Zozue 18 - Bibeli do fee

Kukpɛ̃i ilɛu si dimi ŋa iyi à gbeu

¹ Ŋɔi inɛi Izirɛli ŋau à kãmia inɛi ilɛ ŋau, nɔ aŋa fei à koo à tɔtɔɔ Siloo, nɔ à jilɛ ilei acɔ iyi à ya kpe ile bi kukou tengi bɛ bii aa ya naa a tɔɔ Aɔ̃ Lafɛ̃ɛ.

² Si inɔ nŋa dimi mɛɛjei í gbe iyi a kù ba ikpɛ̃ nŋa si ilɛu titã.

³ Nɔ Zozue í bee ŋa í ni, hee waati yoomai ì waa degbe ì bɛi ì koo ì buba si ilɛ iyi Aɔ̃ Lafɛ̃ɛi bala nŋɛ ŋa í na ŋɛu.

⁴ Si dimi akã fei i cica amanɛ mɛɛta ŋa nɔ n jɔ̀ a koo a dabii si ilɛu, nɔ inɛ fei ku cɔ yaase bɛi aa kpɔ̃ɔ, nɔ a nyi wa bi tom a na a sisiim bɛi í jɛ.

⁵ Aa kpɛ̃ ilɛui ikɔ mɛɛje. Tɔkui Zudaa ŋa aa bubai do ikpa awɔ cangai kpãai inunu. Tɔkui Zozɛfu ŋau mɔ aa bubai hai kɔɔ iyi í wa do ikpa awɔ njɛi kpãai inunuu.

⁶ Na nŋu, iŋɛ aa koo i cɔ yaase bɛi aa ce ikpɛ̃i ilɛu ŋai ikɔ mɛɛje, nɔ i naa i nyisim bɛi ì coo ŋa. Nɔ amui an ta nŋɛ kpasa ihɛ̃ si wajui Aɔ̃ Lafɛ̃ɛ nwa.

⁷ Amma tɔkui Levii ŋa a kaa ba ikpɛ̃ kãma si ilɛu, domi aŋai à jɛ woo weei Aɔ̃ Lafɛ̃ɛ ŋa, nɔ iyi bɛi í jɛ tubu nŋa. Nɔ dimii Gadi do dimii Rubɛ̃ɛ do bubui dimii Manasee ŋa, inɛ nŋu ŋau à ba ilɛ nŋa ikpa nunui daakɔi idoi Zuudɛ̃ɛu tã. Moizi woo ce icɛi Aɔ̃ Lafɛ̃ɛui í kpɛ̃ nŋa.

⁸ Ŋɔi inɛ ŋa iyi à cica a koo a cɔ yaasei ilɛu, à waa ce sɔɔlu a ba a nɛ. Amma hee a maa nɛ Zozue í sɔ̃ ŋa í ni, i koo i dabii si ilɛu i cɔ yaaseɛ wa sãa sãa nɔ i na i sisiim bɛi í jɛ ŋa. Bii ì baa ŋa an ta kpasa si wajui Aɔ̃ Lafɛ̃ɛ ilui Siloou ihɛ̃ nɔ n na iŋɛ fei iyi í jɛ tu ŋɛ.

⁹ Ŋɔi inɛ ŋau à koo à dabii si ilɛu fei, nɔ à ce yaasei kukpɛ̃ɛ à kɔɔ si tia gɔ ikɔ mɛɛje. Si anyiɛ nɔ à baa à naa à ba Zozue Siloo.

¹⁰ Nɔ Zozue í ta nŋa kpasau Siloo bɛ si wajui Aɔ̃ Lafɛ̃ɛ, nɔ í cea inɛi Izirɛli ŋau ikpɛ̃i ilɛu, í na dimi fei iyi í jɛ tɛɛ.

Ilɛi dimii Bɛnzamɛɛ ŋa

¹¹ Ŋɔi à ta kpasau. Iyi à taa, dimii Bɛnzamɛɛ ŋai í so sinteu. Nɔ aa ce ikpɛ̃ui si nyaanze nŋa ŋau ikã ikã. Ilɛ nŋau í wai si afei ilɛi tɔkui Zudaa ŋau do ti tɔkui Zozɛfu ŋau.

¹² Do ikpa awɔ njɛi kpãai inunu kɔɔ nŋa í wai hee idoi Zuudɛ̃ɛ nɔ í mɔsi do ikpa cingaai Zeriko ikpa awɔ njɛi kpãai inunu, nɔ í nɛ do ikpa nunui alɛ í koo í kua iri kuta gɔ bɛ, nɔ í koo í kãsi gbaai Bɛti-Avɛni.

