Zeremi 6 - Bibeli do fee

Laalɔ wa naa si Zeruzalɛmu

¹ I sa hai inɔ ilu Zeruzalɛmu ŋa, iŋɛ inɛi Bɛnzamɛɛ ŋa. I fã kuu ilui Tekoa ŋa. I wu nyinda gɔ ilui Bɛti-Kerɛmu ŋa, domi laalɔ wa naa hai do awɔ njɛi kpãai inunu wa do nfe ku ce nla nla.

² Awɔ Siɔ̃ɔ ilu jiida kusĩau, an jɔ̀ a ce nfeɛi.

³ Ilaalu ŋa à waa naa siɛ do sooge nŋa ŋa bɛi woo degbe ŋa do mɛɛmu gaa nŋa. À gũ ilei acɔ nŋa ŋa à kaakoòɛ. Aŋa fei à mu inya nŋa ŋa.

⁴ Ŋɔi à dɔ̃ anu à waa ni, i ce sɔɔlu káa ba ŋa. Ka koo si ŋa zakai dasã í kpã. Irei í gbɔ inɔ kufɔ iyi í jɛ tu wa. Inunu wa lɔ tã. Inya wa kuku wa.

⁵ I dede ka koo siɛ idũ kaa bɛjɛ kpasɛ̃i ilaaluɛ ŋau.

⁶ Aɔ̃ Lafɛ̃ɛi lele do ilɛ í ni, i da jĩi ŋau, i ce bi ku gũò bindii Zeruzalɛmu ŋa. Ilu iyi í nɛ ku yɛ ijuukpãu mbɛ. Gbugbã ku taa inɛ ŋai í wa bɛ.

⁷ Bɛi lɔgɔ í ya maa sɔ̃ inyi wa, bɛɛbɛi inɔ kukãi iluu í ya maa sɔ̃ wa. Wakata iyi wa ce si inɔɛ fei, inɛ ŋa ku taa gbugbã do nfe ku cei. Wahala do ara kuro hai nɛ kɔɔ ŋai ǹ ya n maa n yɛ si wajum.

⁸ Jɔ̀ i gba ikɔ, Zeruzalɛmu, ku ba n maà n jĩòɛ ku ba n maà ce nfeɛ nɔ ilɛɛ ku gbe hai nɛ amanɛ.

Zamaa hai gbɔ ide

⁹ Aɔ̃ Lafɛ̃ɛi lele do ilɛ í ni, aa fengee inɛi Izirɛli ŋa iyi à gbeui bɛi à ya fengee isoi rezɛ̃ɛ. Sisi i lesi awɔ má, bɛi woo ka isoi jĩi ndii rezɛ̃ɛ í ya cea amaawɔɛ ŋa.

¹⁰ Yooi an ba ide ku fɔ, mà yooi an so sɛɛda ku ba a gbɔɔm. Wee a kù lu nŋa itĩ. Nɔ a ci ya ce laakai si ide iyi à waa sɔ̃ ŋa. Idei Aɔ̃ Lafɛ̃ɛ wee í baa í jɛ nŋa idei anyɔ. A ci ya nɛ inɔ didɔ̃ si baa keeke.

¹¹ Idɔm í kɔ̃ bɛi ti Aɔ̃ Lafɛ̃ɛ. N kaa n nɔɔ n gɛɛ má. Nɔ Aɔ̃ Lafɛ̃ɛ í ni, jɔ̀ ku dikã si amu ŋa iyi à wa si kpãa, do si awaasũ ŋa bii à ya tɔtɔɔ. Jɔ̀ ku dikã si inaabo do inɛmɔkɔ do mɔkɔ ngbo do inɛ ŋa iyi à gbo tɔkɔ tɔkɔ.

¹² Kpasɛ̃ nŋa ŋau do iko nŋa ŋa do abo nŋa ŋa aa baa a jɛ ti inɛ mmu ŋai waati iyi an le si inɛi ilɛ ŋau awɔ. Amu Aɔ̃ Lafɛ̃ɛi ǹ fɔ bɛɛbɛ.

¹³ Inɛ ŋau, hai inɛ ŋa iyi à kere à re hee ku koo si inɛ ŋa iyi à la à re, aŋa fei kuba nŋai à waa yɔ si iju. Hai walii hee ku koo si woo wee ŋa, aŋa fei ilu ibo ŋai.

¹⁴ A ci ya gbɔa kumɛɛi inɛm ŋau ku ce ncɛɛ. À ya wasi ku ni, mii fei wa nɛ, mii fei wa nɛ jiida jiida. Amma nkãma kù waa nɛ.

