Zozue 2 - Bibeli do fee

Zozue í bɛ inɛ minji gɔ ŋa a koo a cɔ yaasei ilui Zeriko wa

¹ Zozue amai Nunu í bɛ inɛ minji gɔ ŋa do asii hai ilui Sitimu í sɔ̃ ŋa í ni a koo a cɔ yaasei ilɛ iyi í wa icei idou wa, nɔ iyi í re mɔm nŋui í jɛ ilui Zeriko. Ŋɔi inɛ ŋau à koo. Iyi à to Zeriko nɔ à bɔ kpasɛ̃i abo à ta icu gɔ iyi à ya kpe Rahabu, nɔ à sɔ bɛ.

² Ŋɔi inɛ gɔ í koo í sɔ̃ ilaalui Zeriko í ni, wee inɛi Izirɛli gɔ ŋa à naa inɔ ilu ihɛ̃ idũuyi a ba a mà yaasei ilɛ nwau.

³ Nɔ ilaaluu í ni a koo a sɔ̃ Rahabu ku jɔ̀ inɛ ŋa iyi à lɔ kpasɛ̃ɛu a fita, domi à naa ilɛu ku cɔi a ba a mà yaaseɛ fei. Ŋɔi inɛ ŋau à waa koo.

⁴ Hee a maa to, ŋɔi Rahabu í so inɛi Izirɛli ŋau í singa ŋa, nɔ í jɛa woo bɛi ilaalu ŋau í ni, ntɔ ntɔi inɛ ŋau à to wa bi tom, amma n kù mà hai iwoi à naa.

⁵ Si bɛi bii idũ í dũ, à ya cĩmbo gamboi iluui, inɛ ŋau à fita n kù mà bii à bɔ má. I hanya i da hãmɛ nŋa ŋa ku ba i mu ŋa.

⁶ Wee í ko abou í jɔ̀ à gũ antaii ile sikifaɛ bɛ, nɔ í singa ŋa si kungbã kambo ŋa iyi í jilɛ bɛ.

⁷ Ŋɔi woo bɛi ilaalu ŋau à waa da hãmɛi inɛ ŋau à too kpãai waawaai idoi Zuudɛ̃ɛu, nɔ à cĩmbo gamboi iluu waati iyi à fita à nɛ.

⁸ Hee inɛ minji ŋau a maa sũ Rahabu í koo bi tu ŋa antaii ile lele bɛ,

⁹ nɔ í sɔ̃ ŋa í ni, ǹ mà iyi Aɔ̃ Lafɛ̃ɛ í na ŋɛ ilɛ nwau ihɛ̃i. Ŋɔi í jɔ̀ zigii awa fei í da hee inɛ fei wa yaya do njo na iri nŋɛ.

¹⁰ Inɛ fei wa yaya do njoi si na iyi í jɔ̀ à gbɔ bɛi si waatii kufita nŋɛ wa hai ilɛi Ezibiti Aɔ̃ Lafɛ̃ɛ í jɔ̀ inyii Tenkui Njeeu í gbɛ si waju nŋɛ nɔ ì kua ŋa. Nɔ à gbɔ bɛi ì cea Sioni do Ɔgu ŋa, ilaalu minjii inɛi Amɔre ŋa iyi à wa ikpa nunui daakɔi idoi Zuudɛ̃ɛu. À gbɔ iyi ì kpa ŋa ŋa hee do mii ndu ŋa ŋa fei.

¹¹ Na laabaau ŋau bɛi í jɔ̀ à kua gbugbã, nɔ inɛ kãma kaa yɔkɔ ku leekĩ si waju nŋɛ má, domi Aɔ̃ Lafɛ̃ɛ nŋɛ, nŋui í jɛ Ilaaɔ̃ do ntɔ. Kù nɛ saa si ilɛ ihɛ̃ hee do lele fei.

