Zeremi 50 - Bibeli do fee

Kucukui Babilɔni do ara kunɛi Izirɛli

¹ Ide iyi Aɔ̃ Lafɛ̃ɛ í jɔ̀ walii Zeremi í fɔ si gãmɛi Babilɔni ilɛi inɛi Kaladee ŋa wee.

² Í ni, laabaauu ihɛ̃, i sɔ̃ inɛi ilɛ ŋa. I gũ nyinda ŋa iyi á jɔ̀ inɛ ŋa a màa ŋa. I jɔ̀ inɛ ŋa a gbɔɔ nɔ i maà singa nkãma ŋa. I fɔ ŋa i ni, à mu Babilɔni mbɛ. Anyɔi í baa í jɛ ti iwɛ̃ɛ Bɛli. Nɔ njo í mu iwɛ̃ɛ Maaduku. Anyɔ nla nlai í jɛ ti iwɛ̃i inɛi Babilɔni ŋau, nɔ mii riisiɛ ŋau fei à lɛgɛ.

³ Dimi gɔi í dede wa naa siɛ igũ wa hai do ikpa awɔ njɛi kpãai inunu, nɔ dimiu á lɛgɛ ilɛui hee ku baa ku kpɔò bomma. Inɛ kãma kaa gbe si ilɛu má. Hai amanɛ ŋa hee do mɛɛmu ŋa fei aa sai.

⁴ Aɔ̃ Lafɛ̃ɛ í ni, si ajɔ nŋu ŋau bɛ, do si waatiu bɛ, inɛi Izirɛli ŋa do inɛi Zudaa ŋa, aa nyi wai ajɔ. Aa nɛi a maa kpataò nɔ a maa dɛdɛò Aɔ̃ Lafɛ̃ɛ nŋa.

⁵ Aa maa bee kpãa iyi wa bɔ ikpa Siɔ̃ɔ, nɔ do ikpa bɛi aa sinda a kã iri. Nɔ aa maa ni, i naa wa ka na Aɔ̃ Lafɛ̃ɛ ara nwa, nɔ awaò ŋa ka dĩ akabuu iyi kaa bɛjɛ nɔ kù nɛ ku gbɛjɛ ajɔ kãma.

⁶ Inɛm ŋau à yɛi bɛi angudã ŋa iyi à nyɔ. Woo degbe nŋa ŋaui à jɔ̀ à waa nyɔ, domi aŋai à waa nɛò ŋa do ikpa iri kuta ŋau. À ya maa dabiii si iri kuta ŋa do si geete ŋa, nɔ à ya gbɛjɛ kolo nŋaui.

⁷ Nɔ inɛ ŋa iyi à nɛ à ko ŋa fei, à ya kpa ŋai, nɔ mbɛɛ nŋa ŋa à ya maa ni, awa a kù jɛ ilu taale ŋa, domi aŋai à ce dulum bi Aɔ̃ Lafɛ̃ɛ nŋa, do si tengi bii í jɛ bi kuwai Aɔ̃ Lafɛ̃ɛu. Si Aɔ̃ Lafɛ̃ɛu bɛi kpãa ku cɔi bala nŋa ŋa í wa wo.

⁸ Na nŋu, i sa i fita hai ilɛi Babilɔniu ŋa, nɔ i fita hai si ilɛi inɛi Kaladee ŋau ŋa. I jɔ̀ i jɛ bɛi iwo kombo ŋa iyi à waa jɛ irii mɛɛmu gaa wɛwɛɛ ŋau ŋa.

⁹ Ntɔ ntɔ, amu takam nii an jɔ̀ inɛi ilɛi awɔ njɛi kpãai inunu ŋau a tɔtɔɔ wa nkpɔ nkpɔ si Babilɔni. Inɛ ŋau bɛ, aa ce igũi, nɔ a gba ilɛu. Afà nŋa ŋa kaa ya cuku ngbɛ iyi kù to bii wa bɔ. Aa yɛi bɛi sooge ku mà igũ ku ce ntɔ ntɔ ŋa iyi a ci ya baa awɔ ngbɛ.

¹⁰ Aɔ̃ Lafɛ̃ɛ í ni, inɛ ŋa aa ko amanii ilɛi Babilɔnii. Nɔ inɛ ŋa iyi aa ko amani ŋau, aa kooi zaka bɛi à bi.

