Zeremi 51 - Bibeli do fee

¹ Ŋɔi Aɔ̃ Lafɛ̃ɛ í fɔ má í ni, an jɔ̀ fufu ku ce asɔɔ gɔ ku naa si Babilɔni do si inɛɛ ŋa.

² An jɔ̀ woo fɛ ŋa a naa si Babilɔni a naa a fɔɔ. Inɛ ŋau aa jɔ̀ iluu ku gbe ngbɛi, domi aa bii si iluu wai hai bii fei si ajɔi wahalau.

³ Inɛ iyi wa to bioo, a tosi nŋu mɔ bioo. Inɛ mɔ iyi fufu ku tɔɔɛ í wa si fulai isɔ iyi wa dasi, ku leekĩ. I maà jɔ̀ awaasũ woo ja igũ ŋau ŋa. I kpa irii sooge ŋau fei ŋa.

⁴ Inɛ ŋa aa ba kumɛɛi hee a cuku a maa sũ ilɛi inɛi Kaladee ŋau. Inɛ ŋa iyi aa gũ ŋa a kpa ŋa si igũu, aa cukui si kpãai Babilɔni ŋau bii fei.

⁵ [Bɛɛbɛi á ce,] si na iyi í jɔ̀ Aɔ̃ Lafɛ̃ɛi lele do ilɛ kù fũsi Izirɛli do Zudaa awɔ, baa do iyi à ce kurara nkpɔ nkpɔ si ilɛ nŋau si gãmɛi Inɛ Kumái Izirɛliu.

⁶ I sa i fita hai ilɛi Babilɔni ŋa, nɔ inɛ fei ku saò hundeɛ. I maà jɔ̀ i maa coko ŋa na kuraraɛu, domi waatii gbese ku sãi Aɔ̃ Lafɛ̃ɛ mbɛ. Aɔ̃ Lafɛ̃ɛ á sãa mii iyi í nɛ ku baai.

⁷ Babilɔni í yɛi wo si awɔi Aɔ̃ Lafɛ̃ɛ bɛi kɔɔfui wura si bii atɛ̃ í wa si iyi wa kpa inɛi ilɛ ŋau fei. Inɛi ilɛ ŋau à mɔ atɛ̃ vɛ̃ɛu, na ŋɔi í jɔ̀ ide nŋa kù waa too kpãa má.

⁸ Na ŋɔi í jɔ̀ Babilɔni í cuku anu akã, nɔ í lɛgɛ. I kɔ̃a irii kukpata ŋa, nɔ i dɛ iwɔ i daa si jujuɛ ŋa. Á yɔkɔ ku jɛ á tã mbɛ.

⁹ À waa bi Babilɔni ku ba irii, amma kù ba iri. Debɛi ka fũsiɛ awɔ, nɔ awa fei ka sa ka nɛ ilɛi ide nwa. Ijuukpãɛu í bɔ hee lelei Aɔ̃, nɔ wa lu kudũi ijĩ ŋa.

¹⁰ Aɔ̃ Lafɛ̃ɛ í jɔ̀ dee dee ku jɛ nwa í fita gbugbãa. I naa wa ŋa kaa fɔ idei icɛi Aɔ̃ Lafɛ̃ɛ nwa si ilui Siɔ̃ɔ.

¹¹ Aɔ̃ Lafɛ̃ɛ í nɛ mii iyi wa lelei. Nɔ mii iyi wa leleui í jɛ ku ce nfei Babilɔni. Nŋui wa muaa ilaalui Mɛɛdi ŋau gbugbã á kɔ̃ò mii iyi í dasi idɔ ku ceu. Do yaase bɛɛbɛi wa bi ku sãò gbese. Á sã gbeseui na kpasɛ̃ɛ iyi à nya ikãu. I teese andɛi afa nŋɛ ŋau ku ce ncɛɛ. I kosi afa ŋau si tongo nŋɛ ŋau ku kɔ̃.

¹² Ŋɔi Aɔ̃ Lafɛ̃ɛ í ni, i gũ nyindai igũ ku gbe si bindii inɛi Babilɔni ŋau ŋa. Nɔ inɛ ŋa iyi à jɛ woo degbe ŋau, i kɔ̃ɔsi akpɔ nŋa ŋa. I jilɛ inɛ ŋa iyi aa maa cɔ mà inɛ ŋa à waa naa ŋa. I jilɛ woo kɛɛma inɛ ŋa ŋa. Do yaase bɛɛbɛi Aɔ̃ Lafɛ̃ɛ á kɔ̃ò mii iyi í dasi idɔ iyi í fɔ í ni nŋu á cea inɛi Babilɔni ŋau.

