Zozue 20 - Bibeli do fee

Ilu bi ku manji ŋau

¹ Si anyii nŋu ŋɔi Aɔ̃ Lafɛ̃ɛ í sɔ̃ Zozue í ni,

² sɔ̃ inɛi Izirɛli ŋau i ni a cica ilu bi ku manji ŋau si bɛi ǹ tako ǹ sɔ̃ Moizi wo

³ ku ba waati iyi inɛ gɔ í kpa inɛ si inɔ nŋɛ, bii kù jɛ do idɔɔbiɛ ku sa koo manji si akãi ilu ŋau ku ba ku saa inɛ iyi á naa ku jaa inɛ iyi í kuu.

⁴ Bii í sa í koo si ilu ŋau bɛ akãɛ, bii í to á leekĩi bi gamboi anu koofai iluu, nɔ ku sisia inɛ ngboi ilu ŋau mii iyi nŋu í ce. Inɛ ŋau aa gbaa bi tu ŋa si iluu nɔ à dɛaa bi kuwa ku ba ku maa wa bi tu ŋa bɛ.

⁵ Bii inɛ iyi wa jaa inɛ iyi í kuu í leleɛ wa hee bɛ, inɛi ilu ŋau a kaa daa inɛɛu si awɔ, domi kù jɛ do idɔɔbiɛi í kpaò kpaasiu bɛ, nɔ kù tako kù jɛ mbɛɛɛ mɔ wo.

⁶ Ilu bɛi á maa wa hee koo to waati iyi inɛ ngboi ilu ŋau aa kiitiɛ. Á maa wa bɛi hee inɛ iyi wa jɛ woo wee nla waati bɛɛbɛu koo kuò. Waati bɛɛbɛ á yɔkɔ ku nyi iluɛ nɔ ku nɛ kpasɛ̃ɛ hai bii í sa wau.

⁷ Ŋɔi à ce bɛi Aɔ̃ Lafɛ̃ɛ í fɔu. Si ilɛi Galilee à nya ilui Kedɛsi ikã si iri kutai ilɛi inɛi Nɛfitali ŋa, nɔ à nya Sikɛmu ikã si iri kutai ilɛi inɛi Efaraimu ŋa, do Kiria-Aaba iyi à ya kpe Eborɔ̃ɔ si iri kutai ilɛi inɛi Zudaa ŋa.

⁸ Ikpa icei idoi Zuudɛ̃ɛu do ikpa nunui daakɔi Zeriko mɔ, Besɛɛi à cica si gbaa iyi í jɛ ti inɛi Rubɛ̃ɛ ŋau, nɔ si ilɛi Galaadi à cica Ramɔti iyi í jɛ ti inɛi Gadi ŋau, nɔ à cica Golãa si ilɛi Basãa iyi í jɛ ti inɛi Manasee ŋau.

⁹ Ilu ŋau bɛi à cica a jɛ bi ku manjii inɛi Izirɛli ŋa do inɛ njoo ŋa iyi à wa bi tu ŋa bɛ. Si bɛɛbɛ, bii inɛ gɔ í kpa inɛ nɔ kù jɛ do idɔɔbiɛ á yɔkɔ koo manji bɛ ku ba inɛ iyi wa jaa inɛ iyi í kuu ku maà ba ku kpaa hee koo to waati iyi inɛ ngbo ŋa aa kiitiɛ.