Zozue 24 - Bibeli do fee

Inɛi Izirɛli ŋa à jilɔɔ si aŋa a tɔɔ Aɔ̃ Lafɛ̃ɛ

¹ Zozue í tɔtɔɔ dimii Izirɛli fei Sikɛmu, nɔ í kpe inɛ ngbo ŋau do amanlu ŋau do woo kiiti ŋau do inɛ ngboi sooge ŋau, nɔ aŋa fei à naa à tɔtɔɔ bɛ si wajui Ilaaɔ̃.

² Ŋɔi Zozue í sɔ̃ zamaau fei í ni, ide iyi Aɔ̃ Lafɛ̃ɛ nŋɛ í fɔ wee. Í ni, tako wo bala nŋɛ ŋa à bubai do icei Efarata ido nlau do ikpa ihɔ̃, nɔ à ya maa tɔɔ iwɛ̃ ŋa. Nyaanzei Terai ǹ wa n fãa, nŋu iyi í jɛ baai Aburahamu do Nakɔɔ.

³ Nɔ Aɔ̃ Lafɛ̃ɛ í jɔ̀ Aburahamu bala nŋɛu í fita hai ilɛ iyi í wa do icei idoi Efarata ikpa ihɔ̃u í jɔ̀ í koo í dabii si ilɛi Kanaã fei nɔ í jɔ̀ í bí Izaaki nɔ í ba tɔku nkpɔ nkpɔ.

⁴ Izaaki mɔ Aɔ̃ Lafɛ̃ɛ í jɔ̀ í bí Zakɔbu do Esau. Nɔ Aɔ̃ Lafɛ̃ɛ í na Esau iri kuta iyi à ya kpe Seii í buba si, amma Zakɔbu do amaɛ ŋa, inɛ nŋu ŋa ilɛi Ezibitii à nɛ̀.

⁵ Iyi í na í kpɛ, ŋɔi Aɔ̃ Lafɛ̃ɛ í bɛ Moizi do Arɔ̃ɔ Ezibiti bɛ, nɔ í jɔ̀ wahala ikã ikã baa yooma fei í naa si inɛi Ezibiti ŋau í bɛi í nyaò inɛ nŋɛ ŋau wa.

⁶ Waati iyi bala nŋɛ ŋau à fita wa hai Ezibiti nɔ à to wa bi Tenkui Njeeu ŋɔi inɛi Ezibiti ŋau à jɔ̀ masa nŋa ŋa a da hãmɛ nŋa wa à na à ba ŋa hee bi Tenkui Njeeu do sarɛtii isɔ nŋa ŋa.

⁷ Ŋɔi bala nŋɛ ŋau à tɔɔ Aɔ̃ Lafɛ̃ɛ sobi, nɔ í jɔ̀ ilu kuku í ce si aninii aŋa do inɛi Ezibiti ŋau, nɔ í jɔ̀ inyii tenkuu í jɛ inɛi Ezibiti ŋau. Ijui bala nŋɛ ŋa í yɛ mii iyi Aɔ̃ Lafɛ̃ɛ í cea inɛi Ezibiti ŋau. Si anyiɛ à koo à buba à ce adɔ̃ nkpɔ nkpɔ si gbaau.

⁸ Si anyiɛ nɔ Aɔ̃ Lafɛ̃ɛ í bɔò ŋɛ bi inɛi Amɔre ŋa iyi à wa icei idoi Zuudɛ̃ɛu, nɔ à ba ŋɛ igũ ku ce, amma Aɔ̃ Lafɛ̃ɛ í da nŋɛ inɛ ŋau si awɔ í jɔ̀ ì jɛ ŋa igũ nɔ ì buba si ilɛ nŋau ŋa.

⁹ Balaki ilaalui Moabu, amai Sipɔɔ, nŋu mɔ wa ba ŋɛ ku ja hee í kpe Balamu amai Beɔɔ wa ku ba ku naa ku ceekpe ŋɛ.

¹⁰ Amma Aɔ̃ Lafɛ̃ɛ í kɔ̀ ku gbɔ idei Balamu, í gbe í jɔ̀ í wee nŋɛ, nɔ í nya ŋɛ hai si awɔi Balaki.

