Zoɛli 4 - Bibeli do feeKiitii Ilaaɔ̃ si gãmɛi isɛ mmu ŋa 1 Aɔ̃ Lafɛ̃ɛ í ni, si waati nŋu bɛi an teese kuwɛɛi inɛi Zudaa ŋa do ti inɛi Zeruzalɛmu ŋa. An jɔ̀ kuwɛɛ nŋa ku baa bɛi í tako í wɛɛ wo. 2 An tɔtɔɔ inɛi ilɛ mmu ŋau feii, nɔ n jɔ̀ a bɔò ŋa si lɔɔmai Zozafati. Tengi bɛi an kiiti ŋa na mii ŋa iyi à cea inɛi Izirɛli zamaam ŋau. À fangaa ŋa à jɔ̀ à nɛ ilɛ mmu ŋa à koo à waa jɛ inɛ njoo ŋa, nɔ à kpɛ̃ ilɛm nɔu ndu ŋa. 3 Inɛ ŋau à ta kpasa à kpɛ̃ò zamaam nɔu. À ta ama inɛmɔkɔ ŋa ku ba a ba fia iyi aa sãa inaabo woo ta icu ŋa, nɔ à ta ama inaabo ŋa mɔ ku ba a ba fiai vɛ̃ɛ iyi à mɔ a sã. 4 Iŋɛ inɛi ilui Tii ŋa do iŋɛ inɛi ilui Sidɔ̃ɔ ŋa, hee do iŋɛ inɛi ilɛi Filisi ŋau fei, mii ì waa bi si gãmɛm ŋa. Ì waa bi gbese ku sã sim ŋai? Bii í jɛ bɛɛbɛi ì waa bi ku ce ŋa, an ce ńya ńyai n jɔ̀ mii iyi í nɛ ku ba ŋɛ, ku cuku si ŋɛ wa. 5 Ì so isɔ fũfũ jiidam ŋa do wuram ŋa, do amani ilu bɛɛrɛ kusĩam ŋa ì koo ì dasi inɔ kabai bomma nŋɛ ŋa. 6 Ì mu ama inɛmɔkɔi Zudaa ŋa do ti Zeruzalɛmu ŋa ì taa Gɛrɛki ŋa ku ba a jĩò ilɛ nŋa. 7 Amma amu an baaò ŋa wa hai bii ì ta ŋa ŋau, nɔ mii iyi í nɛ ku ba ŋɛ, an jɔ̀ ku cuku si ŋɛ wai. 8 An so ama inɛmɔkɔ nŋɛ ŋa do ama inaabo nŋɛ ŋa n taa inɛi Zudaa ŋa. Nɔ aŋa mɔ aa so ŋai má a taa inɛi Sabee ŋa iyi ilɛ nŋa í wa hee jĩijĩu. Amu Aɔ̃ Lafɛ̃ɛi ǹ fɔ bɛɛbɛ. Iri ku kpai igũ do kiiti 9 I dɔ̃ anu i sɔ̃ inɛi ilɛ mmu ŋau i ni ŋa, i nya sooge ŋa iyi aa ce igũ ŋa ku ba a ce sɔɔlu. I jĩ sooge kaasãanɛ woo ce igũ nŋɛ ŋau ŋa. Sooge ŋau fei a dede a lɔ si isɛɛnɛ. 10 I so sɔɔkui kaakoi kɛtɛ nŋɛ ŋau i ceò taakuba ŋa. Nɔ i so kɔɔma nŋɛ ŋau mɔ i ceò kaka ŋa. Baa inɛ ŋa iyi à jɛ hai nɛ gbugbã ŋa, a dasi wɔɔkɔ a ni aŋa à jɛ woo ja igũ ŋa. 11 I ce ńya ńya i naa wa ŋa, iŋɛ inɛi ilɛ ŋa iyi ì kaako afeu bɛ. I tɔtɔɔ wa ŋa. Tengi bɛ, Aɔ̃ Lafɛ̃ɛ, jɔ̀ sooge kaasãanɛ woo ja igũɛ ŋau a kita si ŋa wa. 12 Ŋɔi Aɔ̃ Lafɛ̃ɛ í ni, dimi mmu ŋau a ce isɛɛnɛ a naa wa si lɔɔma iyi à ya kpe lɔɔmai Zozafatiu, domi tengi bɛi an buba n kiiti dimi ŋa iyi à buba à kaako tengi bɛu fei. 13 I so kɔɔma i mu ŋa ŋa, domi à jĩa à to ku mu mbɛ. I naa i lɛgɛ ŋa ŋa bɛi à ya cea isoi rezɛ̃ɛ domi tengi bii à ya fɔ̃ɔ siu í kɔ̃. Dangala ŋau à kɔ̃ à caa. Laalɔ ku ce nŋaui í kɔ̃ wa dikã bɛ. 14 Waati bɛɛbɛi zamaa nkpɔ nkpɔ hai nɛ jia gɔ á faata wa si lɔɔma bi ku ce kiitiu, domi ajɔi Aɔ̃ Lafɛ̃ɛu í maai wa si lɔɔma tengi bii á ce kiitiu. 15 Inunu do cukpa à kuku inya, nɔ inya kumái leleaɔ̃ ŋa kù wɛɛ má. 16 Aɔ̃ Lafɛ̃ɛ wa dɔ̃ anu wa hai iri kutai Siɔ̃ɔ. Hai Zeruzalɛmu wa, í jɔ̀ à waa gbɔ imuɛ. Ŋɔi lele do ilɛ à waa yaya. Amma Aɔ̃ Lafɛ̃ɛ wa degbe inɛɛ ŋa. Nŋui í jɛ bi ku manjii inɛi Izirɛli ŋa. 17 [Nɔ Aɔ̃ Lafɛ̃ɛ í sɔ̃ ŋa má í ni,] do yaase bɛɛbɛi aa mà ŋa iyi amui ǹ jɛ Aɔ̃ Lafɛ̃ɛ nŋɛ, nɔ Siɔ̃ɔi ǹ wa si iri kuta iyi à nya ikã í jɛ titom nɔu. Zeruzalɛmu í sisi í jɛ titom nii mam mam. Isɛ mmu kãma kaa lɔ siɛ wa má pai. Ididɔ̃ titɔ̃ ku bai inɛi Ilaaɔ̃ ŋa 18 Si waati nŋu bɛ inyii isoi rezɛ̃ɛ á maa cã wai hai si iri kuta ŋa. Nɔ amɔ mɔ á maa cã wai hai si geete ŋa. Inyi á maa cãi si idoi Zudaa ŋa fei. Inyi á fita wai hai si ijui isɔ̃ gɔ wa hai kpasɛ̃i Aɔ̃ Lafɛ̃ɛ ku maa muaa lɔɔmai Sitimu mandi. 19 Waati bɛɛbɛ, zamaa kãma kaa wa ilɛi Ezibiti má, nɔ ilɛi Edɔmu á baa ku kpɔò bommai, na gbugbã iyi à taa inɛi ilɛi Zudaa ŋa. Inɛi Zudaa ŋau a kù ce taale kãma, amma à kpa ŋa si ilɛ nŋa bɛ. 20-21 Ntɔ ntɔ amui ǹ wa n fɔ iyi a kù ce taale kãma. Nɔ inɛ ŋa aa maa wa Zudaa do Zeruzalɛmui waati kãma fei. Nɔ amu Aɔ̃ Lafɛ̃ɛ, si iri kutai Siɔ̃ɔi an maa n wa. |
2021, SIM International et UEEB