Zozue 1 - Bibeli do fee

Zozuei í tɛkɛ si Moizi

¹ Si anyii ikui Moizi woo ce icɛi Aɔ̃ Lafɛ̃ɛu, Aɔ̃ Lafɛ̃ɛ í sɔ̃ Zozue amai Nunu, nŋu iyi wa jɛ woo ce icɛi Moiziu í ni,

² Moizi woo ce icɛm nɔu í ku. Bɛbɛi, dede i kua idoi Zuudɛ̃ɛu awɔ do zamaau ihɛ̃ fei nɔ i lɔ si ilɛ iyi an na inɛi Izirɛli ŋau ŋa.

³ Si ilɛu, tengi bii aa dasi kutɛ nŋɛ fei, an mu nŋɛi ku jɛ tu ŋɛ si bɛi ǹ cea Moizi kuwãɛu.

⁴ Kucĩi ilɛ nŋɛu á sintii hai bi gbaau do ikpa awɔ cangai kpãai inunu hee ku bɔ si iri kutai Libãa ŋau do ikpa awɔ njɛi kpãai inunu. Hai ido nlai Efarata ikpa nunui daakɔ hee ku bɔ Tenku Nlau ikpa nunui alɛ á bɔi hee si ilɛi inɛi Hɛti ŋa.

⁵ Si kuwɛɛɛ fei mbɛɛ kãma kaa yɔkɔ ku kɔ̀ ide si wajuɛ, domi an maa n wɛɛ do awɔi bɛi ǹ tako ǹ wɛɛ do Moizi wo. Ajɔ kãma n kaa n fũsiɛ awɔ hee má jɛ n jɔ̀ɛ.

⁶ Jɔ̀ i nɛ gbugbã nɔ i nɛ wɔɔkɔ, domi awɔi aa jɔ̀ inɛ ŋau a lɔ si ilɛ iyi ǹ fɔ do kugbasi ǹ ni an mua bala nŋa ŋau.

⁷ Iyi í gbeɛ nŋui í jɛ i nɛ gbugbã nɔ i nɛ wɔɔkɔ ntɔ ntɔ, nɔ i maa jirima wooda iyi Moizi woo ce icɛm nɔu í sɔ̃ɛu fei. Maà sinda do ikpa awɔ njɛ walakɔ do ikpa awɔ canga ku ba mii iyi ì waa ce fei ku maa bɔ waju.

⁸ Jɔ̀ i ya cio tiai woodau ihɛ̃ si wajui inɛ ŋa waati kãma fei, nɔ i ya maa muu si iriɛ dasãò idũ ku ba ide iyi à kɔ siu fei i ya maa ceò icɛ, domi do yaase bɛɛbɛi icɛɛ ŋa aa bɔò waju, nɔ fei ndɛɛ á cei dee dee.

⁹ Maà gbɛjɛ iyi ǹ sɔ̃ɛ ǹ ni, jɔ̀ i nɛ wɔɔkɔ nɔ i nɛ gbugbã. Maà jɔ̀ njo ku muɛ, nɔ i maà ti i mɔngɔ munya, domi amu Aɔ̃ Lafɛ̃ɛɛ an wɛɛ do awɔ bii ì waa bɔ fei.

Zozue wa ce sɔɔlui idoi Zuudɛ̃ɛ ku kua

¹⁰ Zozue í na inɛ ngboi Izirɛli ŋau wooda í ni,

¹¹ i dabii si asɔu fei ŋa i sɔ̃ inɛ ŋa i ni a ce sɔɔlui mii ku jɛ domi si afei ajɔ mɛɛta aa ka kua idoi Zuudɛ̃ɛu kaa gba ilɛ iyi Aɔ̃ Lafɛ̃ɛ nwa í na wau.

¹² Ŋɔi Zozue í sɔ̃ inɛi dimii Rubɛ̃ɛ ŋa do inɛi dimii Gadi ŋa do inɛi dimi bubui Manasee ŋau í ni,

¹³ i ye gigii ide iyi Moizi woo ce icɛi Aɔ̃ Lafɛ̃ɛu í sɔ̃ ŋɛ waati iyi í ni, Aɔ̃ Lafɛ̃ɛ nŋɛ í mu nŋɛ kusĩmi nɔ í na ŋɛ ilɛ iyi í wa ikpa nunui daakɔi idoi Zuudɛ̃ɛu tã.

¹⁴ Na nŋu, i jɔ̀ abo nŋɛ ŋa do ama keeke nŋɛ ŋa do mɛɛmu nŋɛ ŋa a gbe ihɛ̃ si ilɛ iyi Moizi í na ŋɛu, amma iŋɛ fei iŋɛ inɛmɔkɔ kaasãanɛ ŋau, i dede i kua do jĩnɛi igũ nŋɛ ŋa i cuaa inɛ nŋɛ ŋau nɔ i sobi ŋa ŋa,

¹⁵ hee koo to Aɔ̃ Lafɛ̃ɛ nŋɛ ku mua inɛ nŋɛ ŋau mɔ kusĩmi bɛi í mua iŋɛ mɔ, nɔ aŋa mɔ a gba ilɛ iyi Aɔ̃ Lafɛ̃ɛ í mu nŋa bɛi í mua iŋɛ mɔu. Si anyiɛ nɔ i nyi wa i na i buba si ilɛ iyi Moizi í mu nŋɛ kɔkɔi idoi Zuudɛ̃ɛ do ikpa nunui daakɔu.

¹⁶ Ŋɔi à jɛa Zozue à ni, aa ka ce bɛi ì fɔ fei, nɔ bii ì ni ka bɔ fei, aa ka koo.

¹⁷ Aa ka jirimaɛ dee dee bɛi à jirima Moizi. Aɔ̃ Lafɛ̃ɛɛ de ku wɛɛ do awɔ bɛi í wɛɛ do Moizi wo.

¹⁸ Inɛ iyi í dondaɛ í kɔ̀ ku jirima mii iyi ì dasiɛ ku ce fei, aa kpa lafɛ̃ɛi. Awɔ de jɔ̀ i mua araɛ gbugbã nɔ i nɛ wɔɔkɔ.