¹³ Babilɔni, awɔ iyi ì wa kɔkɔi itĩi ido nla ŋa, nɔ ì nɛ amani nla nla ŋa, titɛɛ í kpa iri mbɛ, nɔ gũaɛɛ í kɔ̃ mbɛ.

¹⁴ Aɔ̃ Lafɛ̃ɛi lele do ilɛ í ce kugbasi do irii nŋu takaɛ í ni, ntɔ ntɔ, an jɔ̀ zamaa ku naa siɛ bɛi kɛtɛngbo ŋa, nɔ aa dɔ̃ siɛ anui igũ ku jɛi.

¹⁵ Aɔ̃ Lafɛ̃ɛ í ce ilɛi do gbugbãɛ. Í jilɛ andunyaui si kumàɛ nɔ í tɛ lelei do bisiɛ.

¹⁶ Bii í na wooda, inyi í ya tɔtɔɔi lele, nɔ inɛ ŋa à ya yɛ kudũi ijĩ ŋai hee jĩijĩ. Ijĩu í ya maa ŋɔi, nɔ í ya jɔ̀ fufu ku dede wa hai bi kuwɛɛɛ.

¹⁷ Inɛ ŋau fei nnyɛii, a ci ya gbɔ yaasei nkãma. Woo ce icɛi wura ŋau fei, anyɔ í ya baa ku mu ŋai si mii ŋa iyi à ceu, domi iwɛ̃ ŋau ibo ŋai, a kù jɛ ilu hunde ŋa.

¹⁸ Inya ngbɛ ŋai, nɔ dɔ̃anyi ŋai. Aŋa fei aa lɔi waati iyi ijuukpã á to wa.

¹⁹ Lafɛ̃ɛi inɛi Zakɔbu ŋa kù yɛ bɛi aŋa, domi nŋui í taka mii fei. Nɔ dimii Izirɛliu, nŋui í nɔɔ. Iriɛi í jɛ Aɔ̃ Lafɛ̃ɛi lele do ilɛ.

Iri ku kpai Babilɔni

²⁰ Ŋɔi Aɔ̃ Lafɛ̃ɛ í ni, Babilɔni, ì yɛi bi titom bɛi mataaka, do bɛi jĩnɛi igũ ŋa. Awɔi ǹ so ǹ cãò dimi gɔ ŋa, nɔ awɔi ǹ so ǹ ceò nfei bomma ŋa.

²¹ Awɔi ǹ nyi ǹ so má ǹ cãò acĩ do woo gũ acĩu fei, nɔ awɔi ǹ so má ǹ lɛgɛò sarɛtii isɔ do woo gũ sarɛtiu.

²² Awɔi ǹ so ǹ cãò inɛmɔkɔ do inaabo ŋa. Nɔ awɔi ǹ so má ǹ cãò mɔkɔ ngbo do ama keeke ŋa. Awɔi ǹ so ǹ cãò awaasũ ŋa do mudɛ̃ɛ ŋa.

²³ Awɔi ǹ so ǹ cãò woo degbe ŋa do mɛɛmu gaa ŋa. Awɔi ǹ so ǹ cãò woo logoo do kɛtɛ ku logoo ŋa. Awɔi ǹ so ǹ cãò ilu ilɛ ŋa do woo kiiti ŋa.

²⁴ Amma Aɔ̃ Lafɛ̃ɛ í ni, an jɔ̀ inɛi Babilɔni ŋa do inɛi Kaladee ŋau a sã mii ŋa iyi à cea inɛi Siɔ̃ɔ ŋau fei si waju nŋɛ bɛ.

²⁵ Nɔ Aɔ̃ Lafɛ̃ɛ í nyi í ni má, wee ǹ wa n naa siɛ awɔ iri kuta iyi ì jɛ woo ce nfei inɛ ŋa, awɔ iyi ì waa ce nfei ilɛu fei. An tɛ awɔm wa siɛ, nɔ n taleɛ wa hai lelei kuta ŋau, nɔ n jɔ̀ i yɛ bɛi iri kuta iyi í mu ina.

²⁶ Nɔ inɛ kãma kaa ba siɛ kutai gontai ile hee má jɛ kutai icui ile, domi bommai aa baa i jɛ hee do ajɔ fei. Amu Aɔ̃ Lafɛ̃ɛi ǹ fɔ bɛɛbɛ.

