Zozue 13 - Bibeli do fee

Ilɛ ŋa iyi à gbeu ku gba

¹ Zozue í na í ce mɔkɔ ngbo hee í caa. Nɔ Aɔ̃ Lafɛ̃ɛ í sɔ̃ɔ í ni, awɔ wee ì gbo ntɔ ntɔ, nɔ wee ilɛ nkpɔ nkpɔi í bɛi í gbe iyi i kù gba titã ŋa.

^2-3 I kù gba ilɛi inɛi Filisi ŋau fei titã ŋa do ilu miiu nŋa ŋau. Ilu ŋau wee. Gaza do Asidodi do Asikalɔ̃ɔ do Gati do Ekorɔ̃ɔ. I kù gba ilɛi inɛi Gɛsuu ŋau mɔ iyi í wa do ikpa nunui daakɔi Ezibitiu ŋa do ilɛi inɛi Avi ŋa iyi í wa awɔ cangai kpãai inunu. Nɔ i kù gba ilɛ iyi í wa hai acãi inyii Siɔ̃ɔ ŋa iyi í ce kɔɔ do ilɛi Ezibiti hee ku bɔ ilui Ekorɔ̃ɔ ikpa awɔ njɛi kpãai inunu.

⁴ Nɔ í nyi í gbe ilɛi inɛi Kanaã ŋau fei má hai Meara ilɛi inɛi Sidɔ̃ɔ ŋau hee ku bɔ Afɛki ku bɔ kɔɔi ilɛi inɛi Amɔre ŋa.

⁵ Nɔ í nyi í gbe ilɛi inɛi Gebali ŋa mɔ má do ilɛi Libãa fei ikpa nunui daakɔ, hai Baali-Gadi iyi í wa isɛi kutai Hɛɛmɔɔu hee ku bɔ Lebo-Amatiu.

⁶ Nɔ aa gba ilu ŋa mɔ iyi à wa si iri kuta ŋau fei ŋai, hai Libãa hee ku bɔ Misirefɔti-Maimu. Ilɛ ŋau bɛ fei ti inɛi Sidɔ̃ɔ ŋai. An lele aŋa feii hai si wajui inɛi Izirɛli ŋau. Kpɛ̃ nŋa ilɛu. Jɔ̀ a ta kpasa, nɔ inɛ fei ku so iyi kpasau í náa si bɛi ǹ tako ǹ sɔ̃ɛu.

⁷ Kpɛ̃a dimi mɛɛsã ŋau ilɛ ŋau bɛ do bubui dimii Manasee ŋa iyi a kù ba nkãma titãu.

Kukpɛ̃i ilɛ iyi í wa ikpa nunui daakɔi idoi Zuudɛ̃ɛ

⁸ Inɛi Rubɛ̃ɛ ŋa do inɛi Gadi ŋa do bubu sintei dimii Manasee ŋau à tako à ba ilɛ nŋa iyi Moizi woo ce icɛi Aɔ̃ Lafɛ̃ɛu í kpɛ̃ nŋa do ikpa nunui daakɔi idoi Zuudɛ̃ɛu.

⁹ Ilɛ nŋau í sintii hai Aroɛɛ iyi í wa kɔkɔi acãi inyii Aanɔɔu, do hai ilu iyi í wa aninii lɔɔmau, do fatamai Medebau fei hee ku bɔ Dibɔ̃ɔ,

¹⁰ do ilu ŋa iyi à jɛ ti Sioni ilaalui inɛi Amɔre ŋau fei, nŋu iyi í tako í jɛ ilaalu si ilui Hɛsebɔ̃ɔ nɔ bommaɛ í to hee kɔɔi ilɛi inɛi Amɔɔ ŋa.

¹¹ Ilɛi Galaadi mɔ í wa si do ilɛi inɛi Gɛsuu ŋa do ti inɛi Maaka ŋa do iri kutai Hɛɛmɔɔ do ilɛi Basãa fei hee ku bɔ Salika.

¹² Ilɛi Basãa mɔ fei í wa si, ilɛ iyi Ɔgu í tako í jɛ ilaaluɛ si ilui Asitarɔti do Ederei. Ɔguu nŋui í jɛ inɛ akãi inɛi Refai ŋa iyi à gbe. Moizii í jɛ ilaalu ŋau igũ nɔ í lele ŋa.

¹³ Amma inɛi Izirɛli ŋau a kù lele inɛi Gɛsuu ŋa do inɛi Maaka ŋa, nɔ baa nsɛi inɛ nŋu ŋau à wa si inɔ nŋa.

¹⁴ Dimii inɛi Levii ŋa aŋa akãi Moizi kù na tubui ilɛu. Kuwee ŋa iyi à ya joa Aɔ̃ Lafɛ̃ɛi inɛi Izirɛli ŋa nŋui í jɛ tubu nŋa, bɛi Aɔ̃ Lafɛ̃ɛ takaɛ í sɔ̃ Moizi wo.

