Zozue 10 - Bibeli do fee

À kãmia ilaalui inɛi Amɔre ŋa

¹ Adoni-Sedɛki ilaalui Zeruzalɛmu í gbɔ iyi Zozue í kãmia ilui Ai nɔ í lɛgɛɛ fei mam mam, nɔ í cea iluu do ilaaluɛ feii bɛi í cea ilui Zeriko do ilaaluɛ fei. Nɔ í gbɔ má iyi inɛi Gabaɔ̃ɔ ŋa à ce anu akã do inɛi Izirɛli ŋa, nɔ aŋaò ŋa fei à wa inya akã.

² Laabaaui ideu í jɔ̀ njo í muu ntɔ ntɔ. Njo í muui si na iyi í jɔ̀ Gabaɔ̃ɔ ilu nla nlai bɛi ilu ŋa iyi à nɛ ilaalu. Nɔ mɔm í la í re baa Ai, nɔ soogeɛ ŋa fei kaasãanɛ ŋai.

³ Ŋɔi Adoni-Sedɛki ilaalui Zeruzalɛmuu í ni a koo a kpea nŋu Hohami ilaalui Eborɔ̃ɔ wa, do Pirami ilaalui Yamuti do Yafia ilaalui Lakisi, do Debii ilaalui Egolɔ̃ɔ.

⁴ Í ni a koo a kpe ŋa wai ku ba a naa a ba nŋu ilui Gabaɔ̃ɔ ku jɛ igũ, domi inɛi ilu bɛ ŋa à ce anu akã do Zozue do inɛi Izirɛli ŋau.

⁵ Si bɛɛbɛ ŋɔi ilaalui inɛi Amɔre ŋau à tɔtɔɔ aŋa miiu. Ilaalui Zeruzalɛmu do ti Eborɔ̃ɔ do ti Yamuti do ti Lakisi do ti Egolɔ̃ɔ à tɔtɔɔ à nɛ do sooge nŋa ŋa fei, nɔ à koo à ce asɔ kɔkɔi Gabaɔ̃ɔ ku ba à lɔ si ŋa.

⁶ Ŋɔi inɛi Gabaɔ̃ɔ ŋau à bɛ ama ku bɔ Giligali koo sɔ̃ Zozue ku ni, maà fũsi awa woo ce icɛɛ ŋa awɔ. Naa wa gbãa gbãa i na i faaba wa domi ilaalui inɛi Amɔre ŋa iyi à wa si antaii iri kutau fei à tɔtɔɔ si wa wa.

⁷ Ŋɔi gbakã Zozue í dede hai Giligali do soogeɛ ŋa do inɛ ŋa iyi à jɛ sooge ilu wɔɔkɔɛ ŋau fei à waa koo.

⁸ Nɔ Aɔ̃ Lafɛ̃ɛ í sɔ̃ɔ í ni, maà ce njo nŋa, domi an daaɛ aŋa fei si awɔɛ, nɔ kãma nŋa kaa yɔkɔ ku leekĩ si wajuɛ.

⁹ Ŋɔi Zozue í koo í boe ŋa anu akã. Idũi í dede hai Giligali hee inya wa bɔ ku má í bɛi í to si ŋa.

¹⁰ Ŋɔi Aɔ̃ Lafɛ̃ɛ í jɔ̀ njo í mu inɛ ŋau nɔ à waa saa inɛi Izirɛli ŋau nɔ inɛi Izirɛli ŋau à kãmia ŋa ntɔ ntɔ kɔkɔi Gabaɔ̃ɔ nɔ à lele ŋa à nɛò ŋa hee kpãa iyi wa bɔ ikpa Bɛti-Horɔ̃ɔ. Nɔ à koo à jɛ ŋa igũ hee ilui Azeka do Makeda.

¹¹ Si bɛi à waa saa inɛi Izirɛli ŋau nɔ à to hee si lɔɔmai Bɛti-Horɔ̃ɔ, ŋɔi Aɔ̃ Lafɛ̃ɛ í jɔ̀ kutai ijĩ nla gɔ ŋa à waa cuku si ŋa wa hai lele hee à koo à toò Azeka nɔ à kukuku. Inɛ ŋa iyi kutai ijĩu í kpa à kpɔ à re inɛ ŋa iyi inɛi Izirɛli ŋa à kpa do taakuba.

¹² Ajɔ iyi Aɔ̃ Lafɛ̃ɛ í daa inɛi Izirɛli ŋa inɛi Amɔre ŋau si awɔ, ŋɔi Zozue wa tɔɔ Aɔ̃ Lafɛ̃ɛ si wajui inɛi Izirɛli ŋau í ni ku jɔ̀ inunu ku leekĩ si tengii Gabaɔ̃ɔ nɔ í ni cukpa mɔ ku leekĩ si tengii lɔɔmai Ayalɔ̃ɔu.

