Zeremi 8 - Bibeli do fee

¹ Ŋɔi Aɔ̃ Lafɛ̃ɛ í ni, waati bɛɛbɛ aa nya kũkũi ilaalui Zudaa ŋa wa hai si inɔ balɛ nŋa ŋa do ti akawe nŋa ŋa do ti woo wee ŋa do ti walii ŋa do ti inɛi Zeruzalɛmu ŋa.

² Aa tɛ ŋai si inunu do cukpa do leleaɔ̃ ŋa iyi aŋa taka nŋa à bi nɔ à ya maa tɔɔ ŋau. Aŋaò ŋa à nɛ anu akã. À ya maa dɛdɛ ŋa, nɔ à ya maa sɛɛbata si waju nŋa. A kaa tɔtɔɔ kũkũ nŋa ŋau, a kaa si ŋa. Taasii ilɛi aa baa a jɛ.

³ Iku á sĩa ku re kuwɛɛ bi inɛ ŋa iyi aa gbe si zamaa laalɔ iyi an fangaa bii feiu. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.

Kuce iyi inɛ kaa gbɔ yaaseɛ

⁴ Sɔ̃ ŋa i ni, amu Aɔ̃ Lafɛ̃ɛ ǹ ni, bii inɛ í koosɛ í cuku, ci ya dede mái? Bii inɛ í nyɔ, ci ya sinda ku nyi wa mái?

⁵ Na mii í jɔ̀ idɔi zamaai Zeruzalɛmuu ihɛ̃ í le bɛɛbɛ. Si zamba nŋaui à waa leekĩ, a kù kpaasi. A kù jɛ ku sinda ku nyi wa.

⁶ Ǹ de itĩ jiida ǹ wa n gbɔ bɛi à waa fɔ. A kù waa fɔ ide si yaase bɛi í jɔ. Kãma nŋa kù waa kpaasi hai si laalɔ ku ceɛ. Nɔ a ci ya bee ara nŋa a ni, mii ǹ ce. Aŋa fei à ya teese a sɛi a maa koo nŋai bɛi acĩ iyi wa sɛi wa bɔ igũ.

⁷ Baa tilongo ŋa à ya mà waati iyi aŋa aa nɛ ku jɛ inya mmu. Bukaabo ŋa do pɛtui ido ŋa à ya mà waati iyi aŋa aa sinda a nyi. Amma inɛm ŋa a kù mà nkãma si gãmɛi wooda ŋa iyi ǹ jilɛ nŋa.

Ilu laakai ilu ibo ŋa

⁸ Ì waa ni ŋa, à jɛ ilu laakai ŋa, awai à waa mu woodai Aɔ̃ Lafɛ̃ɛ. Nɔ wee inɛ ŋa iyi à waa kɔ woodau inɛ ŋai iyi à nyɔ, nɔ à waa sinda yaasei ideu.

⁹ Ilu laakai ŋau, anyɔi í jɛ tu ŋa. Njo wa mu ŋa, nɔ à dasi taai mbɛɛ. Inɛ ŋau à kɔ̀si idei Aɔ̃ Lafɛ̃ɛ. Bisi nŋau aranfãani yoomai aa ba si.

Inɛ ŋa iyi à waa ni mii fei wa nɛ dee dee

¹⁰ Ŋɔi Aɔ̃ Lafɛ̃ɛ í ni, na nŋu, an na inɛ mmu ŋa abo nŋa ŋa. Nɔ iko nŋa ŋa mɔ, n na inɛ ŋa iyi aa mu ŋa a nɛò ŋau. Bɛɛbɛi an ce nŋa, domi hai inɛ ŋa iyi à kere à re hee ku koo si inɛ ŋa iyi à la à re, aŋa fei kuba nŋai à waa yɔ si iju. Hai walii ŋa hee ku koo si woo wee ŋa, aŋa fei ilu ibo ŋai.

¹¹ A ci ya gbɔa kumɛɛi inɛm ŋau ku ce ncɛɛ. À ya wasi ku ni, mii fei wa nɛ, mii fei wa nɛ jiida jiida. Amma nkãma kù waa ce.