¹³ Hai bɛ nɔ í bɔ ikpa Luzi iyi à ya kpe Betɛli má do ikpa awɔ cangai kpãai inunu. Si anyiɛ nɔ í kã iri ikpa Atarɔti-Adaa í koo í kua iri kuta iyi í wa ikpa awɔ cangai kpãai inunuu má ikpa Bɛti-Horɔ̃ɔ. Bɛti-Horɔ̃ɔ iyi ihɛ̃ si lɔɔmaui í wa.

¹⁴ Hai do ikpa nunui alɛ, kɔɔu í sinda í nɛi ikpa awɔ cangai kpãai inunu. Hai bi iri kuta iyi í wa suusuui Bɛti-Horɔ̃ɔ ikpa awɔ cangai kpãai inunuu, kɔɔu í bɔi hee Kiria-Baali iyi à ya kpe Kiria-Yarimu má iyi í jɛ ti dimii Zudaa ŋau. Yaase bɛi kɔɔu í nɛ do ikpa nunui alɛu mbɛ.

¹⁵ Do ikpa awɔ cangai kpãai inunu mɔ kɔɔu í sintii hai Kiria-Yarimu nɔ í mɔsi í bɔ ikpa nunui alɛ nɔ í koo í kãsi isɔ̃i Nɛfutoa.

¹⁶ Hai bɛ nɔ í naa kɔkɔi iri kuta iyi í wa tengii lɔɔmai amai Hinɔmu do ikpa awɔ njɛi kpãai inunu si lɔɔmai inɛi Refai ŋau. Nɔ í too lɔɔmai amai Hinɔmuu wa í na í lɔ cingaai ilɛi inɛi Zebusi ŋau do ikpa awɔ cangai kpãai inunu nɔ í bɔ hee Eni-Rogɛli.

¹⁷ Nɔ í sinda í bɔ ikpa awɔ njɛi kpãai inunu ikpa Eni-Semɛsi, si anyiɛ nɔ í bɔ ikpa Gelilo iyi í wa tengii geetei Adumimu suusuu. Hai bɛ nɔ í bɔ ikpa bi kuta iyi à ya kpe Bohãa. Bohãau irii inɛ akãi amai Rubɛ̃ɛ ŋaui.

¹⁸ Si anyiɛ nɔ í lɔ do ikpa iri kutau do ikpa awɔ njɛi kpãai inunu í nɛ lɔɔmai Zuudɛ̃ɛu.

¹⁹ Nɔ í mɔsi do ikpa awɔ njɛi kpãai inunuu í bɔ ikpa Bɛti-Hogula nɔ í koo í dasi Tenku ku da Imuu bii idoi Zuudɛ̃ɛ í koo wa dasiu. Tengi bii kɔɔu í lɔ mbɛ do ikpa awɔ cangai kpãai inunu.

²⁰ Idoi Zuudɛ̃ɛu nŋui í jɛ kɔɔ nŋa má do ikpa nunui daakɔ. Yaase bɛi à kpɛ̃a dimii Bɛnzamɛɛ ŋau ilɛu mbɛ si nyaanze nŋa ŋa do kɔɔ nŋa ŋa fei.

²¹ Ilu ŋa iyi à jɛ ti nyaanzei dimii Bɛnzamɛɛ ŋa wee. Zeriko do Bɛti-Hogula do Emɛki-Kesisi

²² do Bɛti-Araba do Semaraimu do Betɛli

²³ do Avimu do Para do Ofara

²⁴ do Kefaa-Amɔnai do Ofini do Geba. Fei sãa sãa í koo í dede ilu maateeji do ilɛɛko nŋa ŋa.

²⁵ Gabaɔ̃ɔ mɔ í wa bɛ do Rama do Berɔti

²⁶ do Misipe do Kefira do Moza

²⁷ do Rekɛmu do Yiripeɛli do Tareala

²⁸ do Sela do Elɛfu do Zebusi waatɔ Zeruzalɛmu do Gibea do Kiria, nɔ nŋu mɔ í ce ilu maatɛ̃ɛ do ilɛɛko nŋa ŋa fei. Fei ndɛɛ í jɛ ikpɛ̃i nyaanzei dimii Bɛnzamɛɛ ŋa.