Zozue 11 - Bibeli do fee

Igũi Meromu

¹ Waati iyi Yabɛ̃ɛ ilaalui Hasɔɔ í gbɔ bɛi Zozue í jɛ igũ, ŋɔi í bɛ inɛ ŋa bi Zobabu ilaalui Madɔ̃ɔ do bi ilaalui Simirɔ̃ɔ do bi ilaalui Akesafu.

² Nɔ í bɛ inɛ ŋa má bi ilaalu ŋa iyi à wa ikpa awɔ njɛi kpãai inunu si antaii iri kutau, do bi ilaalu ŋa iyi à wa lɔɔmai idoi Zuudɛ̃ɛu do ikpa awɔ cangai kpãai inunui tenkui Kinerɔti do ilu ŋa iyi à wa ilɛ ilɛu, do bi inɛi geetei Dɔɔ ŋa iyi í wa ikpa nunui alɛu.

³ Nɔ à ce anu tɔɔsi do inɛi Kanaã ŋa iyi à wa nunui daakɔ do nunui alɛi idoi Zuudɛ̃ɛu do inɛi Amɔre ŋa do inɛi Hɛti ŋa do inɛi Ferɛzi ŋa do inɛi Zebusi ŋa iyi à wa si iri kuta ŋau do inɛi Hɛvi ŋa iyi à wa ikpa geete iyi à ya kpe Hɛɛmɔɔ si ilɛi Misipa.

^4-5 Ŋɔi ilaalui ilu ŋau bɛ fei sãa sãa à ce adako kɔkɔi idoi Meromu ku ba a koo a ba inɛi Izirɛli ŋa ku ja. Ŋɔi aŋa fei à dasi kpãa do sooge nŋa ŋa à koo à buba kɔkɔi idoi Meromuu. Inɛ ŋau à kpɔi bɛi sãai itĩi tenku, nɔ à nɛ acĩ ŋa do sarɛtii igũ ŋa nkpɔ nkpɔ.

⁶ Ŋɔi Aɔ̃ Lafɛ̃ɛ í sɔ̃ Zozue í ni, maà ce njo nŋa, domi ala zaka bii à wau ihɛ̃ an daaɛ aŋa fei si awɔ nɔ inɛi Izirɛli ŋa a kpa ŋa. Si anyii nŋu aa bu kɔbisii acĩ nŋa ŋaui nɔ i jo sarɛtii igũ nŋa ŋau.

⁷ Ŋɔi Zozue do soogeɛ ŋa fei à koo à boe inɛ ŋau kɔkɔi idoi Meromuu nɔ à sɛi à lɔ si ŋa do saasa.

⁸ Nɔ Aɔ̃ Lafɛ̃ɛ í daa inɛi Izirɛli ŋa inɛ ŋau si awɔ, à kãmia ŋa nɔ à lele ŋa hee Sidɔ̃ɔ ilu nlau, nɔ à bɔ hee Misirefɔti-Maimu, nɔ à lele ŋa má à bɔ ikpa nunui daakɔ hee ku bɔ ikpa lɔɔmai Misipa, nɔ à kpa ŋa a kù jɔ̀ baa inɛ akã kù fita si.

⁹ Nɔ Zozue í ce nŋa bɛi Aɔ̃ Lafɛ̃ɛ í sɔ̃ɔu, í bu kɔbisii acĩ nŋa ŋau nɔ í jo sarɛtii igũ nŋa ŋa.

Ilui Hasɔɔ ku mu

^10-11 Ŋɔi Zozue í sinda wa baa nɔ hee ku maa to wa asɔ nŋau í yaa í jɛ ilui Hasɔɔ igũ. Tako wo Hasɔɔu nŋui í jɛ ilu nla si bomma ŋau fei. Nɔ Zozue í kpa ilaaluu do inɛi iluɛ ŋa fei, nɔ nkãma kù gbe iyi wa mi si hunde, nɔ í jo iluu mɔ.