¹³ Ŋɔi inunu do cukpa à leekĩ hee í koo í to inɛi Izirɛli ŋau à jɛ mbɛɛ nŋa ŋau igũ. Ajɔ nŋu inunu í ce ajɔ akã kù lɔ. Mà a kù kɔɔ si tia iyi à ya kpe tiai inɛ dee deeu ba.

¹⁴ Ajɔ kãma kù yɛ bɛi ajɔ nŋu bɛ hai tako hee do nsɛi fei bii Aɔ̃ Lafɛ̃ɛ í ce bɛi amanɛ í tɔɔɛ. Aɔ̃ Lafɛ̃ɛ takaɛi wa jaa inɛi Izirɛli ŋau.

¹⁵ Si anyii nŋu nɔ Zozue do inɛi Izirɛli ŋau fei à nyi Giligali asɔ nŋa.

Zozue í jɔ̀ à kpa ilaalu miiu ŋau

¹⁶ Ilaalu miiu ŋau à sa à koo à manji Makeda si isai kuta gɔ.

¹⁷ Ŋɔi à koo à sɔ̃ Zozue à ni, ilaalu miiu ŋau à koo à manji Makeda si isai kuta gɔ.

¹⁸ Ŋɔi Zozue í sɔ̃ inɛɛ ŋa í ni, i koo i tale kuta nla ŋa i biiò andɛi isau nɔ i jɔ̀ inɛ ŋa a maa degbe ŋa ŋa.

¹⁹ Amma iŋɛ taka nŋɛ i maà leekĩ i kpɛ bɛ ŋa. I lele mbɛɛ nŋɛ ŋau, nɔ i mu ŋa do anyi ŋa. I maà jɔ̀ a lɔ inɔ ilu nŋa ŋa, domi Aɔ̃ Lafɛ̃ɛ nŋɛ í dasi ŋa si awɔ nŋɛi.

²⁰ Ŋɔi Zozue do inɛi Izirɛli ŋau à jɛ mbɛɛ nŋa ŋau igũ à kãmia ŋa à kpa ŋa fei, í gbe inɛ gɔ ŋa iyi à ba à sa à nɛ ikpa ilu ku nɛ gbugbã ŋau.

²¹ Nɔ inɛi Izirɛli ŋau fei à sinda à baa bi Zozue kɔkɔi Makeda bɛ baani. Si anyii nŋu inɛ kãma kù jɛ ku dɔ̃ nŋa ide gɔ má.

²² Ŋɔi Zozue í ni, i koo i cĩ anui isau ŋa, i fitaò ilaalu miiu ŋau wa ŋa nɔ i gbã ŋa i naaò ŋa wa bi tom ihɛ̃ ŋa.

²³ Nɔ à ce bɛi í fɔu, à koo à nya ilaalui Zeruzalɛmu do ti Eborɔ̃ɔ do ti Yamuti do ti Lakisi do ti Egolɔ̃ɔu hai si isai kutau à gbã ŋa à naaò ŋa wa bi tɛɛ.

²⁴ Iyi à gbã ŋa à naaò ŋa wa bi Zozue, ŋɔi Zozue í kpe inɛi Izirɛli ŋau fei nɔ í sɔ̃ inɛ ngboi igũ ŋa iyi aŋaò ŋa à ce isɛɛnɛu í ni, i sɛkɛɛ wa ŋa, i lesi kutɛ nŋɛ ŋa si kɔ̃ɔi ilaalu ŋau ihɛ̃. Ŋɔi à sɛkɛɛ wa nɔ à lesi kutɛ nŋa ŋa si kɔ̃ɔi inɛ ŋau.

²⁵ Ŋɔi Zozue í sɔ̃ ŋa í ni, i maà ce njo ŋa nɔ i maà jɔ̀ zigi nŋɛ ku da má, i jɔ̀ i nɛ gbugbã nɔ i nɛ wɔɔkɔ ŋa, domi bɛɛbɛi Aɔ̃ Lafɛ̃ɛ á cea mbɛɛ nŋɛ ŋau fei.

²⁶ Si anyiɛ nɔ Zozue í jɔ̀ à kpa ŋa nɔ à kɔa ikui aŋa miiu fei si jĩi ŋa à jɔ̀ ŋa bɛ hee í koo í to alɛ.

²⁷ Iyi í to inunu wa bi ku lɔ, nɔ Zozue í ni a kita ŋa wa hai si antaii jĩi ŋau. Nɔ à kita ŋa à koo à dasi ŋa si inɔ isai kuta bii à tako à koo à manjiu, nɔ à bii andɛi isau do kuta nla nla ŋa, nɔ fei ndɛɛ í wɛɛ baa nnyi.