¹¹ Si anyiɛ nɔ ì kua idoi Zuudɛ̃ɛu ì bɔ hee ilui Zeriko ŋa. Nɔ iŋɛò inɛi Zeriko ŋau ì ja ŋa. Bɛɛbɛ mɔi inɛi Amɔre ŋa do inɛi Ferɛzi ŋa do inɛi Kanaã ŋa do inɛi Hɛti ŋa do inɛi Girigasi ŋa do inɛi Hɛvi ŋa do inɛi Zebusi ŋa aŋa mɔ à ba ŋɛ ku ja. Nɔ Aɔ̃ Lafɛ̃ɛ í jɔ̀ ì jɛ aŋa fei igũ ŋa.

¹² Í jɔ̀ zigiida í naa si inɛ ŋau nɔ à sa hai bi tu ŋɛ bɛi ilaalu minjii inɛi Amɔre ŋau à sa nŋɛ. Kù jɛ taakuba nŋɛ ŋa, kù nɔ kù jɛ afa nŋɛ ŋai í jɔ̀ inɛ ŋau à sa.

¹³ Nɔ í mu nŋɛ ilɛ iyi i kù logoo ŋa do ilu ŋa iyi kù jɛ iŋɛ taka nŋɛi ì ma ŋa ŋa, nɔ à baa à jɛ tu ŋɛ, hee do jĩi ŋa iyi kù jɛ iŋɛi ì lɔ ŋa ŋa nɔ ì waa jɛ iso nŋa ŋa.

¹⁴ Ŋɔi Zozue í ni má, na nŋu nsɛi, iŋɛi ì nɛ i jirima Aɔ̃ Lafɛ̃ɛ bɛbɛi, nɔ i ceaa icɛ do idɔ nŋɛ fei ŋa, do dee dee ku jɛ. I jɔ̀ iwɛ̃ ŋa iyi bala nŋɛ ŋau à tako à waa tɔɔ waati iyi à wa icei idoi Efaratau do si waati iyi à na à wa ilɛi Ezibitiu, nɔ i na ara nŋɛ si icɛi Aɔ̃ Lafɛ̃ɛ ku ce ŋa.

¹⁵ Bii ì nɔ ì yɔɔ iyi i kaa cea Aɔ̃ Lafɛ̃ɛ icɛ ŋai, to, i cica inɛ iyi ì bi i cea icɛ ŋa. Iwɛ̃ ŋa iyi bala nŋɛ ŋau à ya tako à maa tɔɔ do icei idoui ì bi i cea icɛ ŋa de, mà iwɛ̃i inɛi Amɔre ŋa si ilɛ bii ì wa ŋau. Amu de, amu do inɛi kpasɛ̃m ŋa Aɔ̃ Lafɛ̃ɛi aa ka cea icɛ.

¹⁶ Ŋɔi inɛ ŋau aŋa fei à jɛ à ni, lasabui Aɔ̃ Lafɛ̃ɛ ku fũsi awɔ nɔ kaa maa gulɛa iwɛ̃ ŋa kú jĩò wa.

¹⁷ Lasabu bɛɛbɛ kú jĩò wa domi Aɔ̃ Lafɛ̃ɛ nŋui í jɛ Lafɛ̃ɛ nwa, nŋui í nɔ í nya wa wa hai ilɛi Ezibiti bii à tako à waa jɛ aru awa do bala nwa ŋau nɔ à yɛ maamaake nla nla ŋa iyi í ce waati bɛɛbɛ. Nŋui í degbe wa si kpãa iyi à too fei do si aninii inɛ ŋa iyi à lɔ fei.

¹⁸ Nɔ nŋui í lele nwa dimi nkpɔ nkpɔ, hee do inɛi Amɔre ŋa iyi à wa si ilɛu ihɛ̃ wo. Na nŋu, awa mɔ Aɔ̃ Lafɛ̃ɛi aa ka cea icɛ domi nŋui í jɛ Lafɛ̃ɛ nwa.

^19-20 Ŋɔi Zozue í sɔ̃ inɛ ŋau í ni, i kaa yɔkɔ i cea Aɔ̃ Lafɛ̃ɛ icɛ ŋa domi Aɔ̃ Lafɛ̃ɛ í má, nɔ nŋu akãi ì nɛ i tɔɔ ŋa. Na nŋu, bii ì fũsiɛ awɔ nɔ ì koo ì waa cea iwɛ̃ ŋa icɛ ŋa, kaa ce nŋɛ suurui dulum du ŋɛ, amma á sinda si ŋɛi ku ce nŋɛ laalɔ nɔ ku kpa iri nŋɛ baa do iyi í ce nŋɛ jiida nkpɔ nkpɔ tã.