²⁷ I kɔa tuuta lele si ilɛu ŋa. I fãa zamaau kuu ŋa. I jɔ̀ zamaa nkpɔ nkpɔ ku dede si inɛi Babilɔni ŋau ŋa. I tɔtɔɔ bommai Ararati ŋa do ti Mini ŋa do ti Asekenazi ŋau a naa si ŋa ŋa. I so inɛ ngboi sooge ŋa nɔ aŋa mɔ a dɛdɛ inɛ ŋa iyi aa naa a koo a jɛ ŋa igũ. I jɔ̀ acĩ ŋa iyi kukpɔ nŋa í jɔ̀ à yɛ bɛi kɛtɛngbo ŋa iyi à yɛ bɛi kudũi ijĩ a koo si ŋa igũ ŋa.

²⁸ I tɔtɔɔ zamaa nkpɔ nkpɔ ku koo si ŋa ŋa, iyi í re mɔm ilaalui Mɛɛdi ŋa do ilu ilɛ nŋa ŋa do inɛ ngboi kukpɛ̃i ilɛ nŋa ŋa hee do ilɛ ŋa iyi à waa gbã fei.

²⁹ Ŋɔi ilɛ í yaya. Í yayai si waati iyi Aɔ̃ Lafɛ̃ɛ wa ce mii iyi í dasi idɔ ku cea Babilɔniu. Í kpaasi ilɛi Babilɔnii í baa í jɛ ilɛ bii amanɛ ŋa a kù wa. Í jɔ̀ ilɛu í baa í kpɔò bomma.

³⁰ Ŋɔi sooge woo ja igũ jiidai Babilɔni ŋau à leekĩò igũu ku ce. Nɔ à sa à koo à waa manji si ile ku nɛ gbugbã ŋa. Wɔɔkɔ nŋau í sa, nɔ à baa à jɔ inaabo ŋa. À lɛgɛ gamboi ilu ŋau, nɔ à jo kpasɛ̃ɛ ŋau.

³¹ Ŋɔi woo bɛ ŋa, hee do woo kooò laabaau ŋau fei, à ya kooi a maa jɔ̀a njɛ akã akã ku ba a koo a sɔ̃ ilaalui Babilɔni baauu a ni à gba iluɛu fei mam mam hai kɔɔ ihɛ̃ hee ku bɔ kɔɔ ihɔ̃.

³² À gba bi ku lɔ nwa ŋau, à jo bindi ku nɛ gbugbã nwa ŋau, nɔ njo í mu sooge nwa ŋau.

³³ Ŋɔi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ í ni, inɔ kufɔi í jɛ ti Babilɔni, domi wee à jojo siɛ bɛi bantuma bi ku kpokpo bilee. Nɔ kù gbe kù waa sɔ má waatii ku mu ku to wa siɛ.

Aɔ̃ Lafɛ̃ɛ í na araɛ ku jaa zamaaɛ

³⁴ Nebukanɛsaa ilaalui Babilɔniu í ŋɔm nii í cɔ̃ɔcɔ̃ɔm. Í jɔ̀m nii bɛi caka ngbɛ. Nɔ í mim nii bɛi akandama. Í mi mii jiida ŋa iyi ǹ tako ǹ nɛu hee caakaɛ í kɔ̃, í bɛi í lelem.

³⁵ Waati bɛɛbɛ, inɛi Zeruzalɛmu ŋau aa maa nii, Babilɔni í ta nwa gbugbã. Bɛbɛi, nŋu mɔ á ba ribai ndɛɛ. Ntɔ ntɔ, inɛi Siɔ̃ɔ ŋau aa maa nii, inɛi Babilɔni ŋa à dikã njɛ nwa, aŋa mɔ aa ba ribai laalɔ ŋa iyi à ce nwau.

³⁶ Ide iyi Aɔ̃ Lafɛ̃ɛ wa sɔ̃ inɛi Zeruzalɛmu ŋau wee. Í ni, amu takam nii an kɔ̀ò ŋɛ, nɔ amui an ja nŋɛ. An jɔ̀ inyii idoi Babilɔni ku gbɛ hee do inyii isɔ̃ɛ ŋa.

³⁷ Nɔ í ni má, an jɔ̀ Babilɔni ku baa ku jɛi bɛi kuta iyi à tɔtɔɔ í ce geete ku jɛ bi kuwai ajaako ŋa do inyai zigiida nɔ ku jɛ dɔ̃anyi. Nɔ inɛ kãma kaa wa si ilɛu má.

