iri kuta iyi à ya kpe Aralɔtu.

^4-5 Mii iyi í jɔ̀ Zozue í dasi ŋa bango wee. Si waati iyi inɛi Izirɛli ŋau à fita wa hai ilɛi Ezibiti, andi inɛmɔkɔ ŋa iyi à to igũ ku ce ŋau fei à bu nŋa bango tã, amma inɛ nŋu ŋau fei à ku si gbaau. Si anyii nŋu, amu ŋa iyi à na à bí si gbaau bɛbɛi fei a kù dasi inɛ nŋu ŋa bango má.

⁶ A kù dasi ŋa bango si na iyi í jɔ̀ adɔ̃ ciijii à ce à waa nɛ si gbaau. Si anyii adɔ̃ ciijiu inɛ ŋa iyi à to igũ ku ce si waati iyi à fita wa hai ilɛi Ezibitiu fei à ku. Inɛ ŋau à kui si na iyi í jɔ̀ a kù jirima idei Aɔ̃ Lafɛ̃ɛ. Nɔ Aɔ̃ Lafɛ̃ɛ í ni nŋu kaa jɔ̀ a yɛ ilɛ iyi nŋu í wãò bala nŋa ŋa nŋu ku mu nŋau má. Ilɛu, amɔ do nyikɔ̃i í ya maa kɔ̃ bɛ.

⁷ Ama nŋa ŋai í sãsi agbɛ nŋa, nɔ Zozue í dasi ŋa bango, domi a kù ce bango wo si waatii isɛɛnɛ nŋau.

⁸ Waati iyi à dasi aŋa fei bango à tã, asɔ bɛi à ya maa wa hee juju nŋa ŋau à koo à tãò.

⁹ Ŋɔi Aɔ̃ Lafɛ̃ɛ í sɔ̃ Zozue í ni, nnyi ǹ nya nŋɛ anyɔ iyi ì fitaò wa hai ilɛi Ezibitiu ŋa. Nɔ à sɔ inyau Giligali. Bɛɛbɛ mɔi à ya maa kpoo hee do nnyi fei.

Jingau sintei Iku ku kua si ilɛi Kanaã

¹⁰ Inɛi Izirɛli ŋa à koo à ce asɔ Giligali si lɔɔma iyi í wa kɔkɔi Zeriko, nɔ à jɛ jingaui Iku ku kua alɛi ajɔ maatɛ̃ɛsiai cukpau.

¹¹ Iyi iju í má nɔ à jɛ pɛ̃ɛ hai nɛ levɛ̃ɛ iyi à ce do amaajɛi ilɛi Kanaã do bileei ilɛu iyi à sɔ̃. Ajɔ akãu bɛi à jɔɔ.

¹² Iyi à nɔ à jɛ jingaui Iku ku kuau iju kumáɛ gbakã manau í leekĩi. Hai waati iyi inɛi Izirɛli ŋau à jɛ amaajɛi ilɛi Kanaãu a kù ba mana má. Nɔ adɔ̃ nŋu bɛ amaajɛi ilɛi Kanaã ŋaui à jɛ.

Inɛ ngboi soogei Aɔ̃ Lafɛ̃ɛ

¹³ Ajɔ nŋu gɔ Zozue í wa kɔkɔi ilui Zeriko, ŋɔi anu akã í yɛ inɛmɔkɔ gɔ wa leekĩ si wajuɛ. Lafɛ̃ɛ wa mu taakubaɛ si awɔ. Ŋɔi Zozue í tɛkɛɛ siɛ í beeɛ í ni, awɔ inɛ nwai de, mà awɔ inɛ akãi mbɛɛ nwa ŋai.

¹⁴ Ŋɔi inɛɛu í jɛaa í ni, aawo, n kù jɛ ti kãma nŋɛ gɔ. Inɛ ngboi soogei Aɔ̃ Lafɛ̃ɛ ŋai ǹ jɛ, nɔ kutom wa mɔ mbɛ. Ŋɔi Zozue í sɛɛbata si wajui inɛɛu nɔ í sɔ̃ɔ í ni, amu woo ce icɛɛi, mii ì ni n ce.

¹⁵ Ŋɔi inɛ ngboi soogei Aɔ̃ Lafɛ̃ɛ ŋau í jɛaa í ni, bɔ baataɛ ŋa, domi inya bii ì waa leekĩu ihɛ̃ inya kumái. Nɔ Zozue í ce bɛi í fɔu.