¹⁵ Moizi í na dimii Rubɛ̃ɛ ŋa zaka bɛi kukpɔi nyaanze nŋa ŋa à to.

¹⁶ Aŋai à nɛ ilɛ iyi í wa hai Aroɛɛ kɔkɔi acãi inyii Aanɔɔu hee ku bɔ ilu iyi í wa aninii lɔɔmau, hee do lɔɔma iyi í wa kɔkɔi Medebau fei.

¹⁷ Aŋai à nyi à nɛ ilui Hɛsebɔ̃ɔ má do ilu ŋa iyi à wa si lɔɔmau fei, hai Dibɔ̃ɔ do Bamɔtu-Baali do Bɛti-Baali-Meɔ̃ɔ

¹⁸ do Yahasi do Kedemɔti do Mefati

¹⁹ do Kiriataimu do Sibuma do Serɛti-Sahaa bi iri kutai kɔkɔi lɔɔmau.

²⁰ Nɔ aŋai à nɛ Bɛti-Peɔɔ má do iri kutai Pisigaau do Bɛti-Yesimɔti.

²¹ Aŋai à nɛ ilu ŋa iyi à wa si lɔɔmau fei hee do bommai Sioniu fei, nŋu iyi í jɛ ilaalui inɛi Amɔre ŋa. Sioni ilaalu nŋau Hɛsebɔ̃ɔi í wa. Moizi í jɛ Sioniu igũ, nŋu do ilaalui inɛi Madiãa ŋa. Ilaalu ŋau à wa si ilɛu nɔ à waa sũa Sioni iri ilɛ. Iri nŋa wee. Evi do Rekɛmu do Suu do Huu do Reba.

²² Woo ce kuyɛ iyi à ya kpe Balamu amai Beɔɔu, nŋu mɔ í wa si inɔi inɛ ŋa iyi inɛi Izirɛli ŋa à kpa waati bɛɛbɛu.

²³ Ilɛi inɛi Rubɛ̃ɛ ŋau idoi Zuudɛ̃ɛui í jɛ kɔɔɛ do ikpa nunui alɛ. Iyi í jɛ tubui amai Rubɛ̃ɛ ŋau mbɛ si bɛi nyaanze nŋa ŋa à to, ilu nla ŋau do ilɛɛko nŋa ŋa.

²⁴ Moizi í na dimii Gadi ŋau mɔ ilɛ ŋa si bɛi nyaanze nŋa ŋa à to.

²⁵ Ilɛ iyi í na ŋau wee. Yazɛɛ do ilu nlai Galaadi ŋau fei do bubui ilɛi inɛi Amɔɔ ŋa hee ku bɔ Aroɛɛ tengii Rabau.

²⁶ Aŋai à nɛ má hai Hɛsebɔ̃ɔ hee ku bɔ Ramati-Misipe do Betonimu do hai Mahanaimu hee ku bɔ kɔɔi Debii.

²⁷ Do ikpa lɔɔmai Zuudɛ̃ɛ má aŋai à nɛ ilui Bɛti-Haramu do Bɛti-Nimura do Sukɔtu do Safɔ̃ɔ. Ilu ŋau bɛ mbɔi ilɛi Sioni ilaalui Hɛsebɔ̃ɔi. Idoi Zuudɛ̃ɛui í jɛ kɔɔɛ hee ku bɔ kɔkɔi tenkui Kinerɔti do icei idou ikpa nunui daakɔ.

²⁸ Iyi í jɛ tubui dimii Gadi ŋa mbɛ si bɛi nyaanze nŋa ŋa à to, ilu nla ŋau bɛ do ilɛɛko nŋa ŋa.

²⁹ Moizi í na inɛ bubui dimii Manasee ŋau mɔ ilɛ nŋa si bɛi nyaanze nŋa ŋa à to.

³⁰ Aŋai à nɛ hai Mahanaimu do ilɛi Basãa fei, do ilu ŋa iyi Ɔgu í nɛ si bommaɛ fei hee do ilɛɛkoi Yaii ŋa iyi à wa si Basãa fei. Ilu nŋa fei sãa sãa í dede kita.

³¹ Bubui ilɛi Galaadi, tɔkui Makii ŋai à na. Makiiu amai Manaseei wa jɛ. Nɔ à na ŋa Asitarɔti do Ederei má, ilu ŋa iyi à jɛ ti Ɔgu ilaalui Basãau.

³² Yaase bɛi Moizi í ce ikpɛ̃u mbɛ waati iyi í wa si lɔɔmai Moabu do ikpa icei idoi Zuudɛ̃ɛ si tengii Zerikou suusuu do ikpa nunui daakɔ.

³³ Amma kù na dimii Levii ŋa ilɛ kãma. Aɔ̃ Lafɛ̃ɛi inɛi Izirɛli ŋaui í jɛ tubu nŋa si bɛi nŋu takaɛ í tako í sɔ̃ ŋa tã.