Zozue 21 - Bibeli do fee

Ilu ŋa iyi à jɛ ti inɛi Levii ŋa

¹ Inɛ ŋa iyi à jɛ ilu kpasɛ̃ ŋa si dimii Levii ŋau à koo à ba Eleazaa woo weeu do Zozue amai Nunu do inɛ ŋa iyi à jɛ ilu kpasɛ̃i dimii Izirɛli ŋau,

² à ba ŋa ide ku fɔ Siloo bɛ si ilɛi Kanaã à sɔ̃ ŋa à ni, Aɔ̃ Lafɛ̃ɛ í sɔ̃ Moizi í ni a na wa ilu ŋa bii aa ka buba, nɔ a na wa tengi bii mɛɛmu nwa ŋa aa ya jɛ kɔkɔi ilu ŋau.

³ Ŋɔi inɛi Izirɛli ŋau à na inɛi Levii ŋau ilu ŋa bii aa buba, nɔ à na ŋa tengi bii mɛɛmu nŋa ŋau aa ya jɛ kɔkɔi ilu ŋau dee dee si bɛi Aɔ̃ Lafɛ̃ɛ takaɛ í fɔu.

⁴ Ŋɔi à ta kpasa a ba a kpɛ̃ inyau. Si kpasa iyi à tau dimii Levii ŋa iyi à jɛ tɔkui Kehati ŋau, aŋai kpasau í so sinte. Si inɔ nŋa Arɔ̃ɔ woo weeu, tɔkuɛ ŋa à ba ilu maatɛta si kpasa iyi à tau. Ilu ŋau à wai si ilɛi Zudaa do Simeɔ̃ do Bɛnzamɛɛ.

⁵ Tɔkui Kehati iyi à gbe ŋau mɔ à ba ilu mɛɛwa si ilɛi Efaraimu ŋa do ilɛi Dãa do si ilɛi dimi bubui Manasee ŋau.

⁶ Tɔkui Gɛɛsɔ̃ɔ ŋau mɔ à ba ilu maatɛta si ilɛi Isakaa do ilɛi Azɛɛ do ilɛi Nɛfitali do si ilɛi dimi bubui Manasee ŋa iyi í wa ilɛi Basãa.

⁷ Tɔkui Merari ŋa mɔ à ba ilu maateeji si ilɛi Rubɛ̃ɛ do ilɛi Gadi do ilɛi Zabulɔ̃ɔ.

⁸ Bɛɛbɛi inɛi Izirɛli ŋau à na inɛi Levii ŋau ilu ŋa bii aa buba nɔ à na ŋa tengi bii mɛɛmu nŋa ŋa aa ya jɛ si kpasa iyi à ta si bɛi Aɔ̃ Lafɛ̃ɛ í tako í sɔ̃ Moiziu.

^9-10 Inɛi dimii Kehati ŋa iyi à jɛ tɔkui Arɔ̃ɔ ŋau, aŋai kpasau í so sinte si ikpɛ̃i ilu ŋau. Irii ilu ŋa iyi à ba si dimii Zudaa ŋa do ti Simeɔ̃ ŋa wee.

¹¹ Kiria-Aaba iyi à ya kpe Eborɔ̃ɔu. Aabau, balai Anakui. Iluu si iri kutai Zudaai í wa. À na ŋa iluu nɔ à na ŋa tengi bii mɛɛmu nŋa ŋa aa ya jɛ kɔkɔi iluu.

¹² Amma ilɛi iluu do ilɛɛkoɛ ŋa fei à na Kalɛbu amai Yɛfune í jɛ ilɛɛ tã.

¹³ Nɔ Arɔ̃ɔ woo weeu, à na tɔkuɛ ŋa Eborɔ̃ɔ iyi í jɛ ilu bi ku manjiu do Libuna

¹⁴ do Yatii do Esitemɔa

¹⁵ do Holɔ̃ɔ do Debii

¹⁶ do Aini do Yuta do Bɛti-Semɛsi do ilɛɛko nŋa ŋa. Fei sãa sãa í ce ilu mɛɛsã.

¹⁷ Si ilɛi dimii Bɛnzamɛɛ ŋa mɔ ilu ŋa iyi à ba wee. Gabaɔ̃ɔ do Geba

¹⁸ do Anatɔti do Alimɔɔ do ilɛɛko nŋa ŋa. Nŋu mɔ í ce ilu mɛɛ.

¹⁹ Ilu ŋa iyi à na tɔkui Arɔ̃ɔ woo wee ŋau, fei ndɛɛ í ce ilu maatɛta do ilɛɛko nŋa ŋa.

²⁰ Si kpasa iyi à tau, tɔkui Kehati ŋa iyi à gbe ŋau à ba ilu gɔ ŋa si ilɛi dimii Efaraimu ŋa.

²¹ À na ŋa Sikɛmu iyi í jɛ ilu bi ku manjiu si ilɛ iyi í nɛ iri kuta ŋau, do Gezɛɛ

²² do Kibusaimu do Bɛti-Horɔ̃ɔ do ilɛɛko nŋa ŋa. Nŋu mɔ í ce fei sãa sãa ilu mɛɛ.