¹² Na nŋu nsɛi, ǹ wa n tɔɔ ŋɛi, i gbasi do irii Aɔ̃ Lafɛ̃ɛ, iyi aa cea inɛi kpasɛ̃m ŋa jiida bɛi amu takam ǹ ce nŋɛ. Nɔ i nam nyinda gɔ

¹³ iyi wa nyisi iyi do ntɔ aa faaba iyeò baam ŋa, do igbã do ifɔm ŋa, do wecĩm ŋa hee do inɛi kpasɛ̃ nŋa ŋa fei, nɔ i faaba wa i maà jɔ̀ a kpa wa ŋa.

¹⁴ Ŋɔi inɛ ŋau à jɛaa à ni, à tã sɔɔlu ka ku na iriɛ bii i kù sɔ̃ inɛ ŋa mii iyi à naa ku ce. Nɔ waati iyi Aɔ̃ Lafɛ̃ɛ á na ku na wa ilɛu aa ka ceɛ jiida nɔ ka kɔ̃ kuwã iyi à ceɛ.

¹⁵ Wee ilei Rahabuu wa gũsi bindii iluui. Ŋɔi í jɔ̀ inɛ ŋau à ba à kita hai do fɛrɛntii ileɛu do ikũ.

¹⁶ Nɔ hee a maa fita í sɔ̃ ŋa í ni, i koo i manji ikpa bi iri kuta ŋau bɛ ŋa ku ba inɛ ŋa iyi à waa dɛdɛ ŋɛ ŋau a maà ko ŋɛ. I manji bɛ ŋa ajɔ mɛɛta hee inɛ ŋau à koo à baaò wa i bɛi i nɛ ŋa.

¹⁷ Ŋɔi inɛ ŋau à sɔ̃ɔ à ni, kuwã iyi ì ni ka ceɛu do yaase bɛi aa ka ceò kuwãu icɛ wee.

¹⁸ Waati iyi aa ka naa ka to wa si ilɛu ihɛ̃, ikũ nkpau ihɛ̃i aa dĩ si anu fɛrɛnti hai do bii ì jɔ̀ à fitaòu ihɛ̃. Nɔ i tɔtɔɔ inɛɛ ŋa inɔ kpasɛ̃ɛ ihɛ̃, hai iyeò baaɛ ŋa do igbãɛ ŋa do ifɔɛ ŋa do wecĩɛ ŋa fei hee do nyaanzei baaɛ ŋa fei.

¹⁹ Bii inɛ gɔ í fita hai inɔ kpasɛ̃ɛ ihɛ̃ í bɔ waduude, bii à kpaa ikuɛ í jɛ idei irii nŋu takaɛ, awa a kù nɛ taale kãma. Amma bii à kpa inɛ gɔ si inɔ kpasɛ̃ɛ, awai aa ka so taale si ikui lafɛ̃ɛ.

²⁰ Bii ì nɔ ì sɔ̃ inɛ gɔ yaasei kunaa nwau ihɛ̃, kuwã iyi ì ni ka ceɛu a kaa ka ceò icɛ má.

²¹ Nɔ Rahabu í jɛ nŋa í ni, to, bɛi ì fɔ ŋau fei, ku ce bɛɛbɛ. Nɔ í jɔ̀ inɛ ŋau à nɛ. Iyi à nɛ gbakã nɔ í dĩ ikũ nkpau si fɛrɛntiɛ.

²² Ŋɔi inɛ ŋau à koo à gũ iri kuta ŋau, nɔ à manji bɛ ajɔ mɛɛta hee inɛ ŋa iyi à da hãmɛ nŋa ŋau à sinda à baa nŋa wa. À koo à dabii à dɛdɛ ŋa bii fei, amma a kù yɛ ŋa.

²³ Ŋɔi inɛ minji ŋau à fita wa hai bii à waa manjiu, à kita wa hai iri kuta ŋau nɔ à kua idoi Zuudɛ̃ɛu à nyi bi Zozue amai Nunuu. Nɔ à sisiaa mii iyi í ba aŋa fei.

²⁴ Nɔ à sɔ̃ Zozue à ni, ntɔ ntɔ Aɔ̃ Lafɛ̃ɛ í da nwa ilɛu fei si awɔi, nɔ inɛi ilɛ ŋau fei zigi nŋa í da hee à waa yaya do njo na iri nwa.