¹¹ Amma nsɛi, i wɛɛò inɔ didɔ̃ nɔ i jojo do inɔ didɔ̃ ŋa iŋɛ iyi ì tako ì ce asɔɔi mii iyi í tako í jɛ tubum ŋa wo. Na nŋu, i fo i dingaa bɛi kɛtɛ zãu si inɔ fɔfɔ tũtũ ŋa. Nɔ i dɔ̃ anu bɛi acĩ kombo ŋa.

¹² Iye nŋɛ í wa si anyɔ nla nla. Abo iyi í bí ŋɛu, í kpa irii bɛɛrɛi araɛ. Nsɛi bɛbɛi, ilɛ nŋɛi í baa í jɛ ankãanyi si ilɛu fei. Ilɛu í baa í jɛ gbaa, ilɛ ngbɛ bii nkãma kù wa.

¹³ Na idɔɔkɔ̃i Aɔ̃ Lafɛ̃ɛ, inɛ kãma kaa wa si ilɛu má. Aa lɛgɛɛi fei mam mam. Inɛ iyi wa lɔ kɔkɔi Babilɔni fei, á ya bitii ntɔ ntɔ, nɔ á ya fã fooi na kumɛɛɛ ŋau.

¹⁴ Iŋɛ woo ta afa ŋau fei, i naa i leekĩ do sɔɔlui igũ i kaako Babilɔni nɔ i taa ŋa. I maa jɔ̀ɔ iyi i kù taa ŋa, domi í ce dulum nii bi Aɔ̃ Lafɛ̃ɛ.

¹⁵ I dɔ̃ siɛ anui igũ hai do bii fei ŋa. Nŋu takaɛi á wu awɔɛ ŋa lele ku na araɛ. Ile ku nɛ gbugbãɛ ŋau à cukui, nɔ bindi ŋa iyi à waa jɛ gbugbãɛ ŋau fei à cukui. Waati bɛɛbɛ, Aɔ̃ Lafɛ̃ɛi í dedeò gbese ku sã bɛ. Iŋɛ mɔ i sãa gbese ŋa. I ceaa mii iyi nŋu mɔ í ce ŋa.

¹⁶ Inɛ iyi wa gbɛ̃ do inɛ iyi í so kɔɔma si waati ku mu fei, i nyaa hai Babilɔni ŋa. Bii igũ í na í dede, inɛ fei ku sa ku nɛ ideɛ, inɛ fei ku sa ku nyi ikpa ilɛɛ.

¹⁷ Izirɛli í yɛi bɛi angudã iyi í nyɔ, iyi muusu nla ŋa à lele. Nɔ ilaalui Asirii í jɛ inɛ sinte iyi í ŋɔɔ. Nɔ inɛ ankãanyi iyi í lɛgɛ kũkũɛ ŋai, í jɛ Nebukanɛsaa ilaalui Babilɔni.

¹⁸ Na ŋɔi í jɔ̀ Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í ni, an dede si ilaalui Babilɔni do si ilɛɛu bɛi ǹ tako ǹ cea ilaalui Asiriu.

¹⁹ An jɔ̀ Izirɛli ku nyi aroɛ, nɔ á ba sɔndaɛ ŋa ku jɛ ku yoi si iri kutai Kaamɛli do Basãa ŋa, do si iri kutai Efaraimu do Galaadi ŋa.

²⁰ Nɔ Aɔ̃ Lafɛ̃ɛ í ni, waati bɛɛbɛ, aa dɛdɛ a yɛ kurarai Izirɛli, amma kuraraɛu kaa wɛɛ má. Aa dɛdɛ dulum dii Zudaa, nɔ a kaa ba má, domi inɛ ŋa iyi à gbe ŋau, an ce nŋa suurui.

²¹ Koo si ilɛi inɛi Merataimu ŋa do si ilɛi inɛi Pekɔdu ŋau. Kpã ŋa iju nɔ i ce nfe nŋa mam mam. Bɛi ǹ sɔ̃ɛu fei, ce bɛɛbɛ.

²² Si ilɛu, aa maa gbɔ anu ku dɔ̃i igũ, nɔ asɔɔ nla nla á ce.