Zozue í gba ilu ŋa ikpa awɔ cangai kpãai inunu

²⁸ Ajɔ akãu bɛi Zozue í gba ilui Makeda, nɔ í kpa ilaaluu do inɛi iluɛ ŋa fei. Kù jɔ̀ inɛ kãma kù ba kù gbã. Nɔ í cea ilaaluu bɛi í cea ilaalui Zerikou mɔ.

²⁹ Hai Makeda Zozue do inɛi Izirɛli ŋau fei à bɔ Libuna à koo à lɔ si aŋa mɔ.

³⁰ Nɔ Aɔ̃ Lafɛ̃ɛ í jɔ̀ inɛi Izirɛli ŋau à kãmia aŋa mɔ do ilaalu nŋa fei. Nɔ à kpa inɛi ilu ŋau fei a kù jɔ̀ baa inɛ akã, nɔ à cea ilaaluu bɛi à cea ilaalui Zerikou mɔ.

³¹ Hai Libuna Zozue do inɛi Izirɛli ŋau à bɔ Lakisi à koo à buba kɔkɔi iluu nɔ à lɔ si aŋa mɔ.

³² Si ajɔ minjisiaɛ ŋɔi Aɔ̃ Lafɛ̃ɛ í daa inɛi Izirɛli ŋa ilui Lakisi si awɔ. Nɔ à kpa aŋa mɔ a kù jɔ̀ inɛ baa akã. À ce nŋai bɛi à cea inɛi Libuna ŋau.

³³ Ŋɔi Hɔramu ilaalui Gezɛɛ í naa ku sobi inɛi Lakisi ŋa. Nɔ Zozue í kpa nŋu mɔ do inɛɛ ŋa fei, inɛ baa akã kù ba kù fita si.

³⁴ Hai Lakisi bɛ Zozue do inɛi Izirɛli ŋau à bɔ Egolɔ̃ɔ à koo à ce asɔ kɔkɔi iluu nɔ à lɔ si aŋa mɔ.

³⁵ Ajɔ nŋu bɛ mɔi à jɛ ŋa igũ à kpa inɛi ilu ŋau fei bɛi à cea inɛi Lakisi ŋau.

³⁶ Hai Egolɔ̃ɔ Zozue do inɛi Izirɛli ŋau à bɔ hee Eborɔ̃ɔ à koo à lɔ si aŋa mɔ.

³⁷ Nɔ à jɛ ŋa igũ à kpa ilaaluu do inɛɛ ŋa fei, nɔ ilu ŋa mɔ iyi à wa amɛɛ bɛ fei à jɛ ŋa igũ nɔ à kpa aŋa fei. Zozue kù jɔ̀ inɛ baa akã ku fita si. Bɛi í tako í cea ilui Egolɔ̃ɔu, bɛɛbɛi í cea aŋa mɔ. Í kpa ŋai fei mam mam.

³⁸ Si anyiɛ nɔ Zozue do inɛi Izirɛli ŋau à sinda à nyi do anyi à bɔ ikpa Debii à koo à lɔ si aŋa mɔ.

³⁹ Ŋɔi à jɛ aŋa mɔ igũ nɔ à kpa ilaaluu do inɛɛ ŋa hee do ilu ŋa iyi à wa amɛɛ bɛ fei. Nɔ à kpa inɛ ŋau fei a kù jɔ̀ inɛ baa akã. Ŋɔi Zozue í cea inɛi Debii ŋau do ilaalu nŋa fei bɛi í tako í cea inɛi Eborɔ̃ɔ ŋa do bɛi í cea inɛi Libuna ŋau do ilaalu nŋa fei.

⁴⁰ Zozue í jɛ ilɛu fei igũ. Í jɛ ilaalu ŋa iyi à wa si antaii iri kuta ŋau igũ do inɛ ŋa iyi à wa ikpa awɔ cangai kpãai inunu do ikpa bi gbaau, do inɛ ŋa iyi à wa si lɔɔmau hee do inɛ ŋa iyi à wa si fatama ŋa. Ilaalu ŋau fei í jɛ ŋa igũi nɔ í kpa inɛ fei, kù jɔ̀ inɛ kãma kù ba kù fita si. Í kpa andi mii iyi wa mi si hunde fei, si bɛi Aɔ̃ Lafɛ̃ɛi inɛi Izirɛli ŋau í fɔu.

⁴¹ Zozue í jɛ igũ hai Kadɛsi-Baanea ku bɔ Gaza, nɔ í jɛ ilɛi Gosɛni fei igũ hee ku bɔ Gabaɔ̃ɔ.

⁴² Si igũ ku bɔ tuuba akãi Zozue í jɛ ilaalu ŋau bɛ fei igũ nɔ í gba ilɛ nŋa ŋau, domi Aɔ̃ Lafɛ̃ɛi Izirɛli wa sobi inɛi Izirɛli ŋa si igũu.

⁴³ Nɔ Zozue do inɛɛ ŋau fei à sinda à nyi asɔ nŋa Giligali.