Zonasi 2 - Bibeli do fee

Kutɔɔi Zonasi

¹ Aɔ̃ Lafɛ̃ɛ í jɔ̀ cɛ̃ɛ nla gɔ í naa í mi Zonasi. Nɔ í ce ajɔ mɛɛta do idũ mɛɛta si inɔi cɛ̃ɛu.

² Hai si inɔi cɛ̃ɛu bɛi Zonasi í tɔɔ Aɔ̃ Lafɛ̃ɛ, í ni,

³ Aɔ̃ Lafɛ̃ɛ, waati iyi ǹ wa si inɔ kufɔ, ǹ kpeɛ, nɔ ì jɛɛm. Hai bi kuwai iku ŋa ǹ kpeɛ nɔ ì gbɔ imum.

⁴ Ì nyɔm hee si lɛlɛi tenku, nɔ acãi inyi í kaakom, nɔ kutãngãm dii inyiu í mim.

⁵ Nɔ ǹ fɔ ǹ wa n ni, ì lelem hai si wajuɛ ǹ bɔ hee jĩijĩ. Amma do nŋu fei an nyi n yɛ kpasɛ̃ kumáɛu má.

⁶ Inyi í mim hee si gbangɔlɔ nɔ fɔfɔ ŋa iyi à wa inɔi inyiu à bibii si aram hee do si irim fei.

⁷ Ǹ kita hee lɛlɛi kɔɔi tenku hai bii iri kuta ŋa à sinti, nɔ gamboɛ ŋa à sɔkɔ sim dim dim, amma Aɔ̃ Lafɛ̃ɛm, awɔi ì nyam hai bɛ do ami.

⁸ Waati iyi hundem wa bi ku da ǹ ye gigiɛ awɔ Aɔ̃ Lafɛ̃ɛ, nɔ kutɔɔm í to hee si kpasɛ̃ kumáɛu.

⁹ Inɛ ŋa iyi à waa tɔɔ iwɛ̃ ŋa aa kua didɔ̃i Aɔ̃ Lafɛ̃ɛi.

¹⁰ Amma amu an ceɛ kuwee, an saabuɛ, an kɔ̃ kuwã ŋa iyi ǹ ceɛu, domi Aɔ̃ Lafɛ̃ɛ, awɔ akãi ì ya faaba amanɛ.

¹¹ Waati bɛɛbɛ Aɔ̃ Lafɛ̃ɛ í sɔ̃ cɛ̃ɛu í ni koo kpɔ Zonasi si ilɛ ngbɛ, nɔ cɛ̃ɛu í koo í kpɔɔ.