Zozue 22 - Bibeli do fee

Dimi ŋa iyi à wa ikpa nunui daakɔi Zuudɛ̃ɛu

¹ Ŋɔi Zozue í kpe inɛi dimii Rubɛ̃ɛ ŋau do inɛi dimii Gadi ŋa do dimi bubui Manasee ŋau.

² Iyi à to wa bi tɛɛ ŋɔi í sɔ̃ ŋa í ni, ide iyi Moizi woo ce icɛi Aɔ̃ Lafɛ̃ɛu í fɔ fei ì jirimaɛ nɔ ì ce bɛi ǹ sɔ̃ ŋɛ dee dee ŋa.

³ Hai ku kpɛ hee ku baa nsɛi i kù fũsi kpaasi nŋɛ ŋau awɔ ŋa, nɔ ì waa jirima woodai Aɔ̃ Lafɛ̃ɛ nŋɛ ŋa.

⁴ Bɛbɛi iyi Aɔ̃ Lafɛ̃ɛ nŋɛ í jɔ̀ inɛ nŋɛ ŋa à buba si ilɛ nŋa bɛi í wã ŋa dou, aa yɔkɔ i nyi si ilei acɔ nŋɛ ŋa i koo i buba si ilɛ iyi Moizi woo ce icɛi Aɔ̃ Lafɛ̃ɛu í na ŋɛ si ikpɛ̃u do ikpa nunui daakɔi idoi Zuudɛ̃ɛu.

⁵ Iŋɛ de i ya maa jirima wooda ŋa iyi Moizi í na ŋɛu fei sãa sãa ŋa nɔ i ya maa ceò icɛ ŋa. I bi Aɔ̃ Lafɛ̃ɛ nŋɛ ŋa, i jirima idɔɔbiɛ ŋa, nɔ i ceò woodaɛ ŋau icɛ ŋa. I wɛɛ do nŋu ŋa nɔ i ceaa icɛ do idɔ nŋɛ fei do lasabu nŋɛ fei.

^6-8 Si anyii nŋu, ŋɔi Zozue í wee nŋa nɔ í ni má, bɛbɛi do amani nla nlai ì waa nyiò ilei acɔ nŋɛ ŋa. Ì gba mɛɛmu gaa ŋa do isɔ fũfũ do wura do isɔ nkpa do isɔ dũdũ do ibɔ ŋa hai bi mbɛɛ nŋɛ ŋa. Amani iyi ì ba ŋau bɛ fei ŋa i koo i ce ikpɛ̃ɛ do inɛ nŋɛ ŋa iyi ì jɔ̀ bɛ ŋau. Iyi Zozue í fɔ bɛɛbɛ í tã nɔ í ni a nɛ. Dimii Manasee ŋau wee bubu nŋai Moizi í tako í na inya gɔ si ilɛi Basãa ikpa nunui daakɔi idoi Zuudɛ̃ɛu, nɔ bubu iyi í gbeu Zozuei í kpɛ̃a aŋa mɔ ilɛ ŋa ikpa nunui alɛu kɔkɔi kpaasi nŋa ŋa.

Bi kuwee iyi à ma kɔkɔi idoi Zuudɛ̃ɛu

⁹ Dimii Rubɛ̃ɛ ŋa do dimii Gadi ŋa do dimi bubui Manasee ŋau à nyi ide nŋa. À dede à jɔ̀ inɛi Izirɛli iyi ihɔ̃ ŋau Siloo bɛ si ilɛi Kanaã à nɛ ikpa ilɛi Galaadi, ilɛ iyi à na ŋa si ikpɛ̃u si bɛi Aɔ̃ Lafɛ̃ɛ í sɔ̃ Moiziu.

¹⁰ Ŋɔi waati iyi à waa nɛu, à to itĩi idoi Zuudɛ̃ɛu, nɔ à ma bi kuwee gɔ bɛ. Bi kuweeu í la hee í caa. Waati bɛɛbɛ fei a kù fita hai si ilɛi Kanaãu titã.

¹¹ Ŋɔi inɛ gɔ í koo í sɔ̃ inɛi Izirɛli iyi ihɔ̃ ŋau í ni, i gbɔ ŋa, dimii Rubɛ̃ɛ ŋa do dimii Gadi ŋa do dimi bubui Manasee ŋau à ma bi kuwee gɔ itĩi idoi Zuudɛ̃ɛu bɛ do ikpa cingaa nwa wa ihɛ̃ si ilɛi Kanaã.

¹² Iyi inɛi Izirɛli ŋau à gbɔ laabaauu bɛɛbɛ, ŋɔi aŋa fei à koo à tɔtɔɔ Siloo bɛ ku ba a koo si ŋa igũ.

