Zonasi 3 - Bibeli do fee

Zonasi wa ce waazo Ninivu

¹ Ŋɔi Aɔ̃ Lafɛ̃ɛ í nyi í sɔ̃ Zonasi má í ni,

² dede i bɔ Ninivu ilu nlau, nɔ i sɔ̃ ŋa ide iyi ǹ sɔ̃ɛu.

³ Ŋɔi Zonasi í dede í bɔ Ninivu bɛ si yaase bɛi Aɔ̃ Lafɛ̃ɛ í sɔ̃ɔu. Wee Ninivuu ilu nla nlai iyi í gbe i ce isɛɛnɛ ajɔ mɛɛta i bɛi i kaakoɛ.

⁴ Iyi Zonasi í to í ce isɛɛnɛ ajɔ akã, í wasi ku fɔ hee lele wa ni, si anyii ajɔ ciiji Ninivu á ce nfe.

⁵ Ŋɔi inɛi Ninivu ŋau à dasi Ilaaɔ̃ naanɛ, nɔ à ni aŋa a ce kutɔɔ do anu ku dĩ a dasi jĩnɛi saaki ŋa hai ilu bɛɛrɛ ŋa hee do ilu are ŋa fei aŋa a nyisiò inɔ kufɔi aŋa.

⁶ Ŋɔi iyi ilaalui Ninivu í gbɔ ideu í dede hai si kitãi bommaɛ, í bɔ ibɔɛ, í bii araɛ do saaki nɔ í buba si ilúlu na inɔ kufɔu.

⁷ Nɔ nŋu do inɛi anyiɛ ŋa à jɔ̀ à cã kɛsɛɛdɛ si ilui Ninivu fei, à jilɛ wooda à ni hai amanɛ hee do mɛɛmu ŋa fei a maà jɛ nkãma, nɔ a maà mɔ baa inyi.

⁸ Amanɛ ŋa do mɛɛmu ŋa fei à dasi jĩnɛi inɔ kufɔ nɔ à dɔ̃ anu si Ilaaɔ̃ do gbugbã à tɔɔɛ. Nɔ à ni má, inɛ fei ku jɔ̀ isɛɛnɛ laalɔɛ do daa sãmiɛ ŋa iyi wa ce wo.

⁹ Á yɔkɔ ku jɛ Ilaaɔ̃ á kpaasi idɔ, nɔ idɔɔkɔ̃ɛ á sũ kaa ce nfe nwa má.

¹⁰ Ilaaɔ̃ í yɛ iyi inɛi Ninivu ŋau à kpaasi idɔ, à jɔ̀ laalɔ nŋa ŋau, ŋɔi í kpaasi lasabu, nɔ kù ce nŋa laalɔ iyi í dasi idɔ nŋu ku ce nŋau má.