³⁸ Nsɛiu ihɛ̃ titã, inɛi Babilɔni ŋau aa maa dɔ̃ anui bɛi ama muusu nla ŋa do bɛi muusu nla saasaabɔ ŋa.

³⁹ Waati iyi kɔdɛɛ nŋa á dede ntɔ ntɔ, waati bɛɛbɛi an ce nŋa sɔnda jiida. Nɔ an jɔ̀ a mɔ atɛ̃i hee ku kpa ŋa. Waati bɛɛbɛ, aa sĩ njooi hee do ajɔ fei, nɔ a kaa dede má ajɔ kãma. Amu Aɔ̃ Lafɛ̃ɛi ǹ fɔ bɛɛbɛ.

⁴⁰ An bɔò ŋa bi ku kpa mɛɛmu ŋai bɛi angudã ŋa, do bɛi angudã kombo do iwo kombo ŋa.

Kukpatai akũ si Babilɔni

⁴¹ Bɛirei à ce à yɔkɔ à kãmia ilui Sesaaki à muu. Bɛirei à ce à yɔkɔ à kãmia ilu iyi inɛi andunya fei wa tɔɔò fufuu. Bɛirei í ce ilɛi Babilɔni í baa í kpɔò bomma si inɔi dimii inɛi andunya ŋa.

⁴² Inyii tenku í naa si Babilɔni nɔ í biiɛ do kutãngãm nkpɔ nkpɔɛ ŋau.

⁴³ Iluɛ ŋau à baa à kpɔò bomma, nɔ ilɛu í baa í jɛ gbaa. Í baa í jɛ ilɛ bii inɛ kãma kù wa si má, nɔ inɛ kãma ci ya too do bɛ.

⁴⁴ Nɔ Aɔ̃ Lafɛ̃ɛ í fɔ má í ni, an naa si Bɛli iwɛ̃i inɛi Babilɔni ŋau, nɔ n jɔ̀ ku kpɔ mii iyi wa miiu. Nɔ inɛi andunya ŋa iyi à ya maa naa bi tɛɛ ŋau, a kaa naa má. Bindii Babilɔniu takaɛ mɔ í cuku.

⁴⁵ Na nŋu, iŋɛ iyi ì jɛ zamaam ŋau, i fita hai si inɔ nŋa, nɔ i saò hunde nŋɛ ŋa. I saa idɔɔkɔ̃ nlai Aɔ̃ Lafɛ̃ɛ ku jĩ ŋa,

⁴⁶ ku ba i maà na i kua gbugbã ŋa nɔ njo ku mu ŋɛ na laabaau ŋa iyi inɛ ŋa aa na a naa nŋɛ wa hai si ilɛu. Inɛ ŋa aa na a maa ce ide ku sisi adɔ̃ɔyi a maa ni, mii iyi ihɛ̃i í ce, si adɔ̃ mmuɛ a ni, mii iyi ihɔ̃i í ce. Nɔ inɔ kukãi í wa si ilɛu. Ilu gbugbã gɔ í na í dedei nɔ í lele ilaalu iyi í wa si bommau í gba agbɛɛ.

⁴⁷ Amma ajɔ wa naa si bii an na n dede si iwɛ̃i inɛi Babilɔni ŋau, nɔ si ilɛu fei anyɔ nla nlai á jɛ. Aa kpa inɛ ŋai si inɔ iluu a maa sũ.

⁴⁸ Waati bɛɛbɛ, ikpa lelei Aɔ̃ do si ilɛ ihɛ̃, aa maa gbɔ anu ku dɔ̃i inɔ didɔ̃i na irii Babilɔni, waati iyi inɛ ŋa iyi aa na a ce nfeɛ ŋau aa maa naa hai do ikpa awɔ njɛi kpãai inunu. Amu Aɔ̃ Lafɛ̃ɛi ǹ fɔ bɛɛbɛ.

⁴⁹ Babilɔni í ce nfei inɛ ŋa si andunya. Bɛbɛi nŋu mɔ á cukui na inɛi Izirɛli ŋa iyi í kpau.

⁵⁰ Iŋɛ iyi ì ba ì fita hai si awɔɛ i kù ku ŋa, i nɛ, i maà leekĩ inya akã ŋa. Hai bɛ, i ce lasabui Aɔ̃ Lafɛ̃ɛ ŋa, nɔ i ye gigii Zeruzalɛmu si idɔ nŋɛ.

⁵¹ Anyɔ nla nlai í tako í mu wa wo waati iyi à gbɔ arabu ŋau, nɔ waju nwa ŋau fei í fɔtɔtɔ waati iyi isɛ mmu ŋau à lɔ hee si ile kumái kpasɛ̃i Aɔ̃ Lafɛ̃ɛ.