¹³ Ŋɔi à bɛ Fineɛzi amai Eleazaa woo weeu bi tu ŋa ilɛi Galaadi bɛ,

¹⁴ nɔ inɛ ngbo mɛɛwa í suu. Inɛ ngbo mɛɛwa ŋau à cica ŋai hai si dimii Izirɛli ŋau. Si dimi akã fei inɛ akãi à nya, inɛ ŋa iyi à jɛ inɛ ngboi kpasɛ̃ ŋau.

¹⁵ Ŋɔi inɛ ŋau à dede à bɔ ilɛi Galaadi bi dimii Rubɛ̃ɛ ŋa do dimii Gadi ŋa do dimi bubui Manasee ŋa iyi à wa ikpa nunui daakɔu, nɔ à sɔ̃ ŋa à ni,

¹⁶ do irii zamaai Aɔ̃ Lafɛ̃ɛ iyi à gbeu feii à waa beeò ŋɛ ideu ihɛ̃. Na mii í jɔ̀ ì ce kurara nla nla bɛ ihɛ̃ si wajui Aɔ̃ Lafɛ̃ɛ nwa ŋa. Na mii í ce ì sinda ì toaa anyi ì naa ì ma bi kuwee nŋɛ ŋa, ì waa bi i kɔ̀ ide si wajuɛ ŋa.

¹⁷ Kurara iyi à tako à ce ilui Peɔɔ, zamaau fei í yɛ ijuukpãɛ nɔ baa nsɛi ijuukpãu kù tã. Inɛ nŋu bɛ kù to wa?

¹⁸ Nsɛi wee iŋɛ mɔ ì sinda ì waa toa Aɔ̃ Lafɛ̃ɛ anyi má ŋa. Bii ì waa kɔ̀ ide si wajuɛ nnyi ŋa, ala si inɛi Izirɛli ŋa feii idɔɔkɔ̃ɛ á naa.

¹⁹ Bii í jɛ ntɔ ntɔ ì yɔɔ ŋa iyi ilɛ iyi à na ŋɛu í nɛ riisii, i baa wa si ilɛ iyi í jɛ ti Aɔ̃ Lafɛ̃ɛ takaɛu ŋa, tengi bii bi kuwai nŋu takaɛ í wa, nɔ i buba si anini nwa ŋa. Amma i maà kɔ̀ ide bi Aɔ̃ Lafɛ̃ɛ ŋa do bi tu wa i koo i ma bi kuwee nŋɛ ikã iyi kù jɛ ti Aɔ̃ Lafɛ̃ɛ nwa.

²⁰ Waati iyi Akãa tɔkui Zera í ce kurara nla nla í so amani ŋa iyi à ganji ŋa a sou, idɔɔkɔ̃i Aɔ̃ Lafɛ̃ɛ í naai si inɛi Izirɛli ŋa fei, iŋɛ fei ì nɔ ì mà sãa sãa ŋa. Kù nɔ kù jɛ Akãa nŋu akãi í ku na kuraraɛ iyi í ceu.

²¹ Iyi dimii Rubɛ̃ɛ ŋau do dimii Gadi ŋau do dimi bubui Manasee ŋau à gbɔ bɛɛbɛ, ŋɔi à jɛa inɛ ngbo ŋau à ni,

²² ntɔ ntɔ Aɔ̃ Lafɛ̃ɛ í wɛɛ, í nɔ í mà mii iyi í jɔ̀ à ce bɛɛbɛ. Nɔ inɛi Izirɛli ŋau fei aa na a mà. Bii í jɛ à waa kɔ̀ ide si wajui Aɔ̃ Lafɛ̃ɛi, bii í nɔ í jɛ taale nla nla gɔi à ce si wajui Aɔ̃ Lafɛ̃ɛ, hai nnyi ku maà jɔ̀ kuwɛɛ nwa ku bɔ waju má.

²³ Bii í jɛ à ma bi kuweei awa taka nwai nɔ à waa ce si kuwee ŋa iyi à ya jo si ina fei sãa sãa do kuweei amaajɛ ŋa, nɔ à waa kooò amua nwa ŋa bɛ ku ba ka sinda ka toa Aɔ̃ Lafɛ̃ɛ anyii, walakɔ bii í jɛ aa ka ce si kuweei anu akãi, Aɔ̃ Lafɛ̃ɛ takaɛ ku kpã wa iju.