²³ Bɛirei iyi ihɛ̃ í ce bɛɛbɛ. Babilɔni í yɛi wo bɛi mataaka iyi wa lɛgɛ ilɛu fei. Nsɛi wee nŋui í baa í lɛgɛ í ce buubuu. Si dimii inɛi andunya ŋa, í baa í jɛ bɛi bomma.

²⁴ Babilɔni, cɛkũm nii ǹ leeɛ, nɔ ì dasi i kù mà mɔm. À yɛɛi nɔ à muɛ si na iyi í jɔ̀ amu Aɔ̃ Lafɛ̃ɛi ì naa ì waa ba ku ja.

²⁵ Ŋɔi Aɔ̃ Lafɛ̃ɛ í cĩ bi ku jilɛ jĩnɛi igũɛ ŋau, nɔ í nya jĩnɛi igũ ŋa wa ku nyisiò idɔɔkɔ̃ɛ. Aɔ̃ Lafɛ̃ɛi lele do ilɛ í nɛ icɛ iyi wa bi ku ce si ilɛi Babilɔni bɛ.

²⁶ I naa wa bi tɛɛ hai do bii fei wa si andunyau, nɔ i cĩ akáɛ ŋa. I jilɛ amaniɛ ŋau ikɔ nkpɔ nkpɔ, nɔ i ce nfeɛ ŋa. I maà jɔ̀ nkãma ku gbe ŋa.

²⁷ I kpa sooge jiida nŋa ŋa fei iyi à yɛ bɛi kɛtɛ kombo ŋa iyi à bɔò ŋa asɔ laga. Inɔ kufɔi á jɛ tu ŋa, domi ajɔ nŋai í to wa bɛ, waati si bii aa ba ijuukpã nŋa.

²⁸ I gbɔ ŋa, inɛ ŋa iyi à ba à sa hai ilɛi Babilɔniu, à na à waa sɔ̃ inɛi Siɔ̃ɔ ŋa à waa ni, Aɔ̃ Lafɛ̃ɛ nwa í jaɛ, nɔ í jaa kpasɛ̃ɛ.

²⁹ I tɔtɔɔ woo ta afa ŋau fei ŋa, nɔ i jɔ̀ a koo si ilu nlai Babilɔniu ŋa. Inɛ ŋau aa ce asɔi a kaakoò iluu, nɔ a maa jɔ̀ inɛ kãma ku ba ku fita ku sa. Laalɔ ŋa iyi í ceu fei, à nɛ a sãai. Bɛi í tako í cea inɛ ŋa, a cea nŋu mɔ bɛɛbɛ. À nɛ a cea bɛɛbɛi si na iyi í jɔ̀ í donda Aɔ̃ Lafɛ̃ɛi inɛi Izirɛli ŋau.

³⁰ Na nŋu, ajɔ nŋu bɛ, awaasũɛ ŋau aa cukui si bantuma ŋau. Nɔ woo ja igũɛ ŋau fei, aa kui ajɔ nŋu bɛ. Amu Aɔ̃ Lafɛ̃ɛi ǹ fɔ bɛɛbɛ.

³¹ Iŋɛ inɛi Babilɔni ilu faau ŋau, amu Aɔ̃ Lafɛ̃ɛi lele do ilɛ, ǹ wa n yɛ taale nŋɛ. Ajɔ nŋɛi í to wa bɛ nnyi. Ajɔi ijuukpã nŋɛi í to wa bɛ nnyi.

³² Ilu faau á koosɛi nɔ ku cuku, nɔ inɛ kãma kaa dedeɛ. An dasi iluɛ ŋau inai, nɔ inau ku jo mii ŋa iyi à kaakoɛ ŋau fei.

³³ Ide iyi Aɔ̃ Lafɛ̃ɛi lele do ilɛ í fɔ wee. Í ni, inɛ ŋa à waa taa inɛi Izirɛli ŋa do inɛi Zudaau ŋau gbugbã. Inɛ ŋa iyi à mu ŋa aru ŋau, à mu ŋai dim dim, a kù waa jɛ ku jɔ̀ ŋa.

³⁴ Amma woo faaba nŋau ilu gbugbãi, nŋu iyi iriɛi í jɛ Aɔ̃ Lafɛ̃ɛi lele do ilɛ. Nŋui á ja nŋa, nɔ ku jɔ̀ ilɛu ku ba kusĩmi, nɔ inɛi Babilɔni ŋau mɔ a ba wahala.

