Zoɛli 2 - Bibeli do fee

Ajɔi Aɔ̃ Lafɛ̃ɛ í maai wa

¹ I fã kuu si ilui Siɔ̃ɔ ŋa. I dɔ̃ anu ŋa si iri kuta kumám nɔu. Iŋɛ inɛi ilɛ ŋau fei, i yaya ŋa domi ajɔi Aɔ̃ Lafɛ̃ɛ wa naa, nɔ ajɔu í maai wa.

² Ajɔu ajɔi ilu kuku nla nlai. Ajɔu kudũi ijĩi í biiɛ, nɔ ilu kuku nla nlai í ce. Ajɔ nŋu zamaa nla nla ku nɛ gbugbã gɔi á naa bɛi inya kumái amɛɛjuumá iyi í fangaa si antaii iri kuta ŋau. Zamaau a kù yɛ dimiɛ titã, nɔ a kaa yɛ dimiɛ ajɔ kãma má. Nɔ baa tɔku ŋa iyi aa na a dede hee do waju fei, a kaa yɛ dimiɛ ajɔ kãma.

³ Zamaau í yɛi bɛi ina iyi í dede í ce asɔɔ. Inau í ce asɔɔi do wajui inɛ ŋa, nɔ do anyi nŋa inya í gbe ngbɛ. Waati iyi zamaau kù to wa, ilɛu í tako í yɛi bɛi lamboi Edɛni, si anyiɛ, ilɛu í baa í gbɛi bɛi gbaa, inɛ kãma kù gbe si hunde.

⁴ À yɛi bɛi acĩ ku bɔ igũ ŋa. À waa sɛi bɛi masa ŋa iyi à wa si antaii acĩ.

⁵ Bii ì waa gbɔ iba nŋa, aa ni bɛi sarɛti ku ja igũ ŋa iyi à fo hai si iri kuta ihɛ̃ à koo à dingaa si iri kuta ihɔ̃i. Iba nŋau wa dɔ̃i bɛi fɔfɔ ngbɛ iyi wa jo. Iba nŋau í yɛi má bɛi sooge ilu gbugbã ŋa iyi à ce sɔɔlui igũ à tã.

⁶ Bii inɛ ŋa à yɛ ŋa, à ya maa yayai nɔ waju nŋa fei í ya kpaasii.

⁷ À ya sɛii bɛi sooge kaasãanɛ ŋa iyi à waa bɔ igũ ku ce. À ya fo bindi a kuaɛi bɛi woo ce igũ ŋa. Inɛ fei í ya mu kpãaɛi ku maa nɛ. Inɛ kãma ci ya yaa ku jɔ̀ kpãaɛ.

⁸ Inɛ kãma ci ya bitandi inɛi kɔkɔɛ. Inɛ fei í ya maa too kpãaɛi. Aŋa fei à ya sɛi a maa kooi baa bii à waa ta ŋa afa ŋa wa. A ci ya fangaa.

⁹ À ya sɛi si ilu nlau wai nɔ a gũ bindiɛu a maa kua. À ya lɔ inɔ kpasɛ̃ ŋai hai do bi fɛrɛnti ŋau bɛi woo ce ile.

¹⁰ Bii à maai wa, ilɛ í ya maa yayai, nɔ lele mɔ í ya ce bɛi wa cuku wai. Inunu do cukpa à ya kuku inyai, nɔ leleaɔ̃ ŋa mɔ a ci ya má inya má.

¹¹ Aɔ̃ Lafɛ̃ɛ í ya jɔ̀ soogeɛ ŋa a gbɔ imuɛi do waju. Sooge ŋa iyi à waa ceò woodaɛ ŋa icɛ, à kpɔ nɔ à nɛ gbugbã. Ntɔ ntɔ, ajɔi Aɔ̃ Lafɛ̃ɛu, ajɔ kugaabui. Ajɔu í to njo nɔ inɛ kãma kaa yɔkɔ ku fita si.

Waatii bi Aɔ̃ Lafɛ̃ɛ ku baa

¹² Ŋɔi Aɔ̃ Lafɛ̃ɛ í fɔ í ni, bɛbɛi i nyi wa bi titom ŋa do idɔ nŋɛ fei. I dĩ anu ŋa, i kpata ŋa, nɔ i tɔɔm ŋa.

¹³ Waliiu í ni, kù jɛ ibɔ nŋɛ ŋai ì nɛ i ga ŋa. Idɔ nŋɛ ŋai ì nɛ i kpaasi ŋa. Ntɔ ntɔ i nyi wa bi Aɔ̃ Lafɛ̃ɛ nŋɛ, domi Aɔ̃ Lafɛ̃ɛ í jɛ jiida nɔ í nɛ araare. Í nɛ temua, nɔ dee dee ku jɛɛ í la. Sɔɔlui ijuukpã iyi wa cea inɛ ŋa, í ya jɔ̀ɔi.

¹⁴ Á yɔkɔ ku jɛ Aɔ̃ Lafɛ̃ɛ á kpaasi lasabuɛ, nɔ ku jɔ̀ jiida ku jɛɛ ku naa si ŋɛ. Waati bɛɛbɛ, aa yɔkɔ i naaò kuweei iyafũ do ti vɛ̃ɛ wa ŋa.

Waatii anu ku dĩ ku ce do Ilaaɔ̃ ku tɔɔ

¹⁵ I fã kuu si ilui Siɔ̃ɔ ŋa. I jilɛ anu ku dĩ ŋa. I kpe zamaau i ce kutɔtɔɔ nla nla ŋa.

