Zonasi 1 - Bibeli do fee

Zonasi í dasi idɔ ku saa Aɔ̃ Lafɛ̃ɛ ku jĩ

¹ Ajɔ nŋu gɔ Aɔ̃ Lafɛ̃ɛ í ba Zonasi amai Amitai ide ku fɔ í ni,

² dede i bɔ Ninivu ilu nlau, i sɔ̃ inɛɛ ŋau wahala iyi á na ku ba ŋa, domi ǹ yɛ laalɔ ku ce nŋa í la í caa.

³ Amma Zonasi í dasi idɔ nŋu ku saa Aɔ̃ Lafɛ̃ɛ nŋu ku nɛ ikpa Taasi. Si bɛɛbɛi í bɔ Zopee nɔ í ba akɔi inyi gɔ iyi wa bɔ ikpa Taasi. Ŋɔi Zonasi í sã fia nɔ í lɔ akɔu do zamaau ajɔ à waa nɛ Taasi.

⁴ Amma Aɔ̃ Lafɛ̃ɛ í jɔ̀ fufu nla gɔ í dede si tenkuu. Fufuu wa ce do gbugbã hee akɔu wa bi ku lɛgɛ.

⁵ Ŋɔi zigii woo mu akɔi inyi ŋau í da nɔ inɛ fei wa dɔ̃ anu si iwɛ̃ɛ. Nɔ à wasi aso nŋa ŋa ku nyɔ si inɔ inyiu ku ba a kaye kuwoi akɔu. Amma waati bɛɛbɛ fei, Zonasi í kita hee lɛlɛi akɔi inyiu í koo wa sĩ njoo mam mam.

⁶ Ŋɔi waakɔu í sɛkɛɛ si Zonasi nɔ í beeɛ í ni, naa mii í ce ì waa sĩ njoo, dede i dɔ̃ anu si iwɛ̃ɛ. Á yɔkɔ ku jɛ iwɛ̃ɛu á ce araare nwa nɔ a kaa ka ku má.

⁷ Ŋɔi woo mu akɔ ŋau à waa fɔ si njɛ à ni, i naa wa káa ta kpasa ku ba ka mà na irii inɛ iyi í jɔ̀ laalɔu ihɛ̃ í ba wa. Iyi à ta kpasau ŋɔi kpasau í so Zonasi.

⁸ Ŋɔi à beeɛ à ni, jɔ̀ ka mà inɛ iyi í naa nwa laalɔu ihɛ̃ wa. Hai iwoi ì waa naa, bɛirei à ya kpeɛ, dimi yoomai ì jɛ, yoomai í jɛ icɛɛ.

⁹ Nɔ Zonasi í jɛ nŋa í ni, amu Ebɛɛi. Aɔ̃ Lafɛ̃ɛ, Ilaaɔ̃ iyi í wa lele, nŋu iyi í taka tenku do ilɛi, ǹ ya n tɔɔ.

¹⁰ Ŋɔi zigii inɛ ŋau í da ntɔ ntɔ si bɛi à gbɔ iyi Aɔ̃ Lafɛ̃ɛi wa saa, domi bɛɛbɛi í sɔ̃ ŋa. Ŋɔi à ni, na mii í jɔ̀ ì ce bɛɛbɛ.

¹¹ Nɔ à beeɛ à ni, bɛirei aa ka ceɛ ku ba inyiu ku dɛ na iri nwa. À waa ni bɛɛbɛ domi inyiu í gũ lele wa koo.

¹² Ŋɔi í jɛ nŋa í ni, i so i nyɔm si inɔ tenkuu ŋa. Waati bɛɛbɛ inyiu á dɛ, domi ǹ mà na irim nii fufu nlau ihɛ̃ í dede.

¹³ Woo mu akɔi inyi ŋau à ce kookaai fei a ba a to itĩi tenkuu amma a kù yɔkɔ, domi inyiu í gũ lele wa koo.

¹⁴ Ŋɔi à tɔɔ Aɔ̃ Lafɛ̃ɛ à ni, Aɔ̃ Lafɛ̃ɛ, maà ce nfei kuwɛɛ nwa na irii inɛɛu ihɛ̃. Nɔ i maà jɔ̀ ikui inɛ iyi kù ce nwa nkãmau ihɛ̃ ku jɛ idei iri nwa, domi awɔ Aɔ̃ Lafɛ̃ɛ awɔi ì waa ce bɛi ì bi.

¹⁵ Waati iyi inɛ ŋau à so Zonasi à nyɔɔ si inɔ tenkuu, ŋɔi inyiu í coko cau.

¹⁶ Ŋɔi zigii inɛ ŋau í da ntɔ ntɔ si Aɔ̃ Lafɛ̃ɛ nɔ à cea kuwee do kuwã ŋa.