Zozue 4 - Bibeli do fee

Kuta maateeji ŋa iyi à jilɛ à jɛ ti gigi ku ye

¹ Waati iyi inɛ ŋau fei à kua idoi Zuudɛ̃ɛu à tã, Aɔ̃ Lafɛ̃ɛ í sɔ̃ Zozue í ni,

² cica inɛmɔkɔ maateeji si inɔi inɛ ŋau, si dimi akã fei inɛ akã.

³ Nɔ i sɔ̃ ŋa i ni aŋa fei a so kuta akã akã wa hai si aninii idoi Zuudɛ̃ɛu tengi bii woo wee ŋau à leekĩ si ilɛ ngbɛu. Kuta maateeji ŋau aa nɛò ŋai tengi bii aa koo i sũ nnyi ŋa.

⁴ Ŋɔi Zozue í kpe inɛmɔkɔ maateeji iyi í jɔ̀ à cica si inɔi inɛi Izirɛli ŋau, si dimi akã fei inɛ akã,

⁵ í sɔ̃ ŋa í ni, i too do wajui kpakoi akabuui Aɔ̃ Lafɛ̃ɛ nŋɛu i bɔ hee si aninii idoi Zuudɛ̃ɛu ŋa, nɔ inɛ akã nŋɛ fei ku so kuta akã si kɔngɔɛ ku ba dimi fei ku ba titɛɛ akã akã.

⁶ Kuta ŋau bɛi aa jɛ nyinda si anini nŋɛ. Bii ama nŋɛ ŋa à na à waa bee ŋɛ à waa ni, mii kuta ŋau bɛ à jɛ nŋɛ,

⁷ i jɛ nŋa ŋa i ni, inyii idoi Zuudɛ̃ɛ í da si wajui kpakoi akabuui Aɔ̃ Lafɛ̃ɛu waati iyi à waa kua. Nɔ kuta ŋau ihɛ̃i aa jɔ̀ ka maa ye gigii mii iyi í ce ajɔ nŋu hee do ajɔ fei.

⁸ Inɛ ŋa iyi Zozue í cica ŋau à jirima ideɛ, à so kuta maateeji hai si aninii idoi Zuudɛ̃ɛu. Dimi akãi inɛi Izirɛli ŋau fei í nɛ kuta akã si bɛi Aɔ̃ Lafɛ̃ɛ takaɛ í tako í sɔ̃ Zozueu. Nɔ à so kuta ŋau à koo à jilɛ ŋa tengi bii aŋa taka nŋa à waa sũ idũ.

⁹ Nɔ Zozue í jɔ̀ à jilɛ kuta maateeji mmuɛ ŋa má si aninii idoi Zuudɛ̃ɛu tengi bii woo wee ŋa iyi à waa so kpakou à jilɛ kutɛ nŋa ŋa. Nɔ baa nnyi kuta ŋau à wa bɛ.

¹⁰ Woo wee ŋa iyi à waa so kpakoi akabuuu à leekĩ si aninii idoi Zuudɛ̃ɛu hee ide iyi Aɔ̃ Lafɛ̃ɛ í ni Zozue ku sɔ̃ inɛ ŋau fei í ce mam mam, si bɛi Moizi í tako í sɔ̃ Zozue fei. Nɔ inɛ ŋau à ce saasa à kua idou.

^11-18 Iyi inɛ fei í kua icei idou do ikpa ihɔ̃ í tã, ŋɔi Aɔ̃ Lafɛ̃ɛ í sɔ̃ Zozue í ni ku sɔ̃ woo wee ŋa iyi à waa so kpakoi akabuuu a fita wa hai inɔ idou. Nɔ Zozue í sɔ̃ ŋa í ni a fita wa hai inɔ idou. Nɔ à fita. Iyi à fita wa hai inɔ idou à naa à waa leekĩ ice si ilɛ ngbɛ, inyii idou í baa si agbɛɛ, nɔ í kɔ̃ wa cã bɛi tako má. Nɔ woo wee ŋau à so kpakoi akabuuu à waa lɔò si wajui zamaau. Inɛi Rubɛ̃ɛ ŋa do inɛi Gadi ŋa do dimi bubui Manasee ŋau mɔ à bɛi à lɔ do jĩnɛi igũ ŋa si wajui inɛi Izirɛli ŋau si bɛi Moizi í tako í sɔ̃ ŋa wo. Zakai amanɛ dubu ciijii (40.000) wa mu jĩnɛi igũ nɔ à tã sɔɔlu a ja igũ. Wajui Aɔ̃ Lafɛ̃ɛ bɛi aŋa mɔ à too à waa nɛ ikpa lɔɔmai Zerikou. Ajɔ nŋu bɛi Ilaaɔ̃ í jɔ̀ inɛi Izirɛli ŋau fei à mà bɛɛrɛi Zozue, nɔ à waa jirimaɛ bɛi à tako à jirima Moizi wo si kuwɛɛɛ fei.

¹⁹ Inɛi Izirɛli ŋau à fita wa hai inɔ idoi Zuudɛ̃ɛui si ajɔ mɛɛwasiai cukpa sinteu nɔ à koo à ce asɔ Giligali ikpa nunui daakɔi Zeriko.

²⁰ Kuta maateeji ŋa iyi à so wa hai inɔ idoi Zuudɛ̃ɛu, Zozue í jɔ̀ à gũ ŋa Giligali.

²¹ Nɔ í sɔ̃ inɛi Izirɛli ŋau í ni, ajɔ iyi ama nŋɛ ŋa à na à waa bee ŋɛ à waa ni, yoomai í jɛ yaasei kuta ŋau ihɛ̃,

²² aa sisi nŋa ŋai iyi kuta ŋau bɛ à waa ye inɛ ŋa gigii bɛi zamaai inɛi Izirɛli ŋa à kuaò idoi Zuudɛ̃ɛu wa si ilɛ ngbɛi.

²³ Aɔ̃ Lafɛ̃ɛ nŋɛ í jɔ̀ inyii idoi Zuudɛ̃ɛu í gbɛ hee ì kua ì tã ŋa, bɛi í tako í cea Tenkui Njeeu wo.

²⁴ Í ce bɛɛbɛi ku ba inɛi andunya fei ku mà bɛi gbugbãɛ í la í to, nɔ iŋɛ taka nŋɛ i ya maa jirimaɛ ŋa hee do ajɔ fei.