Zonasi 4 - Bibeli do fee

Zonasi í gbɔ mii iyi í jɔ̀ Ilaaɔ̃ í ce araarei Ninivu

¹ Ŋɔi idɔi Zonasi í kɔ̃ ntɔ ntɔ si mii iyi Ilaaɔ̃ í cea inɛi Ninivu ŋau.

² Nɔ í sɔ̃ Aɔ̃ Lafɛ̃ɛ í ni, mii ŋa iyi ǹ wa n yɛ mbɛ waati iyi ǹ wa ilɛi idem, ŋɔi í jɔ̀ ǹ sa gbãa gbãa ǹ nɛ ikpa Taasi. Ǹ mà iyi awɔ ilu araarei, idɔɛ ci ya saasa ku kɔ̃ nɔ jiida kú jɛɛ í caa, nɔ idei laalɔ iyi ì dasi idɔ i cea amanɛ ì ya kpaa mái.

³ Nsɛi, Aɔ̃ Lafɛ̃ɛ, jɔ̀ n ku, domi í sĩam n ku do iyi an maa n wɛɛ.

⁴ Aɔ̃ Lafɛ̃ɛ í bee Zonasi í ni, ì nɛ ntɔ ì bɛi ì waa ceò dimii idɔɔkɔ̃u bɛ?

⁵ Ŋɔi Zonasi í fita hai ilui Ninivu í bɔ ikpa nunui daakɔ, í koo í gũ kusuɛ bɛ. Bɛi í wa wa degbe ku yɛ mii iyi á na ku ba iluu.

⁶ Aɔ̃ Lafɛ̃ɛ í jɔ̀ jĩi gɔ í fita bɛ kugbokaɛ í re Zonasi, ku ba ku ceaa jĩjĩ, nɔ ku nya lasabu laalɔɛu. Ŋɔi Zonasi í nɛ inɔ didɔ̃ nla nla.

⁷ Amma iyi iju í má daadaakɔu, Ilaaɔ̃ í jɔ̀ koko gɔ í naa ŋɔ jĩi nɔu, nɔ í gbɛ.

⁸ Waati iyi inunu í fita, Ilaaɔ̃ í jɔ̀ fufu kú nɛ inya gbãa gɔ í naa hai nunui daakɔ, nɔ inunuu í cã irii Zonasi hee í jɔ̀ í kua gbugbã, ŋɔi í tɔɔ í ni, á sĩam n ku do iyi an maa n wɛɛ.

⁹ Ŋɔi Ilaaɔ̃ í bee Zonasi í ni, ì nɛ ntɔ mbɛ iyi ì waa ce idɔɔkɔ̃ na jĩi nɔu bɛ? Ŋɔi í jɛa í ni, oo ǹ nɛ ntɔ jiida jiida n ce idɔɔkɔ̃. Na ŋɔi í jɔ̀ ǹ tɔɔ iku mɔm.

¹⁰ Ŋɔi Aɔ̃ Lafɛ̃ɛ í sɔ̃ɔ í ni, i kù ce icɛ kãma gɔ si jĩi nɔu, kù jɛ awɔi ì jɔ̀ í fita, idũ akãi í fita í la nɔ idũ mmuɛ í gbɛ. Wee do nŋu fei, ì waa ce araareɛ.

¹¹ Ninivu ilu nla nlai, nɔ zamaaɛ ŋa à re baa dubu cĩɔ do kɔnfia (120.000) iyi a kù mà jiida do laalɔ ku wũa. Nɔ à nɛ mɛɛmu ŋa nkpɔ nkpɔ. Ŋɔi i kù bi n ce araare nŋa?