Zoɛli 3 - Bibeli do fee

Aɔ̃ Lafɛ̃ɛ á jɔ̀ hundeɛ ku naa si inɛ fei

¹ Aɔ̃ Lafɛ̃ɛ í ni, si anyiɛ an jɔ̀ hundem ku naa si inɛ fei. Ama inɛmɔkɔ do ama inaabo nŋɛ ŋa aa na a maa ce walii. An ya n maa n ba mɔkɔ ngbo nŋɛ ŋa ide ku fɔ si ala, nɔ awaasũ nŋɛ ŋa mɔ aa ya ce kuyɛ ŋa.

² Baa si woo ce icɛ inɛmɔkɔ ŋa do inaabo nŋɛ ŋa, an jɔ̀ hundem ku naa si ŋa si waati ŋau bɛ.

³ An jɔ̀ mii ŋa iyi i kù nɛ dɔ̃ɔnɛi ku yɛ ŋa a fita si lelei Aɔ̃ do si ilɛ. Aa yɛ njɛ do ina do cua ŋa bɛi kudũi ijĩ.

⁴ Inunu á kpaasii ku baa ku ce ilu kuku. Cukpa mɔ á kpãi bɛi njɛ, hee ajɔi amu Aɔ̃ Lafɛ̃ɛ ku maa to wa. Ajɔu, ajɔ nla nlai á jɛ nɔ á nɛ njo.

⁵ Amma inɛ baa yooma iyi á kpe amu Aɔ̃ Lafɛ̃ɛ fei, á ba faaba, domi si iri kutai Siɔ̃ɔ ilui Zeruzalɛmu, inɛ gɔ ŋa aa ba a fita si wahalau, bɛi amu Aɔ̃ Lafɛ̃ɛ ǹ ce kuwãɛ. Nɔ inɛ ŋa iyi amu Aɔ̃ Lafɛ̃ɛ ǹ kpe, aŋai aa fita si.