²⁴ Lasabui awa kù jɛ do yaase bɛɛbɛ. À lasabu a ce bɛɛbɛi si na iyi í jɔ̀ à waa ce njo bii í na í kpɛ tɔku nŋɛ ŋa a maà na a sɔ̃ tɔku nwa ŋa a ni, akabuu yoomai í wa gãmɛ nŋɛ do Aɔ̃ Lafɛ̃ɛi inɛi Izirɛli ŋa.

²⁵ Aɔ̃ Lafɛ̃ɛ takaɛi í jɔ̀ idoi Zuudɛ̃ɛ í jɛ kɔɔi awaɛ ŋa, iŋɛ tɔkui Rubɛ̃ɛ ŋa do iŋɛ tɔkui Gadi ŋa. Na nŋu, i kù nɛ ikpɛ̃ kãma ŋa bi Aɔ̃ Lafɛ̃ɛ. Nɔ tɔku nŋɛ ŋa aa na a jɔ̀ tɔku nwa ŋa a leekĩ a kaa na a maa jirima Aɔ̃ Lafɛ̃ɛ má.

²⁶ Na ŋɔi í jɔ̀ à lasabu a ma bi kuweeu bɛ, kù jɛ à waa bi ka maa ce si kuwee ŋa.

²⁷ Amma à bi ku jɛ sɛɛda si gãmɛi awaɛ ŋa do si gãmɛi tɔku nwa ŋa do tɔku nŋɛ ŋa, iyi awa mɔ à bi ka cea Aɔ̃ Lafɛ̃ɛ icɛ do dimii kuwee ikã ikã fei. Si yaase bɛɛbɛu bɛ tɔku nŋɛ ŋa a kaa ba a sɔ̃ tɔku nwa ŋa a ni a kù nɛ ikpɛ̃ kãma bi Aɔ̃ Lafɛ̃ɛ.

²⁸ Na ŋɔi í jɔ̀ à ni, bii í na í kpɛ nɔ à waa bi a ni nwa bɛɛbɛ walakɔ bii à waa bi a nia tɔku nwa ŋa bɛɛbɛ, aa yɔkɔ a sɔ̃ ŋa a ni, i cɔ, bala nwa ŋai à ce bi kuweeu ihɛ̃ í jɛ dimi akã do ti Aɔ̃ Lafɛ̃ɛu. Baa bii í jɛ a kù maa na ku ba ka maa ce si kuwee gɔ, nŋu de í jɛ sɛɛda si gãmɛi awaɛ ŋa.

²⁹ Ntɔ ntɔ si lasabu nwa kù jɛ a ni à waa bi ka kɔ̀ ide nsɛi si wajui Aɔ̃ Lafɛ̃ɛ walakɔ ka fũsi ideɛ awɔ nɔ kaa maa ce kuwee ikã ikã baa yooma fei do amua ŋa inya mmu, bii kù jɛ si bi kuweei Aɔ̃ Lafɛ̃ɛ nwa iyi í wa si ile kumáɛu.

³⁰ Waati iyi Fineɛzi woo weeu do inɛ ngbo ŋa aŋa ilu kpasɛ̃i inɛi Izirɛli ŋau à gbɔ ide iyi tɔkui Rubɛ̃ɛ ŋa do tɔkui Gadi ŋau do dimi bubui Manasee ŋau à fɔ, ŋɔi ideu í ye ŋa.

³¹ Ŋɔi Fineɛzi í sɔ̃ ŋa í ni, nsɛi bɛbɛi à mà iyi Aɔ̃ Lafɛ̃ɛ í wɛɛ do awa, domi i kù ce dulum kãma si wajuɛ ŋa bɛi à waa tamaau. Si bɛɛbɛ inɛi Izirɛli kãma kaa yɛ ijuukpãi Aɔ̃ Lafɛ̃ɛ na iri nŋɛ má.

³² Si anyiɛ nɔ Fineɛzi do inɛ ngbo ŋau à sinda wa hai bi dimii Rubɛ̃ɛ ŋa do hai bi dimii Gadi ŋa hai ilɛi Galaadi à baa ilɛi Kanaã bi inɛi Izirɛli ŋau, nɔ à sisi nŋa bɛi ideu í nɛ fei.

³³ Ŋɔi ideu í ye ŋa hee à waa saabu Aɔ̃ Lafɛ̃ɛ. Nɔ a kù fɔ idei aŋa a koo si dimii Rubɛ̃ɛ ŋau do dimii Gadi ŋau igũ má.

³⁴ Ŋɔi tɔkui Rubɛ̃ɛ ŋau do tɔkui Gadi ŋau à sɔ bi kuwee iyi à mau Sɛɛda, domi à ni, nŋui í jɛ sɛɛda si gãmɛi awaɛ iyi Aɔ̃ Lafɛ̃ɛi í jɛ Ilaaɔ̃.