Zozue 17 - Bibeli do fee

¹ Manasee yemmai Zozɛfuu, tɔkuɛ ŋau mɔ à ba ikpɛ̃ nŋa. Makii ama yemmai Manaseei wa jɛ. Makiiu woo ce igũ kaasãanɛ gɔi nɔ wa jɛ baai Galaadi. À kpɛ̃a tɔkuɛ ŋa ilɛi Galaadi do Basãa ikpa nunui daakɔi idoi Zuudɛ̃ɛu tã.

² Nɔ à kpɛ̃a dimi mbɔi Manasee ŋau mɔ ilɛu si bɛi nyaanze nŋa ŋa à to. Nyaanze ŋau wee. Abiezɛɛ do Helɛki do Aziriɛli do Sikɛmu do Hefɛɛ do Semida. Inɛ bɛ ŋa fei tɔkui Manasee ŋai. Manasee takaɛ amai Zozɛfui wa jɛ.

³ Selofa amai Hefɛɛi wa jɛ, Hefɛɛ mɔ amai Galaadii, Galaadi mɔ amai Makii, Makii mɔ amai Manaseei wa jɛ. Selofau wee kù bí ama inɛmɔkɔ ŋa, í gbe ama inaabo ŋa. Irii ama inaaboɛ ŋau wee. Mala do Noa do Hogula do Milika do Tirisa.

⁴ Aŋai à koo à ba Eleazaa woo weeu do Zozue amai Nunu do inɛ ngbo ŋau. Nɔ à sɔ̃ ŋa à ni, Aɔ̃ Lafɛ̃ɛ í ni Moizi ku kpɛ̃ nwa ilɛ ŋau bɛi à kpɛ̃a nyaanze nwa ŋau. Nɔ à kpɛ̃a aŋa mɔ ilɛu si bɛi Aɔ̃ Lafɛ̃ɛ í fɔu bɛi à kpɛ̃a nyaanzei baa nŋa ŋau.

⁵ Si ikpɛ̃u ikɔ mɛɛwai à na inɛi Manasee ŋau, baka ilɛi Galaadi do Basãa iyi à na ŋa má ikpa nunui daakɔi idoi Zuudɛ̃ɛu baasi.

⁶ À ce bɛɛbɛi domi ama inaaboi Manasee ŋau mɔ à ba ikpɛ̃ nŋai si inɔi ama inɛmɔkɔɛ ŋau, nɔ ilɛi Galaadiu í baa í jɛ ti ama inɛmɔkɔi Manasee iyi à gbe ŋau.

⁷ Ilɛi Manasee í wai hai Azɛɛ hee ku bɔ Mikimeta kɔkɔi Sikɛmu. Hai bɛ nɔ í nɛ ikpa Sikɛmu ikpa ilɛi inɛi Eni-Tapua ŋau.

⁸ Ilɛi Tapuau ti inɛi Manasee ŋai í jɛ, amma ilui Tapua iyi í jɛ kɔɔu nŋau takaɛ inɛi Efaraimu ŋai à nɔɔ.

⁹ Si anyiɛ kɔɔu í tooi ikpa awɔ cangai kpãai inunu í koo í kãsi acãi inyii Kana. Waati bɛɛbɛ ilu ŋa iyi à wa ikpa bɛ ŋa si aninii ilɛi inɛi Manasee ŋau fei, inɛi Efaraimu ŋai à nɔɔ. Kɔɔi ilɛi inɛi Manasee ŋau do ikpa awɔ njɛi kpaai inunu ikpa bi acãi inyiu, hee si Tenkui Mediteraneeui í koo í kãsi.

¹⁰ Dimii Efaraimu ŋai à nɛ ilɛ iyi í wa ikpa awɔ cangai kpãai inunuu. Iyi í wa ikpa awɔ njɛu mɔ dimii Manasee ŋai à nɔɔ. Tenkui í jɛ kɔɔ nŋa ikpa nunui alɛ. Do ikpa awɔ njɛi kpãai inunu kɔɔu í koo í kãsi ilɛi dimii Azɛɛ ŋa, nɔ í koo í kãsi ti dimii Isakaa ŋa mɔ ikpa nunui daakɔ.

¹¹ Si ilɛi dimii Isakaa ŋa do ti Azɛɛ ŋa, dimii Manasee ŋau à nɛ ilɛ gɔ ŋa bɛ má. Ilɛ ŋau wee. Bɛti-Seãa do Yibileamu do Dɔɔ do Eni-Dɔɔ do Taanaki do Mɛgido do ilɛɛko nŋa ŋa fei. Ilu ŋau bɛ fei si ilɛ mɛɛtai à wa.

¹² Amma inɛi Manasee ŋau a kù yɔkɔ a kù lele inɛi ilu ŋau bɛ. Inɛi Kanaã ŋau à kɔ̀ à waa wɛɛ nŋa.

¹³ Waati iyi inɛi Izirɛli ŋau à na à nɛ gbugbã à kɔ̃ɔsi, à kãmia inɛi Kanaã ŋa nɔ à jilɛ nŋa icɛi aru ŋa iyi aa ya ce, amma a kù lele ŋa.

¹⁴ Ŋɔi tɔkui Zozɛfu ŋau à koo à bee Zozue à ni, bɛirei í ce si ilɛu inya akãi ì na wa, nɔ wee zamaa nwa í la ntɔ ntɔ, nɔ baa nsɛi Aɔ̃ Lafɛ̃ɛ wa wee nwa.

¹⁵ Amma Zozue í jɛ nŋa í ni, bii ì kpɔ ŋa, nɔ ilɛi iri kutai Efaraimuu kù waa to nŋɛ, i koo i da agboi inɛi Ferɛzi do inɛi Refai ŋau ihɔ̃ ŋa ku ba bantuma nŋɛu ku la ku kɔ̃ɔsi.

¹⁶ Ŋɔi tɔkui Zozɛfu ŋau à ni, iri kutau kaa to wa, nɔ mɔm inɛi Kanaã ŋa iyi à wa si lɔɔmau fei hai inɛi Bɛti-Seãa ŋa hee do inɛi Yizireɛli ŋa do inɛi ilɛɛko nŋa ŋa fei à nɛ sarɛtii igũ ŋa iyi à ce do isɔ.

¹⁷ Ŋɔi Zozue í nyi í sɔ̃ ŋa má í ni, iŋɛ dimii Efaraimu ŋau do bubui dimii Manasee ŋau ì kpɔ nɔ ì nɛ gbugbã ntɔ ntɔ ŋa. Na ŋɔi í jɔ̀ ikpɛ̃ nŋɛ kaa jɛ akã si ilɛu.

¹⁸ Amma iri kutaui á na ku jɛ tu ŋɛ má, domi baa do iyi í nɛ agbo fei, aa daa ŋa nɔ bantumaɛ ku jɛ tu ŋɛ. Nɔ i lele inɛi Kanaã ŋau ŋa baa do iyi à nɛ gbugbã nɔ à nɛ sarɛtii igũ iyi à ce do isɔu.