¹⁶ I kpe zamaai iluu i ce kutɔtɔɔ nla nla ŋa. I tɔtɔɔ inɛ ngbo ŋa do ama keeke ŋa, hee do ama ku mɔmɔ ŋa fei. Mɔkɔ titɔ̃ ku fita wa hai inɔ ileɛ, nɔ abo titɔ̃ mɔ ku fita wa hai si ilei acɔɛ.

¹⁷ Woo wee ŋa iyi à waa ce icɛi Aɔ̃ Lafɛ̃ɛ ŋau a kpata si inɔ kpasɛ̃i Aɔ̃ Lafɛ̃ɛu si afei andɛi kpasɛ̃u do bi ku ce kuweeu a maa ni, Aɔ̃ Lafɛ̃ɛ, ce araarei awa inɛɛ ŋau. Maà dasi awa inɛɛ ŋau anyɔ. Maà jɔ̀ isɛ mmu ŋa a yaako wa a maa ni, hee iwoi Ilaaɔ̃ Lafɛ̃ɛ nŋau í wa.

Aɔ̃ Lafɛ̃ɛ í jɛa inɛɛ ŋau

¹⁸ Aɔ̃ Lafɛ̃ɛ í nɛ kubii ilɛɛ ntɔ ntɔ, í nɛ araarei inɛɛ ŋa,

¹⁹ nɔ í jɛ nŋa kutɔɔ nŋau í ni, an mu nŋɛ bilee ŋa, do vɛ̃ɛ do ikpo. An mu nŋɛi hee ku to ŋɛ, nɔ n kaa n so ŋɛ n daa inɛi ilɛ mmu ŋa si awɔ a yaako ŋɛ má.

²⁰ Mbɛɛ nŋɛ ŋa iyi à waa naa hai ikpa awɔ njɛi kpãai inunuu, an lele ŋa a jĩò ŋɛi. Ikpa bi ilɛ ŋa iyi à jɛ gbaa nɔ à gbɛ ŋau bɛi an jɔ̀ a nɛ. Inɛ ŋa iyi à waa cua nŋa ŋau, an jɔ̀ a koo a dasi tenkui nunui daakɔ. Nɔ inɛ ŋa iyi à wa do anyi nŋa ŋau mɔ, a koo a dasi tenkui nunui alɛu. Inunui iku nŋa ŋa á caa, nɔ á fangaai hee ku jɔ̀ inɛ ŋa a maa gbɔ konkombi si fufu. Do yaase bɛɛbɛi inɛ ŋa iyi à ce nŋɛ laalɔ hee í caau fei aa kpaò iri.

²¹ Awɔ ilɛ, maà jɔ̀ njo ku muɛ. Jɔ̀ i wɛɛò inɔ didɔ̃, domi Aɔ̃ Lafɛ̃ɛ wa ce mii nla nla ŋa.

²² Iŋɛ mɛɛmui sako ŋa, i maà jɔ̀ njo ku mu ŋɛ, domi fɔfɔ í nyi wa boogu wa má bi ku jɛ nŋɛ, Jĩi ŋa mɔ à nɛ iso ŋa. Iso ŋa à waa kɔ̃i si jĩi ndii figi ŋa do si jĩi ndii rezɛ̃ɛ ŋa.

²³ Nɔ iŋɛ mɔ inɛi Siɔ̃ɔ ŋa, i jɔ̀ i wɛɛò inɔ didɔ̃ ŋa na irii Aɔ̃ Lafɛ̃ɛ nŋɛ, domi bii atɛ í tɛ, í ya jɔ̀ ijĩ ku naa nŋɛ zaka bɛi ì nɛ bukaataɛ ŋa. Í ya jɔ̀ ijĩu ku naai na iri nŋɛ nkpɔ nkpɔ. Í ya jɔ̀ ijĩi jɛadɔ̃ do ti sɔnkpasa ku naai bɛi í ya maa ce hai tako.

²⁴ Tengi bi ku kpokpo bilee ŋau aa kɔ̃i do bilee, nɔ dangala ŋa mɔ aa kɔ̃i do vɛ̃ɛ do ikpo.

²⁵ Aɔ̃ Lafɛ̃ɛ í ni, an sã nŋɛ si adɔ̃ ŋa iyi kokoo ŋa, do ngootue ŋa, do kpɔɔwɛɛ ŋa, do kɛtɛngbo ŋa à ce asɔɔi amaajɛ nŋɛ ŋau. Mii ŋau bɛi à jɛ bɛi soogem ŋa iyi ǹ jɔ̀ à naa si ŋɛ wo nkpɔ nkpɔ.

²⁶ Aa ya jɛ i yo ŋa, nɔ aa ya kɔ̃ irii i saabu amu Aɔ̃ Lafɛ̃ɛ nŋɛ, amu iyi ǹ ya n ce mii ŋa iyi à ya jɔ̀ i biti ŋa. Nɔ ajɔ kãma, iŋɛ inɛm ŋa i kaa yɛ anyɔ má ŋa.

²⁷ Do yaase bɛɛbɛ, aa mà ŋa iyi amu Aɔ̃ Lafɛ̃ɛ ǹ wa si anini nŋɛ, iŋɛ inɛi Izirɛli ŋa. Nɔ aa mà ŋa iyi Aɔ̃ Lafɛ̃ɛ nŋɛ, amui, nɔ inɛ mmu kãma kù jɛ saam. Nɔ ajɔ kãma, iŋɛ inɛm ŋa i kaa yɛ anyɔ má ŋa.