Zozue 3 - Bibeli do fee

Kukuai idoi Zuudɛ̃ɛ

¹ Ŋɔi Zozue í dede daadaakɔ í nɛ hai Sitimu do inɛi Izirɛli ŋau fei. Iyi à to itĩi idoi Zuudɛ̃ɛu nɔ à buba bɛ hee a maa kua.

² Iyi í ce ajɔ mɛɛta ŋɔi inɛ ngbo ŋau à dabii si asɔi inɛi Izirɛli ŋau fei

³ à sɔ̃ ŋa à ni, waati iyi aa yɛ inɛi Levii woo wee ŋau à waa so kpakoi akabuui Aɔ̃ Lafɛ̃ɛ nŋɛu, i dede hai bii ì wau nɔ i too ŋa ŋa.

⁴ Si bɛɛbɛi aa mà kpãa iyi aa too ŋa domi i kù too bɛ ŋa ajɔ kãma. Amma i jɔ̀ i jĩò kpakou ŋa zakai agbãawɔ dubu minji, i maà ti i má kɔkɔɛ ŋa.

⁵ Ŋɔi Zozue í sɔ̃ inɛ ŋau í ni, i jɔ̀ i ce buki iyi á jɔ̀ i maaju ŋa, domi ala Aɔ̃ Lafɛ̃ɛ á ce maamaake ŋa si anini nŋɛ.

⁶ Nɔ Zozue í sɔ̃ woo wee ŋau í ni a so kpakoi akabuui Aɔ̃ Lafɛ̃ɛu nɔ a nɛ a maa cuaa inɛ ŋau. Bɛɛbɛ mɔi inɛ ŋau à ce. À so kpakoi akabuuu nɔ à nɛ à waa cuaa zamaau.

⁷ Ŋɔi Aɔ̃ Lafɛ̃ɛ í sɔ̃ Zozue í ni, hai nnyi an soɛ lele si wajui inɛi Izirɛli ŋa fei ku ba a mà iyi ǹ wɛɛ do awɔ bɛi ǹ tako ǹ wɛɛ do Moizi wo.

⁸ Sɔ̃ woo wee ŋa iyi à waa so kpakoi akabuum nɔu i ni a leekĩ si inyii idoi Zuudɛ̃ɛu waati iyi à lɔ si inɔɛ.

⁹ Ŋɔi Zozue í sɔ̃ inɛi Izirɛli ŋau í ni, i sɛkɛɛ wa nɔ i gbɔ ide iyi Aɔ̃ Lafɛ̃ɛ nŋɛ wa fɔ ŋa.

^10-11 Kpakoi akabuui Ilaaɔ̃ Lafɛ̃ɛi ilɛu fei wee á cua nŋɛ ku kua idoi Zuudɛ̃ɛu. Nŋu bɛi á jɔ̀ i mà kãm kãm ŋa iyi Ilaaɔ̃, nŋu iyi í jɛ icui kuwɛɛ, í wa anini nŋɛ, nɔ á lele inɛi Kanaã ŋa hai si waju nŋɛ, do inɛi Hɛti ŋa do inɛi Hɛvi ŋa do inɛi Ferɛzi ŋa do inɛi Girigasi ŋa do inɛi Amɔre ŋa do inɛi Zebusi ŋa.

¹² Nsɛi i cica amanɛ maateeji si inɔ nŋɛ, si dimi fei i nya amanɛ akã ŋa.

¹³ Hai inɛ ŋa iyi à waa so kpakoi akabuui Aɔ̃ Lafɛ̃ɛu à lesi kutɛ nŋa ŋa si inɔ inyii idoi Zuudɛ̃ɛu gbakã, kucãi inyiu á dai, nɔ ku leekĩ ku tɔtɔɔ cingaa akã.

¹⁴ Ŋɔi inɛ ŋau à dede à ka ilei acɔ nŋa ŋau à waa bɔ idoi Zuudɛ̃ɛu ku kua, nɔ woo wee ŋa iyi à waa so kpakoi akabuui Aɔ̃ Lafɛ̃ɛu à waa cua nŋa.

¹⁵ Wee waatii amaajɛ ŋa ku dai. Si waati bɛɛbɛi idoi Zuudɛ̃ɛu í ya kɔ̃ hee ku nikã wa itĩɛ ŋa. Iyi woo wee ŋau à to bɛ à lesi kutɛ nŋa ŋa si inɔ inyiu,

¹⁶ ŋɔi kucãi inyiu í da hai bii à wau í nɛ hee jĩijĩ kɔkɔi ilu gɔ iyi à ya kpe Adamu iyi í wa kɔkɔi Zaataniu. Inyi kãma kù cã kù waa bɔ ikpa bi Tenku ku da Imuu má, nɔ inɛ ŋau à kua idoi Zuudɛ̃ɛu si tengii Zeriko suusuu.

¹⁷ Woo wee ŋa iyi à waa so kpakoi akabuui Aɔ̃ Lafɛ̃ɛu à waa leekĩi si ilɛ ngbɛ si aninii idoi Zuudɛ̃ɛu, nɔ inɛi Izirɛli ŋau à waa nɛ si ilɛ ngbɛ hee aŋa fei à koo à kua à tãò.