Zozue 14 - Bibeli do fee

Ilɛi Kanaã ku kpɛ̃

¹ Tubu iyi inɛi Izirɛli ŋau à ba si ilɛi Kanaã wee iyi Eleazaa woo weeu do Zozue amai Nunu do inɛ ngboi kpasɛ̃i dimi ŋa à kpɛ̃a inɛi Izirɛli ŋau.

² Si kukpɛ̃i inyau à ta kpasai si dimi mɛɛsã do bubu ŋa iyi a kù tako a kù bau si bɛi Aɔ̃ Lafɛ̃ɛ í sɔ̃ Moizi wo.

³ Moizi í tako í kpɛ̃a dimi minji do bubuu ilɛ iyi í wa ikpa nunui daakɔi idoi Zuudɛ̃ɛu tã, amma kù na dimii Levii ŋau ilɛ kãma.

⁴ Dimii Zozɛfu ŋau à kpɛ̃i ikã ikã minji, dimii Manasee do ti Efaraimu ŋa. Inɛi Levii ŋau ilu bii aa maa wa nŋu akãi à nɛ, do tengi bii mɛɛmu nŋa ŋa do amani nŋa ŋa aa maa wa.

⁵ Inɛi Izirɛli ŋau à kpɛ̃ ilɛui dee dee si bɛi Aɔ̃ Lafɛ̃ɛ í na Moizi woodau.

⁶ Ajɔ nŋu gɔ inɛi dimii Zudaa ŋa à naa à ba Zozue Giligali. Ŋɔi Kalɛbu amai Yɛfune iyi í wa si nyaanzei Kenaziu í sɔ̃ɔ í ni, ye gigii ide iyi Ilaaɔ̃ í sɔ̃ Moizi woo ce icɛɛ si gãmɛi awɔ do amu waati iyi à wa ilui Kadɛsi-Baaneau.

⁷ Adɔ̃ ciijii ǹ nɛ waati iyi Moizi í bɛm wa hai Kadɛsi-Baanea n naa n cɔ yaasei ilɛu ihɛ̃. Iyi ǹ baa ǹ sisiaa yaaseɛ sãa sãa, muafiti gɔ kù wa si.

⁸ Kpaasim ŋa iyi awaò ŋa à naau à fɔ́ inɔi inɛ nwa ŋau, amma amu ǹ too si kpãai Aɔ̃ Lafɛ̃ɛm nii dee dee.

⁹ Ajɔ nŋu bɛi Moizi í ce kuwã í ni ntɔ ntɔ ilɛ iyi ǹ nɛ siu amui an nɔɔ do tɔkum ŋa hee do ajɔ fei si na iyi í jɔ̀ ǹ too si kpãai Aɔ̃ Lafɛ̃ɛm dee dee.

¹⁰ Adɔ̃ ciiji do miiu wai ihɛ̃ bɛbɛi iyi Aɔ̃ Lafɛ̃ɛ í sɔ̃ Moizi bɛɛbɛ si waati iyi inɛi Izirɛli ŋa à waa kua gbaau. Hai waati bɛɛbɛ Aɔ̃ Lafɛ̃ɛ wa mu kuwɛɛm nii si bɛi í ceem kuwãɛ, nɔ wee nsɛi ǹ nɛ adɔ̃ cinɛ do miiu.

¹¹ Do nŋu fei, ǹ nɔ ǹ wa n nɛ gbugbã má bɛi si waati iyi Moizi í bɛm n naa n cɔ yaasei ilɛu. Nɔ hee nsɛi ǹ wa n nɛ gbugbã iyi an yɔkɔ n ceò igũ walakɔ icɛ ikã ikã iyi í gbe fei.

¹² Na nŋu, nsɛi bɛi, nam ilɛ iyi í nɛ iri kuta ŋau ihɛ̃ iyi Aɔ̃ Lafɛ̃ɛ í wãm do si waati bɛɛbɛu. Hai waati bɛɛbɛ ì nɔ ì gbɔ iyi inɛi Anaku ŋa à wa bɛ, nɔ ilu nla ŋa iyi à nɛ gbugbã ŋa mɔ à wa bɛ. Aɔ̃ Lafɛ̃ɛ ku wɛɛ do amu ku ba n lele ŋa si bɛi nŋu takaɛ í fɔ.

¹³ Ŋɔi Zozue í weea Kalɛbu nɔ í naa ilui Eborɔ̃ɔ.

¹⁴ Do yaase bɛɛbɛi Kalɛbu amai Yɛfune inɛi Kenazi í baò ilui Eborɔ̃ɔu hee do nnyi fei si na iyi í jɔ̀ kuceɛ í jɛ dee dee si wajui Aɔ̃ Lafɛ̃ɛi inɛi Izirɛli ŋa.

¹⁵ Tako wo Eborɔ̃ɔ Kiria-Aabai à ya kpoo, Aabaui í jɛ inɛ iyi í la í re si inɔi inɛi Anaku ŋa. Hai waati bɛɛbɛi ilɛu í nɛ laakai ku sũ, igũ kù wa si.