⁵² Ŋɔi Aɔ̃ Lafɛ̃ɛ í ni, na nŋu, ajɔ wa naa si bii an naa si iwɛ̃i Babilɔni ŋau, nɔ si ilɛu fei aa maa gbɔ bɛi inɛ ŋa iyi à ba kumɛɛ ŋau à waa kakaa.

⁵³ Baa bii inɛi Babilɔni ŋau aa yɔkɔ a gũ hee lelei Aɔ̃i, nɔ leleu ku jɛ bi ku manji nŋa bɛi a kaa ba a to si ŋa, amui an na wooda nɔ woo ce nfeɛ ŋau a to hee tengi bii í wau.

⁵⁴ Anu ku dɔ̃ nla nlai inɛ ŋa aa maa gbɔ ikpa Babilɔni. Wahala nla nlai á naa si ilɛɛu.

⁵⁵ Aɔ̃ Lafɛ̃ɛ á ce nfei ilɛi Babilɔniui, nɔ anu ku dɔ̃ nla nlaɛ ŋau fei ku leekĩ. Mbɛɛ ŋa aa maa dɔ̃ anui bɛi ibai tenku si kulai ijĩ.

⁵⁶ Woo ce nfeu wa naa siɛ, nɔ í maai siɛ wa. Á lɔ siɛi nɔ ku mu woo ja igũɛ ŋau aru nɔ ku cɛ bioo nŋa ŋau, domi Aɔ̃ Lafɛ̃ɛ í mà gbese ku sã, í ya sãa inɛ feii zaka bɛi í nɛ ku ba.

⁵⁷ Nɔ ilaalu iyi iriɛ í jɛ Aɔ̃ Lafɛ̃ɛi lele do ilɛ í ni má, an jɔ̀ atɛ̃ ku kpa akaweɛ do woo nɛ kumàɛ ŋai, do ilu ilɛɛ ŋa do woo kiitiɛ ŋa do woo ja igũɛ ŋa. Aa sĩ njooi iyi a kaa nɛ ku jĩ má.

⁵⁸ Ŋɔi Aɔ̃ Lafɛ̃ɛi lele do ilɛ í ni má, bindi ku nɛ gbugbãi Babilɔni ŋau fei, aa lɛgɛ ŋai. Gambo kugbokaɛ ŋau fei, inai á na ku jo ŋa. Nɔ waati bɛɛbɛ, icɛ iyi zamaau í ce fei, á baa ku jɛ ngbɛi. Icɛ iyi inɛi ilɛ ŋau à tako à ce à gbɛɛji ŋau fei, ti inai aa baa a jɛ.

Tia iyi à so à nyɔ si inɔ idoi Efarata

^59-60 Seraya iyi wa jɛ ama inɛmɔkɔi Neria, nɔ wa jɛ tɔkui Maaseyai, wa sobi soogei ilaalui Zudaa iyi à ya kpe Sedesiasi. Seraya í si ilaaluu Babilɔni si adɔ̃ mɛɛsiai bomma ku jɛɛ. Wee í ko Zeremi í kɔ si tia iyi à ya kau laalɔ ŋa iyi á na ku ba Babilɔni fei si gãmɛi ideu. Ŋɔi Zeremi í na Seraya wooda í ni,

⁶¹ bii ì na ì to Babilɔni, cio ide ŋau ihɛ̃ hee lele.

⁶² Si anyiɛ, nɔ i fɔ i ni, Aɔ̃ Lafɛ̃ɛ, awɔ takaɛi ì fɔ ì ni aa naa a ce nfei iluu ihɛ̃. Hai amanɛ hee do mɛɛmu ŋa, kãma nŋa kaa gbe si iluu. Á baa ku kpɔò bommai hee do ajɔ fei.

⁶³ Nɔ Zeremi í sɔ̃ Seraya má í ni, bii ì na ì cio tiau ihɛ̃ ì tã, dɛdɛ kuta i dĩ si nɔ i soo i sɔsi aninii idoi Efarata,

⁶⁴ si anyiɛ nɔ i ni, do yaase bɛɛbɛi Babilɔni á mile, nɔ kaa yɔkɔ ku dede má na wahala iyi an jɔ̀ ku naa siɛ. Zamaau fei á gbɛɛjii ntɔ ntɔ. Tengi ihɛ̃i í jɛ kɔɔi ide ŋa iyi Zeremi í fɔ.