Zeremi 52 - Bibeli do fee

Nebukanɛsaa í mu Sedesiasi

¹ Adɔ̃ kɔnfia do akãi Sedesiasi í nɛ waati iyi í jɛ bomma, nɔ adɔ̃ maatakãi í ce si bommau Zeruzalɛmu bɛ. Iyeɛi à ya kpe Hamutali. Ama inaaboi Zeremii inɛi Libuna gɔi wa jɛ.

² Sedesiasiu í ce mii iyi kù sĩa si wajui Aɔ̃ Lafɛ̃ɛ bɛi Zoakimu mɔ í tako í ceu.

³ Mii iyi í ba inɛi Zeruzalɛmu do Zudaa ŋau fei í cei si na iyi í jɔ̀ idɔi Aɔ̃ Lafɛ̃ɛ í kɔ̃ si ŋa hee wa bi ku lele ŋa hai si wajuɛ. Nɔ Sedesiasi í na í dedeò ide ku kɔ̀ si gãmɛi Nebukanɛsaa ilaalui Babilɔniu.

⁴ Ŋɔi si adɔ̃ mɛɛsãsiai bomma ku jɛɛu, si ajɔ mɛɛwasiai cukpa mɛɛwasia, Nebukanɛsaa ilaalui Babilɔni í naa igũ si ilui Zeruzalɛmu nŋu do soogeɛ ŋa fei. Ŋɔi à ce asɔ kɔkɔi iluu nɔ à ce bi ku manji ŋa à kaakoɛò.

⁵ À bu iluu koei hee í koo í to adɔ̃ maatakãsiai bomma ku jɛi ilaalu Sedesiasi.

⁶ Ŋɔi ari í naa í caa si iluu, hee sɔnda iyi aa na zamaau ku jɛ kù wɛɛ má. Si ajɔ mɛɛsãsiai cukpa mɛɛsiau,

⁷ inɛi Babilɔni ŋau à lu foo si bindii iluu. Waati iyi idũ í na í dũ, ŋɔi woo ja igũi Zudaa ŋau fei à sa. Baa do iyi inɛi Babilɔni ŋau à kaako iluu fei, inɛ ŋau à fita hai Zeruzalɛmui hai do bi gambo iyi í wa afei idĩ minji iyi í wa kɔkɔi lamboi ilaaluu. Ŋɔi à sa à too do kpãa iyi wa bɔ ikpa lɔɔmai Zuudɛ̃ɛ.

⁸ Amma soogei Babilɔni ŋau à lɔsi Sedesiasi ilaalui Zudaau ku lele, nɔ à koo à baa hee si lɔɔmai Zerikou. Ŋɔi soogeɛ ŋau fei à sa à jɔ̀ɔ.

⁹ Ŋɔi à muu à naaɛ wa Ribula bi ilaalui Babilɔni si ilɛi Amati. Tengi bɛi Nebukanɛsaa í kiitiaa.

¹⁰ Tengi bɛ mɔi à saka amaɛ ŋa si wajuɛ bɛ hee do akawe nlai Zudaa ŋau fei.

¹¹ Si anyiɛ, ŋɔi ilaalui Babilɔniu í jɔ̀ à lɛgɛ njɛi ijui Sedesiasi, nɔ à kpatiɛ dim dim do isɔ nyɔɔyi nkpa, à bɛi à soo à nɛòɛ Babilɔni à koo à dasiɛ ile piisɔ̃ɔ. Bɛi Sedesiasi í wa hee í koo í kuò.

Nebuzaradãai í naa í ce nfei Zeruzalɛmu í tambɔɛ

¹² Ŋɔi si adɔ̃ mɛɛwa do mɛɛsãsiai bomma ku jɛi Nebukanɛsaa, si ajɔ mɛɛwasiai cukpa miiusia, Nebuzaradãa í koo í lɔ inɔ ilui Zeruzalɛmu. Inɛɛu nŋui í jɛ inɛ ngboi woo degbe ilaalu ŋa, nɔ wa jɛ akawei ilaalui Babilɔniu.

¹³ Ŋɔi í jo kpasɛ̃i Aɔ̃ Lafɛ̃ɛu do kpasɛ̃i ilaaluu do ilei Zeruzalɛmu ŋau fei hee do ti ilu jirima ŋau.

¹⁴ Ŋɔi soogei Babilɔni ŋa iyi à wa bi inɛ ngboi woo degbe ŋau à lɛgɛ bindii Zeruzalɛmu ŋau.

¹⁵ Si anyii nŋu, Nebuzaradãa í mu inɛ ŋa iyi à gbe si inɔ iluu. Nɔ si inɔ nŋa, inɛ gɔ ŋa ilu are ŋai, do inɛ gɔ ŋa iyi à so ara nŋa à daa ilaalui Babilɔniu si awɔ, hee do woo ce icɛi awɔ ŋa iyi à gbe ŋau fei.

¹⁶ Amma do nŋu fei í jɔ̀ ilu are gɔ ŋa si ilɛu ku ba a maa logoo iko ŋa do jĩi ndii rezɛ̃ɛ ŋau.

¹⁷ Inɛi Babilɔni ŋau à lɛgɛ sɔbei isɔ nkpa ŋa iyi à wa bi ku lɔi kpasɛ̃i Aɔ̃ Lafɛ̃ɛu hee do sarɛti ŋa, do dangala nla iyi à ce do isɔ nkpa iyi í wa bantumai kpasɛ̃u fei. Nɔ à ko isɔ nkpa ŋau fei à nɛò Babilɔni.