¹² Anyɔ í nɛ ku mu ŋai wo si laalɔ ŋa iyi à ce. Amma kù mu ŋa. A kù mà baa mà aŋa à wa si kurara. Na ŋɔi í ce aa cukui do inɛ ŋa iyi à waa cuku. Ilɛi aa maa tɛɛsɛ waati iyi an kpã ŋa iju. Amu Aɔ̃ Lafɛ̃ɛi ǹ fɔ bɛɛbɛ.

Inɔ kufɔi Aɔ̃ Lafɛ̃ɛ, inɔ kufɔi zamaau

¹³ Aɔ̃ Lafɛ̃ɛ í ni, bii ǹ bi ngɔgɔ ku ka bi tu ŋa, n ci ya n ba isoi rezɛ̃ɛ kãma si jĩi ndii rezɛ̃ɛ. N ci ya n ba isoi figi kãma si jĩi ndii figiu. Wua ŋau à gbɛ fei. Mii iyi ǹ tako ǹ na ŋau à bɛjɛɛ.

¹⁴ Inɛ ŋau à ni, na mii í jɔ̀ à waa buba inya akã ihɛ̃. I tɔtɔɔ wa ŋa nɔ ka koo si ilu ku nɛ gbugbã ŋau kaa ku, domi Aɔ̃ Lafɛ̃ɛ nwa wa kpa wai. Inyi ku nɛ kɔ̃ɔtɛ̃i í jɔ̀ à waa mɔ, si na iyi í jɔ̀ à ce dulum bi titɛɛ.

¹⁵ Kpãai laakai ku sũi à waa cɔ wo, amma nkãma kù wɛɛ iyi í jɛ jiida. À waa degbe waatii iri ku ba amma wee zigiidai í naa.

¹⁶ Mbɛɛ í wa do ikpa Dãa tã, nɔ à waa gbɔ anu ku dɔ̃i acĩɛ ŋa. Anu ku dɔ̃i acĩ ŋau í jɔ̀ ilɛu fei wa yaya. À nɛ à waa naa, à waa ce nfei ilɛu hee do mii iyi í wa si fei, hai iluu hee do inɛi ilu ŋau fei.

¹⁷ Ŋɔi Aɔ̃ Lafɛ̃ɛ í ni, an jɔ̀ njo ku nɛ acĩ ŋa a naa si ŋɛ wa, nɔ i kaa yɔkɔ i ce nŋa nkãma iyi á ganji ŋa a ŋɔ ŋɛ. Aa maa ŋɔ ŋɛi.

Inɔ kufɔi Zeremi

¹⁸ Ǹ bi n yɔkɔ n kua inɔ kufɔ iyi í wa sim. Ntɔ ntɔ ǹ wa n wahala hee si lɛlɛi idɔm.

¹⁹ Nɔ ǹ gbɔ anu ku dɔ̃i inɛm ŋau wa naa hai hee ilɛ jĩijĩ wa. Anu ku dɔ̃u wa ni, Aɔ̃ Lafɛ̃ɛ kù wa Siɔ̃ɔ mái? Ilaaluɛu kù wa si aniniɛ mái? Nɔ Aɔ̃ Lafɛ̃ɛ í ni, na mii í ce à kɔ̃ idɔm do jĩi ndu ŋa ŋa iyi à gbeu, do iwɛ̃i ilɛ mmu ŋa iyi à waa tɔɔ ŋau.

²⁰ Waatii amaajɛ ŋa ku da í lɔ, nɔ sukui inya gbãa í tã, nɔ hee nsɛi a kù ba faaba.

²¹ Ǹ wɛɛò inɔ kufɔ ntɔ ntɔ na wahalai inɛm ŋa. Inɔ kufɔu í to sim nii bɛi inɛ iyi inɛɛ gɔ kù wɛɛ.

²² Ŋɔi ǹ bee aram ide ǹ ni, iwɔi kù wa Galaadi má de, mà lokotoo ŋai a kù wa bɛ. Mà na mii í jɔ̀ inɛm ŋau a kù waa ba iri.

²³ Ntɔ ntɔ bii irim í jɛ inyi wo, walakɔ bii ijum í jɛ isɔ̃ hai bii inyi á maa naa wo, an ya n maa n kpata akũi inɛm ŋaui dasã do idũ fei.