Zozue 23 - Bibeli do fee

Ide iyi Zozue í jɔ̀a inɛi Izirɛli ŋa

¹ Aɔ̃ Lafɛ̃ɛ í nya inɛi Izirɛli ŋa hai si awɔi mbɛɛ ŋa iyi à kaako ŋau nɔ í jɔ̀ à wɛɛò laakai ku sũ waati sisɔ. Waati bɛɛbɛ, Zozue í gbo ntɔ ntɔ.

² Ŋɔi ajɔ nŋu gɔ í kpe inɛi Izirɛli ŋau fei, hai inɛ ngbo nŋa ŋa do amanlu nŋa ŋa do woo kiiti nŋa ŋa do inɛ ngboi sooge nŋa ŋa. Í sɔ̃ ŋa í ni, amu wee ǹ gbo bɛbɛi hee í caa.

³ Ì nɔ ì yɛ bɛi Aɔ̃ Lafɛ̃ɛ nŋɛ í cea inɛ ŋa iyi à wa si ilɛ ŋau ihɛ̃ fei na iri nŋɛ. Nŋu takaɛ í ja nŋɛ igũ.

⁴ I cɔ, si kpasa iyi à tau ǹ kpɛ̃ nŋɛ ilɛi inɛ ŋa iyi ǹ jɛ igũu si dimi do dimi hee do ti inɛ ŋa iyi à gbeò ku kãmia ŋau. Ilɛ ŋau à wai hai idoi Zuudɛ̃ɛu do ikpa nunui daakɔ hee ku bɔ bi Tenkui Mediteraneeu ikpa nunui alɛ.

⁵ Aɔ̃ Lafɛ̃ɛ nŋɛi á tale inɛ ŋau nɔ ku lele ŋa hai si waju nŋɛ nɔ i buba si ilɛ nŋa ŋau si bɛi nŋu takaɛ í ce kuwãɛ.

⁶ Iŋɛ, iyi ì nɛ ku ce ŋa, nŋui í jɛ i dasi kookaai i leekĩ dim dim ŋa, nɔ i jirima ide iyi Moizi í kɔu fei si tiai wooda ŋau ŋa, i maà na i yaa do canga walakɔ do njɛ si kpãai woodau ŋa.

⁷ I maà tɔtɔɔ ara nŋɛ do dimi mmu ŋa iyi à gbe si anini nŋɛ ŋau, i maà ce kutɔɔ do irii iwɛ̃ nŋa ŋa, nɔ i maà ya ce kugbasi do irii iwɛ̃ nŋa ŋau, nɔ i maà ya gulɛ i tɔɔ ŋa ŋa.

⁸ Amma i leekĩ do Aɔ̃ Lafɛ̃ɛ nŋɛ nŋu akã ŋa bɛi ì waa leekĩ si nsɛi ŋa.

⁹ Aɔ̃ Lafɛ̃ɛ í lele dimi ŋa iyi à la nɔ à nɛ gbugbã ntɔ ntɔ hai si waju nŋɛ nɔ hee ku baa nsɛi inɛ kãma kù yɔkɔ ku leekĩ si waju nŋɛ.

¹⁰ Amanɛ akã si inɔ nŋɛ í ya lele amanɛ dubu, domi Aɔ̃ Lafɛ̃ɛ nŋɛ nŋu takaɛi wa ja nŋɛ igũ bɛi í ce nŋɛ kuwãɛ.

¹¹ Na nŋu, í sĩa i ce laakaii ara nŋɛ ŋa nɔ i ce kookaai baa yooma fei ŋa i bi Aɔ̃ Lafɛ̃ɛ nŋɛ.

¹² Bii ì sinda hai bi tɛɛ ì koo ì tɔtɔɔ ara nŋɛ do inɛ ŋa iyi à gbe si anini nŋɛ ŋau má ŋa, nɔ ì so ama inaabo nŋa ŋa iŋɛò ŋa ì tɔtɔɔ ŋa,

¹³ i mà ŋa iyi Aɔ̃ Lafɛ̃ɛ nŋɛ kaa lele ŋa hai bi tu ŋɛ má. Aŋai aa na a jɛ cɛkũm ŋa si anini nŋɛ nɔ aa jɛ taa ku mu inɛ. Nɔ aa yɛi má bɛi kpɔtɔɔ iyi à ya cãò inɛ do bɛi agũ ŋa si iju nŋɛ ŋa. Nɔ aa wahala ŋɛi hee i koo i ku i jɔ̀ ilɛ jiida iyi Aɔ̃ Lafɛ̃ɛ nŋɛ í mu nŋɛu.

¹⁴ Amu wee ǹ maai ku jɔ̀ andunya mbɛ bɛi. Iŋɛ fei i mà ŋa do idɔ nŋɛ fei do lasabu nŋɛ fei, kuwã kãma kù gbe iyi Aɔ̃ Lafɛ̃ɛ í ni nŋu á ce nŋɛ nɔ kù coo. Fei ndɛɛ í cei dee dee si bɛi í fɔu na iri nŋɛ, nɔ kãma kù gbe iyi kù ce.

¹⁵ To. Si bɛi ide jiida ŋa iyi Aɔ̃ Lafɛ̃ɛ nŋɛu í sɔ̃ ŋɛ fei, fei ndɛɛ í ce, bɛɛbɛ mɔi á yɔkɔ ku jɔ̀ ide laalɔ baa yooma fei ku ba ŋɛ hee koo kpaò iri nŋɛ hai si ilɛ jiida iyi í mu nŋɛu.

¹⁶ Bii ì fũ akabuu iyi Aɔ̃ Lafɛ̃ɛ í dĩ do iŋɛu ŋa, nɔ ì koo ì waa tɔɔ iwɛ̃ ŋa si agbɛi Aɔ̃ Lafɛ̃ɛ ì waa gulɛ si waju nŋa ŋa, idɔɔkɔ̃ɛ á dede si ŋɛ, nɔ kaa kpɛ mɔm ku kpa iri nŋɛ hai si ilɛ jiida iyi í mu nŋɛu.