Lasabu iyi Aɔ̃ Lafɛ̃ɛ í ce si gãmɛi Babilɔni

³⁵ Aɔ̃ Lafɛ̃ɛ í fɔ í ni, igũ á naa si ilɛi Babilɔni do si inɛi ilu nlaɛ ŋa do si akaweɛ ŋa do si ilu laakaiɛ ŋa.

³⁶ Igũ á naa si woo ce alisiɛ ŋa hee a maa fɔ ide hai nɛ yaase ŋa. Igũ á naa si sooge woo ja igũ ŋau hee zigi nŋa ku da.

³⁷ Igũ á naa si acĩ nŋa ŋa do sarɛti ku ce igũ nŋa ŋa, do si inɛ njoo ŋa iyi à waa ja nŋa igũ ŋau. Nɔ aa baa a kua gbugbãi bɛi inaabo ŋa. Igũu á tosi amaniɛ ŋau, nɔ inɛ ŋa a koo.

³⁸ Inyii ido nŋa ŋau á gbɛ, domi ilɛu í jɛ ilɛi iwɛ̃ ŋa, nɔ iwɛ̃ ŋau à jɔ̀ iri nŋa í sinda.

³⁹ Na nŋu, ilui Babilɔniu bi kuwai mɛɛmui sako ŋa do mbo ŋa do taataa ŋai á baa ku jɛ. Inɛ kãma kaa buba bɛ má. Iluu á wɛɛ ngbɛi hee do ajɔ fei.

⁴⁰ Nɔ Aɔ̃ Lafɛ̃ɛ í ni má, yaase bɛi ǹ cea Sodomu do Gomɔɔ do ilu ŋa iyi à wa kɔkɔ nŋa ŋau, bɛɛbɛi an cea ilɛu mɔ. Inɛ kãma kaa buba si ilɛu má ajɔ kãma.

⁴¹ Zamaa gɔ wee wa naa hai do ilɛi ikpa awɔ njɛi kpãai inunu. Dimi nla nla gɔi á naa do ilaalu ku nɛ gbugbã nkpɔ nkpɔ, nɔ aa dede wai hai kɔɔi andunyau.

⁴² Inɛ ŋau à waa mu bioo do kaka ŋa. Inɛ kugaabu ŋai, nɔ a kù nɛ araare. Imu nŋa í ya maa fĩi bɛi ibai tenku, nɔ si antaii acĩ ŋai à gũ wa. À tã sɔɔlu a ce igũ bɛi inɛmɔkɔ akã do awɔ Babilɔni.

⁴³ Ŋɔi ilaalui Babilɔni í gbɔ baaui ideu, nɔ awɔɛ ŋa fei à kua gbugbã nɔ zigiɛ í da. Ŋɔi ara kuro í naa siɛ bɛi inaabo iyi wa bi ku bí.

⁴⁴ Ŋɔi Aɔ̃ Lafɛ̃ɛ í ni, an yɛi bɛi muusu nla iyi í fita wa hai si inɔ agbo iyi í wa si itĩi idoi Zuudɛ̃ɛu nɔ wa nɛ do ikpa bii mandi í wa. An lele inɛ feii anu akã, si anyiɛ nɔ n jilɛ inɛ iyi an cica ku jɛ ilaalu si ilɛi Babilɔniu. Ntɔ ntɔ, yooi í yɛ bɛi amu. Yooi á yɔkɔ ku beem yaase bɛi ǹ wa n ce mii ŋa. Nɔ ilaalu yoomai á yɔkɔ ku leekĩ si wajum ku kɔ̀ ide.

⁴⁵ Na nŋu, i sotĩ i gbɔ lasabu iyi Aɔ̃ Lafɛ̃ɛ í so si gãmɛi ilɛi Babilɔniu, do mii ŋa iyi í dasi idɔ nŋu ku cea ilɛi inɛi Kaladee ŋau. Kù nɔ kù nɛ sika kãma, aa maa fa ŋai ntɔ ntɔ bɛi mɛɛmu gaa wɛwɛɛ ŋa. Nɔ na iri nŋa, aa lɛgɛ aro nŋaui kù nɛ sika kãma.

⁴⁶ Ibai kucuku nŋau á jɔ̀ ilɛ ku yayai. Hai bɛ, aa maa gbɔ anu ku dɔ̃ nŋaui hee bi dimi mmu ŋa fei.