Zoɛli 1 - Bibeli do fee

¹ Aɔ̃ Lafɛ̃ɛ í ba Zoɛli amai Petuɛli ide ku fɔ.

Kunaai kɛtɛngbo ŋa do agbɛ

² Iŋɛ inɛ ngbo ŋa, i sotĩ i gbɔ ŋa. I sotĩ i gbɔ ŋa iŋɛ iyi ì wa si ilɛu fei. Mii dimi bɛ ihɛ̃ í ce si waati nŋɛ, walakɔ si waatii bala nŋɛ ŋa?

³ I sisia ama nŋɛ ŋa, nɔ ama nŋɛ ŋau mɔ a sisia ama nŋa ŋa, nɔ ama nŋa ŋau mɔ a sisia tɔku ŋa iyi aa na a naa.

⁴ Iyi koko ŋa à jɛ à jɔ̀, ngootue ŋai à na à jɔɔ. Iyi ngootue ŋau mɔ à jɛ à jɔ̀, kpɔɔwɛɛ ŋai à na à jɔɔ. Iyi kpɔɔwɛɛ ŋau mɔ à jɛ à jɔ̀, kɛtɛngbo ŋai à na à jɔɔ.

⁵ I jĩ hai si iri njoo ŋa iŋɛ iyi atɛ̃ wa kpa, nɔ i kpata ŋa. Iŋɛ fei i weewea ŋa, iŋɛ woo mɔ vɛ̃ɛ ŋau, si na iyi í jɔ̀ à nya inyii isoi rezɛ̃ɛu hai si gɛlɛ nŋɛ.

⁶ Ntɔ ntɔ, dimi gɔ í bii si ilɛm wa. Dimiu í nɛ gbugbã, nɔ à kpɔ. À nɛ inyí ŋai bɛi ti muusu nla. Kɛkɛlɛ nŋa í yɛi bɛi ti muusu nla abo.

⁷ Dimiu í ce asɔɔi jĩi ndii rezɛ̃ɛm ŋa, nɔ í da jĩi ndii figi ŋau mam mam. Í ce nfei jĩi ŋaui hee do kpaka nŋa ŋa fei, nɔ í jɔ̀ amaawɔi jĩi ŋau fei à baa à fũuta.

⁸ I weewea ŋa bɛi mudɛ̃ɛ iyi í we saaki bɛi acɔ ku ba ku kpata na mɔkɔ awaasũɛ iyi kù wɛɛ.

⁹ A ci ya naaò kuweei iyafũ ŋa do ti vɛ̃ɛ ŋa wa kpasɛ̃i Aɔ̃ Lafɛ̃ɛ má. Na ŋɔi í jɔ̀ woo weei Aɔ̃ Lafɛ̃ɛ ŋau à wɛɛò inɔ kufɔi iku.

¹⁰ Iko ŋau à ce asɔɔ, ilɛ í wɛɛò inɔ kufɔ bɛi ti iku, domi à ce asɔɔi bilee ŋa, nɔ vɛ̃ɛ mɔ kù wɛɛ má. Ikpo mɔ kù wɛɛ má baa keeke.

¹¹ Inɔi woo logoo ŋau í fɔ, nɔ woo ce icɛi jĩi ndii rezɛ̃ɛ ŋau à wasi ku dɔ̃ anu na bilee do ɔɔzu, domi amaajɛ ŋa iyi à da hai iko ŋau fei à ce nfe.

¹² Jĩi ndii rezɛ̃ɛ í gbɛ, nɔ ti figi ŋau mɔ a kù waa so má. Jĩi ndii gerenadi ŋa do jĩi ndii kpakpa ku nɛ iso wɛwɛɛ ŋau do jĩi ndii pɔmu ŋau fei à gbɛi. Inɔ didɔ̃ fei í leekĩi bi amanɛ ŋa.

À waa sɔ̃ inɛ ŋa a dĩ anu nɔ a tɔɔ Aɔ̃ Lafɛ̃ɛ

¹³ Iŋɛ woo wee ŋa, i dasi ibɔi akũ nɔ i kpata i maa weeweaò ŋa. Iŋɛ iyi ì ya ce kuwee si bi kuweeu, i dɔ̃ anu ŋa. I we saaki i wɔ̀ò njoo iŋɛ woo ce kuweei Ilaaɔ̃ Lafɛ̃ɛm ŋa, domi inɛ ŋa a kù waa naaò kuweei iyafũ ŋa do ti vɛ̃ɛ ŋa wa kpasɛ̃i Ilaaɔ̃ Lafɛ̃ɛ nŋɛ má.

¹⁴ I tɔtɔɔ zamaa nɔ i nya waati i ce anu ku dĩ ŋa. I tɔtɔɔ inɛ ngboi ilu ŋau do zamaai ilɛu fei si kpasɛ̃i Aɔ̃ Lafɛ̃ɛ nŋɛ, nɔ i dɔ̃ siɛ anu ŋa.

Ajɔi Aɔ̃ Lafɛ̃ɛ

¹⁵ Ajɔ kugaabu wa naa. Ajɔi Aɔ̃ Lafɛ̃ɛi. Asɔɔi wa naa ku ce, nɔ Ilaaɔ̃ ilu gbugbã feiui í jilɔɔ bɛɛbɛ.

¹⁶ Inɔ didɔ̃ do ara ku fũ nwa fei í kpa iri hai si kpasɛ̃i Ilaaɔ̃ Lafɛ̃ɛ nwau, domi amaajɛ ŋa iyi à ya ka ceò kuwee ŋau a kù wɛɛ má.

¹⁷ Amaajɛ dimi ŋa à gbɛ si lɛlɛi kanga ŋau. Suu ŋa à gbe ngbɛ, nɔ à lɛgɛ aka nwa ŋau, domi bilee kù wɛɛ má.

¹⁸ Mɛɛmu ŋa à wasi ku wahala. Kɛtɛ gaa ŋa à wasi ku dabii bii fei, domi bi kujɛ kù wɛɛ. Nɔ wahalau í tosi baa angudã ŋa.

Kutɔɔi waliiu

¹⁹ Aɔ̃ Lafɛ̃ɛ, awɔi ǹ wa n dɔ̃ si anu, domi ina í ce nfei bi kujɛi mɛɛmu ŋa si gbaau. Nɔ inau í jo jĩi ndii sako ŋaui fei.

²⁰ Nɔ baa mɛɛmui sako ŋa, bi titɛɛi à sinda waju nŋa wa, domi bi ku mɔ inyi nŋa ŋau fei à gbɛi, nɔ ina í ce nfei bi kujɛ ŋa si gbaau.