²¹ Amma inɛ ŋau à jɛa Zozue à ni, do nŋu fei, Aɔ̃ Lafɛ̃ɛi aa ka cea icɛ.

²² Nɔ Zozue í sɔ̃ ŋa má í ni, to. Debɛi iŋɛ taka nŋɛ ì jɛ sɛɛdai ara nŋɛ ya. Iŋɛ taka nŋɛi ì jilɔɔ si iŋɛ i cea Aɔ̃ Lafɛ̃ɛ icɛ ŋa. Nɔ aŋa fei à jɛ à ni, oo, à jɛ sɛɛdai ara nwa.

²³ Ŋɔi Zozue í ni, to. I nyɔ iwɛ̃ ŋa iyi à wa si anini nŋɛ ŋau nɔ i na Aɔ̃ Lafɛ̃ɛ nwa ara nŋɛ mam mam ŋa.

²⁴ Nɔ inɛ ŋau à jɛaa má à ni, Aɔ̃ Lafɛ̃ɛ nwai aa ka cea icɛ nɔ ka jirima ideɛ.

²⁵ Ajɔ nŋu bɛi Zozue í dĩ akabuu do inɛ ŋau si ilui Sikɛmu, nɔ í na ŋa wooda ikã ikã ŋa iyi aa maa too si.

²⁶ Nɔ Zozue í kɔ ide ŋau si tiai woodai Ilaaɔ̃. Si anyiɛ nɔ í so kuta nla nla gɔ í gũu si abɛi jĩi ndii sɛni iyi í wa si bantumai ile kumái Aɔ̃ Lafɛ̃ɛu.

²⁷ Nɔ Zozue í sɔ̃ zamaau fei má í ni, i cɔ ŋa, kutau ihɛ̃i á jɛ sɛɛda nwa domi kutau takaɛ í gbɔ ide iyi awaɛ ŋa do Aɔ̃ Lafɛ̃ɛ fei à fɔ à waa sindoa njɛ. Nŋui á jɛ sɛɛda nŋɛ ku ba i maà kɔ̀si Aɔ̃ Lafɛ̃ɛ nŋɛ.

²⁸ Iyi Zozue í fɔ bɛɛbɛ nɔ í jɔ̀ inɛ ŋau fei à nyi si ilɛ iyi à kpɛ̃ nŋau.

Ikui Zozue

²⁹ Si anyii nŋu ŋau bɛ fei Zozue amai Nunu woo ce icɛi Aɔ̃ Lafɛ̃ɛu í ku. Adɔ̃ cĩɔ do mɛɛwai í nɛ si waati iyi í kuu.

³⁰ Nɔ à suu si ilɛ iyi í ba si ikpɛ̃u, si ilui Timuna-Sera si iri kutai Efaraimu ŋa do ikpa awɔ njɛi kpãai inunui iri kutai Gaasi.

³¹ Inɛi Izirɛli ŋau à cea Aɔ̃ Lafɛ̃ɛ icɛ si kuwɛɛi Zozue fei do si kuwɛɛi inɛ ngbo ŋa iyi aŋaò Zozue ŋa à wɛɛ wo nɔ à yɛ mii jiida ŋa iyi Aɔ̃ Lafɛ̃ɛ í cea aŋa inɛi Izirɛli ŋau fei.

³² Kũkũi Zozɛfu iyi inɛi Izirɛli ŋa à so wa hai Ezibitiu, ilui Sikɛmui à na à suu si iko iyi Zakɔbu í ra wo kpɛkɛlɛ cĩɔ hai bi tɔkui Hamɔɔ ŋa, nŋu í iyi í jɛ baai Sikɛmuu. Ilɛu í baa í jɛ ti tɔkui Zozɛfu ŋa.

³³ Eleazaa amai Arɔ̃ɔu, nŋu mɔ í ku nɔ à suu Gibea si ilɛ iyi à na Fineɛzi amaɛu, si iri kutai Efaraimu ŋau.