¹² Zozue í gba ilui Hasɔɔu do ilu ŋa iyi à wa amɛɛ bɛ fei do ilaalu nŋa ŋa, nɔ í jɔ̀ à kpa aŋa fei, bɛi Moizi woo ce icɛi Aɔ̃ Lafɛ̃ɛ í tako í fɔu.

¹³ Amma inɛi Izirɛli ŋau a kù jo ilu ŋa iyi à wa si antaii geete ŋau baa akã, í gbe Hasɔɔ nŋu akã iyi Zozue í jo.

¹⁴ Inɛi Izirɛli ŋa à so amani ŋa do mɛɛmu ŋa iyi à ba si ilu ŋau, amma amanɛ ŋau à kpa ŋai fei sãa sãa a kù jɔ̀ inɛ kãma.

¹⁵ Moizi í tako í na Zozue wooda ŋa iyi Aɔ̃ Lafɛ̃ɛ í naa si idei igũ ŋau, nɔ Zozue kù ce si ideu atafii.

Zozue í jɛ ilu ŋa iyi à gbe igũ

¹⁶ Bɛɛbɛi Zozue í gba ilɛu fei, hai ilu ŋa iyi à wa iri kuta ŋau do ilu ŋa iyi à wa ikpa awɔ cangai kpãai inunu do ilɛi Gosɛni fei hee ku bɔ ilu ŋa iyi à wa itĩi tenkuu, do si lɔɔmai Zuudɛ̃ɛu hee do ilu ŋa iyi à wa si iri kuta ŋa do lɔɔma nŋa ŋau ikpa awɔ njɛi kpãai inunu.

¹⁷ Í gba ilɛu feii hai bi iri kuta bii nkãma ci ya fita iyi í sinti hai Seiiu hee ku bɔ Baali-Gadi iyi í wa si lɔɔmai Libãa ikpa bi isɛi iri kutai Hɛɛmɔɔu. Í mu ilaalu nŋa ŋau fei í kpa ŋa.

¹⁸ Igũ iyi Zozue do ilaalu ŋau à ce í sɔ ntɔ ntɔ.

¹⁹ Ilu kãma kù dĩ akabuui laakai ku sũ do inɛi Izirɛli ŋa, í gbe inɛi Hɛvi ŋa iyi à wa ilui Gabaɔ̃ɔ aŋa akã. Inɛ ŋa iyi à gbe fei si igũi à mu ŋa.

²⁰ Aɔ̃ Lafɛ̃ɛ takaɛi í lele idɔi inɛ ŋau í jɔ̀ à waa ba inɛi Izirɛli ŋa igũ ku ja ku ba inɛi Izirɛli ŋau a kpa ŋa fei sãa sãa a maà ce araare nŋa si bɛi Aɔ̃ Lafɛ̃ɛ í tako í sɔ̃ Moizi wo.

²¹ Si waati bɛɛbɛi Zozue í nyi í dasi kpãa má, nɔ í koo í kpa inɛi Anaku ŋa iyi à wa bi iri kutai Eborɔ̃ɔu do Debii do Anabu do ilu ŋa iyi à wa ikpa iri kuta ŋa si ilɛi Zudaa do si ilɛi Izirɛli fei. Zozue í kpa aŋa fei nɔ í lɛgɛ ilu nŋa ŋau fei.

²² Inɛi Anaku gɔ kù wa si ilɛi inɛi Izirɛli ŋa má, í gbe si ilui Gaza do Gati do Asidodi aŋa akã.

²³ Bɛɛbɛi Zozue í gba ilɛu fei, si bɛi Aɔ̃ Lafɛ̃ɛ í na Moizi woodaɛ, nɔ í kpɛ̃a inɛi Izirɛli ŋa si dimi ikã ikã ŋau fei. Ŋɔi inɛ ŋau à bɛi à sĩmiò igũ ŋau.