Zozue 16 - Bibeli do fee

Ilɛi Efaraimu do ti Manasee

¹ Ilɛ iyi à kpɛ̃a tɔkui Zozɛfu ŋau si kpasa iyi à tau í wai hai idoi Zuudɛ̃ɛ kɔkɔi Zeriko do ikpa nunui daakɔi idoi Zerikou. Hai Zeriko kɔɔu í kua gbaaui í bɔ si ilɛ ku nɛ iri kuta ŋau hee ku bɔ Betɛli.

² Hai bɛ nɔ í mɔsi í bɔ ikpa Luzi nɔ í bɔ ikpa ilɛi inɛi Aaki ŋau do ikpa Atarɔti.

³ Si anyiɛ nɔ í nɛ ikpa nunui alɛ do ikpa kɔɔi inɛi Yafulɛti ŋau hee ku bɔ Bɛti-Horɔ̃ɔ iyi í wa si lɔɔmau hee ku bɔ Gezɛɛ má, nɔ í koo í kpa iri si Tenku Nla iyi à ya kpe Mediteraneeu.

⁴ Ikpɛ̃ iyi dimii Manasee do ti Efaraimu amai Zozɛfu ŋau à ba mbɛ.

⁵ Ilɛi dimii Efaraimu ŋa wee si bɛi nyaanze nŋa ŋa à to. Kɔɔi ilɛ nŋa do ikpa nunui daakɔ í wai hai Atarɔti-Adaa hee ku bɔ Bɛti-Horɔ̃ɔ iyi í wa si geeteu.

⁶ Hai bɛ nɔ í bɔ hee Tenkui Mediteraneeu. Hai Tenkui Mediteraneeu do ikpa awɔ njɛi kpãai inunu mɔ í tooi kɔkɔi Mikimeta. Hai Mikimetau nɔ í sinda í bɔ ikpa Taana-Silo nɔ í kua í nɛ hee Yanoa.

⁷ Hai bɛ nɔ í bɔ ikpa Atarɔti do Naara nɔ í koo í kãsi Zeriko nɔ í kpa iri idoi Zuudɛ̃ɛ.

⁸ Do ikpa nunui alɛi Mikimeta, kɔɔu í nɛi hai Tapua nɔ í bɔ ikpa nunui alɛi acãi inyii Kanau nɔ í koo í dasi Tenkui Mediteraneeu. Iyi í jɛ ikpɛ̃i dimii Efaraimu ŋa mɔ mbɛ si bɛi nyaanze nŋa ŋa à to.

⁹ Dimii Efaraimu ŋau à nyi à nɛ ikpɛ̃ má si tubui dimii Manasee ŋau, fei ndɛɛ do ilɛɛko nŋa ŋa.

¹⁰ Inɛi Efaraimu ŋau a kù lele inɛi Kanaã ŋa iyi à wa Gezɛɛu. Inɛ nŋu ŋau à wɛɛ baa nnyi si inɔ nŋa, amma à jilɛ nŋa icɛi aru ŋa iyi aa ya ce.