¹⁸ Nɔ à so bii ilúlu a maa nikã do mii ku ko ilúluu do kasɛ ŋau do kɔɔfu ŋau do jĩnɛi isɔ nkpa ŋa iyi à wa si kpasɛ̃i Aɔ̃ Lafɛ̃ɛ à ya maa ceò icɛu fei à nɛò.

¹⁹ Nɔ inɛ ngboi sooge ŋau í nyi í so mii ŋa iyi à ce do wura ŋa do iyi à ce do isɔ fũfũ ŋau fei má. Mii ŋa iyi í so ŋau wee. Pɛrɛnti ŋa, do si bii à ya jo tuae ŋau, do fata si bii à ya dasi njɛu, do mii iyi à ya koò ilúlu ŋau, do bi ku lesi fitila ŋau, do kaato ŋa hee do jĩnɛ mmu ŋa iyi à gbe ŋau.

²⁰ Sɔbe minji ŋau do dangala nlau do sarɛti ŋa iyi Salomɔɔ í jɔ̀ à cea kpasɛ̃i Aɔ̃ Lafɛ̃ɛu wo, à ce ŋai do isɔ nkpa nɔ a kaa yɔkɔ a wã kuwo nŋa.

²¹ Kugbokai sɔbe akã fei í wɛɛi agbãawɔ mɛɛwa do mɛɛjɔ, nɔ à wenwee si ikũ iyi í nɛ agbãawɔ maateeji. Í nɛ iwo si inɔɛ, nɔ sisimaɛ í wɛɛi gɔ̃ɔgɔ̃ɔgindi mɛɛ.

²² Si antaii sɔbe akã fei, à ma fulai isɔ nkpa gɔ à kpaò iriɛ iyi kugbokaɛ í wɛɛ agbãawɔ miiu do bubu. Si itĩɛ nɔ à ce si boodai annya do isoi jĩi ndii gerenadi à kaakoɛò. À ce fei ndɛɛi do isɔ nkpa. Nɔ bɛɛbɛ mɔi à cea sɔbe minjisiau do annyau.

²³ Isoi jĩi ŋa iyi à ce si gonta ŋau à wɛɛi ara cinɛò fɛɛwa do mɛɛfa. Nɔ fei sãa sãa í koo í dedei iso cĩɔ.

²⁴ Nebuzaradãa inɛ ngboi woo degbe kpasɛ̃i ilaalu ŋau í jɔ̀ à mu Seraya woo wee nlau do Sefania atɛkɛsiɛu, do woo wee mɛɛta ŋa iyi à ya maa degbe andɛ bi ku lɔi kpasɛ̃i Aɔ̃ Lafɛ̃ɛu.

²⁵ Si anyii nŋu, nɔ í jɔ̀ à mu akawe gɔ iyi wa jɛ inɛ ngboi sooge ŋau, do inɛ mɛɛjei woo mua ilaalu ikɔ ŋau do inɛi Zudaa ŋa aŋa kita, do woo kɔ tiai inɛ ngboi sooge ŋau. Nŋui í jɛ woo mu inɛ ŋa sooge. Inɛ ŋau bɛ fei Zeruzalɛmu bɛi à tako à wa wo.

²⁶ Nebuzaradãai í gbã ŋa í nɛò ŋa Ribula bi ilaalui Babilɔni.

²⁷ Nɔ tengi bɛi ilaaluu í jɔ̀ à kpa ŋa si ilɛi Amati. Do yaase bɛɛbɛi à mu zamaai Zudaa aru à nɛò ŋa à jĩò ilɛ nŋa.

²⁸ Jiai inɛ ŋa iyi Nebukanɛsaa í jɔ̀ à mu à nɛò ŋau wee. Si adɔ̃ mɛɛjesiau, inɛi Zudaa dubu mɛɛta do kɔnfia do mɛɛtai (3.023).

²⁹ Si adɔ̃ mɛɛwa do mɛɛjɔsiai bomma ku jɛɛ, í jɔ̀ à mu amanɛ cĩɔ mɛɛjɔ do kuntaa do minji (832).

³⁰ Si adɔ̃ kɔnfia do mɛɛtasia, Nebuzaradãa inɛ ngboi woo degbe kpasɛ̃i ilaalu ŋau, í jɔ̀ à nyi à mu inɛi Zudaa ŋa má aŋa cĩɔ mɛɛje do ciiji do miiu (745). Nɔ aŋa fei à koo à dede aŋa dubu mɛɛ do cĩɔ mɛɛfa (4.600).

Ilaalui Babilɔni í cea Zoakɛ̃ɛ jiida

³¹ Si adɔ̃ kuntaa do mɛɛjesiai kumui Zoakɛ̃ɛ ilaalui Zudaaui Evili-Merodaki í jɛ bommai Babilɔni. Si ajɔ kɔnfia do miiusia si cukpa maateejisia si adɔ̃u bɛ, í cea Zoakɛ̃ɛ didɔ̃ í jɔ̀ à nyaa hai piisɔ̃ɔ.

³² Ŋɔi í baa ide ku fɔ do jiida ku jɛ, nɔ í coo ilu bɛɛrɛ í re ilaalu ŋa iyi í mu aru Babilɔni bɛ fei.

³³ Zoakɛ̃ɛ í bɔ jĩnɛ iyi inɛi piisɔ̃ɔ ŋa à ya dasiu, nɔ hai waati bɛɛbɛ aŋaò ilaalui Babilɔniui à ya jɛ si taabuɛ waati kãma fei hee í koo í kuò.

³⁴ Hai waati bɛɛbɛ, ajɔ fei Zoakɛ̃ɛ í ya ba bukaatai mii iyi í nɛi hai bi ilaalui Babilɔniu hee í koo í kuò.