²³ Si ilɛi dimii Dãa ŋa mɔ ilu ŋa iyi à na ŋa wee. Eliteke do Gibetɔ̃ɔ

²⁴ do Ayalɔ̃ɔ do Gati-Rimɔɔ do ilɛɛko nŋa ŋa. Ilu mɛɛi à ba bɛ.

²⁵ Si ilɛi dimi bubui Manasee ŋa mɔ à ba ilu minji. Irii ilu ŋau wee. Tanaki do Yibileamu do ilɛɛko nŋa ŋa.

²⁶ Fei sãa sãa ilu mɛɛwai dimii Kehati iyi ihɔ̃ ŋau à ba do ilɛɛko nŋa ŋa.

²⁷ Inɛi Levii ŋa iyi à jɛ tɔkui Gɛɛsɔ̃ɔ ŋau à ba ilu minji do ilɛɛko nŋa ŋa si ilɛi dimi bubui Manasee ŋau. Irii ilu ŋau wee. Golãa si ilɛi Basãa iyi í jɛ ilu bi ku manjiu, do Besetera.

²⁸ Si ilɛi dimii Isakaa ŋau mɔ à ba ilu mɛɛ do ilɛɛko nŋa ŋa. Irii ilu ŋau wee. Kisiɔ̃ɔ do Dabarati

²⁹ do Yamuti do Eni-Ganimu do ilɛɛko nŋa ŋa.

³⁰ Si ilɛi dimii Azɛɛ ŋa mɔ à ba ilu mɛɛ do ilɛɛko nŋa ŋa. Ilu ŋau wee. Misali do Abudɔ̃ɔ

³¹ do Helikati do Rehobu do ilɛɛko nŋa ŋa.

³² Si ilɛi dimii Nɛfitali ŋa mɔ à ba ilu mɛɛta do ilɛɛko nŋa ŋa. Ilu ŋau wee. Kedɛsi si ilɛi Galilee iyi í jɛ ilu bi ku manjiu, do Hamɔti-Dɔɔ do Kaatãa do ilɛɛko nŋa ŋa.

³³ Fei sãa sãa dimii Gɛɛsɔ̃ɔ ŋau ilu maatɛtai à ba do ilɛɛko nŋa ŋa. À kpɔ̃ɔi si yaasei nyaanze nŋa ŋa.

³⁴ Inɛi Levii ŋa iyi à gbe ŋau mɔ, aŋa iyi à jɛ tɔkui Merari ŋa à ba ilu mɛɛ do ilɛɛko nŋa ŋa si ilɛi dimii Zabulɔ̃ɔ ŋa. Irii ilu ŋau wee. Yokineamu do Kaata

³⁵ do Dimuna do Nahalali do ilɛɛko nŋa ŋa.

³⁶ Si ilɛi dimii Rubɛ̃ɛ ŋa mɔ à ba ilu mɛɛ má do ilɛɛko nŋa ŋa. Irii ilu ŋau wee. Besɛɛ do Yahasi

³⁷ do Kedemɔti do Mefati do ilɛɛko nŋa ŋa.

^38-39 Si ilɛi dimii Gadi ŋa à ba bɛ mɔ ilu mɛɛ do ilɛɛko nŋa ŋa. Irii ilu ŋau wee. Ramɔti si ilɛi Galaadi iyi í jɛ ilu bi ku manjiu, do Mahanaimu do Hɛsebɔ̃ɔ do Yazɛɛ do ilɛɛko nŋa ŋa.

⁴⁰ Dimii Levii ŋa iyi à jɛ tɔkui Merari ŋau ilu maateejii à ba fei sãa sãa si kpasa iyi à tau. Nyaanze fei í ba tɛɛ.

⁴¹ Fei sãa sãa tɔkui Levii ŋa ilu ciiji do mɛɛjɔi à ba si ilɛi inɛi Izirɛli ŋau do ilɛɛkoɛ ŋa.

⁴² Ilu ŋau bɛ fei do ilɛɛko nŋa ŋai.

⁴³ Do yaase bɛɛbɛi Aɔ̃ Lafɛ̃ɛ í na inɛi Izirɛli ŋa ilɛ iyi í tako í wãò bala nŋa ŋau fei. Nɔ à koo à gba inyau à buba si.

⁴⁴ Aɔ̃ Lafɛ̃ɛ í jɔ̀ à nɛ laakai ku sũ si kɔɔi ilɛ ŋau fei bɛi í tako í wãò bala nŋa ŋau. Nɔ í jɔ̀ mbɛɛ nŋa ŋau kãma ci ya yɔkɔ ku leekĩ si waju nŋa.

⁴⁵ Ide didɔ̃ ŋa iyi Aɔ̃ Lafɛ̃ɛ í wãò inɛi Izirɛli ŋau fei kãma kù gbe iyi kù ce. Fei ndɛɛ í kɔ̃i mam mam.