¹⁵ Anyɔ í nɛ ku mu ŋai wo si laalɔ ŋa iyi à ce. Amma kù mu ŋa. A kù mà baa mà aŋa à wa si kurara. Na ŋɔi í ce aa cukui do inɛ ŋa iyi à waa cuku. Ilɛi aa maa tɛɛsɛ waati iyi an kpã ŋa iju. Amu Aɔ̃ Lafɛ̃ɛi ǹ fɔ bɛɛbɛ.

¹⁶ Aɔ̃ Lafɛ̃ɛ í fɔ í ni, i bɔ si kpãa ŋau ŋa, i bee kpãa jiidai tako nŋɛ ŋau, nɔ i tooɛ ŋa. Do yaase bɛɛbɛ, aa nɛ laakai ku sũ ŋa. Amma à jɛ à ni, a kaa ka too si.

¹⁷ Ǹ jilɛ woo degbe ŋa kɔkɔ nŋɛ, ǹ ni, i maa de itĩ ŋa na bii à na à fã kuu. Amma à jɛ à ni, a kaa ka de itĩ.

¹⁸ Na nŋu, iŋɛ dimi ŋa iyi í gbe ŋa i de itĩ i gbɔ ŋa mii iyi á ba inɛm ŋau ŋa.

¹⁹ Iŋɛ inɛi andunya ŋa i sotĩ i gbɔ ŋa. Wee ǹ wa n naaò laalɔ wa si inɛm ŋau ihɛ̃, nŋui á jɛ ribai lasabu laalɔ nŋau domi à kɔ̀ ku gbɔ idem ŋa, à kɔ̀ ku jirima woodam ŋa.

²⁰ Iwoi ǹ nɛò bukaatai tuae iyi wa naa hai Saba, walakɔ jĩi ku dɔ̃ inunui ilɛ jĩijĩ gɔ. N kù bi kuwee nŋɛ ŋa iyi ì ya jo si ina fei sãa sãa ŋau. Kuwee nŋɛ ŋau ci ya dɔ̃ɔm si.

²¹ Na ŋɔi í ce amu Aɔ̃ Lafɛ̃ɛ ǹ ni, wee an jilɛaa zamaau ihɛ̃ kuta ŋa iyi wa gɛɛ. Nɔ si bɛi baa ŋa do amu ŋa do baakɔɔ ŋa do kpaasi ŋa aa kosi isɛ ajɔ, nɔ a ce nfe.

Mbɛɛ wa naa hai do awɔ njɛi kpãai inunu

²² Ŋɔi Aɔ̃ Lafɛ̃ɛ í ni, zamaa gɔ wee wa naa hai do ilɛi awɔ njɛi kpãai inunu. Dimi nla nla gɔi í dede wa hai kɔɔi andunya.

²³ À waa mu bioo do kaka ŋa. Inɛ kugaabu ŋai, nɔ a kù nɛ araare. Imu nŋa í ya maa fĩi bɛi ibai tenku, nɔ si antaii acĩ ŋai à gũ wa. À tã sɔɔlu a ce igũ ajɔ ajɔ do awɔ Siɔ̃ɔ iyi ì yɛ bɛi mudɛ̃ɛ kusĩa.

²⁴ Iyi iba nŋa í ce amɛɛ wa, awa à kua gbugbãi nɔ ara kuro í naa si wa bɛi inaabo iyi wa bi ku bí.

²⁵ I maà fita i bɔ iko ŋa, i maà too si kpãa ŋau ŋa, domi bɛi mbɛɛ í wa do taakubaɛ. Nɔ zigiida í wa bii fei.

²⁶ Iŋɛ inɛm ŋa, i bii ara nŋɛ do saaki nɔ i bimbili si ilulu. I kpata akũ ŋa bɛi inɛ iyi ama inɛmɔkɔ akãɛ í ku, domi woo ce nfeu á faata si wa wa anu akã.

Inɛi Izirɛli ŋa à lelei bɛi isɔ

²⁷ Zeremi, ǹ jilɛɛi i maa cɔ zamaam nɔu, ku ba i cɔ laakai nŋa, i mà ŋa nɔ i mà isɛɛnɛ nŋa.

²⁸ Aŋa fei ilu idɔ kulele ŋai, do woo sɔ irii inɛ ŋa. À lelei bɛi isɔ danya do bɛi isɔ. Aŋa fei woo kpa inɛ ŋai.

²⁹ Ŋɔi à fufu inau. Nɔ inya gbãai inau í jɔ̀ isɔ lolou í yɔ. Amma kookaai iyi à waa ce ku ba isɔ fũfũu ku maaju, ngbɛi. Imii isɔ ŋau a kaa nya.

³⁰ À ya kpe ŋai fia iyi à cé, domi Aɔ̃ Lafɛ̃ɛ í kɔ̀si ŋai.