Zeremi 5 - Bibeli do fee

Kuwɛɛ í bɛjɛ mam mam si ilui Zeruzalɛmu

¹ I dabii si kpãai Zeruzalɛmu ŋau i cɔ ŋa nɔ i ce kudɛdɛ si bantuma ŋau wa ŋa, bii aa ba inɛ baa akã iyi kuceɛ í sĩa nɔ wa dɛdɛ nŋu ku ce mii iyi í jɛ ntɔ. Bii í jɛ ì ba inɛ baa akã ŋa, an cea Zeruzalɛmu suuru.

² Baa bii à waa ce kugbasi à waa ni, ǹ gbasi do irii Aɔ̃ Lafɛ̃ɛ nŋu iyi í wɛɛ, si iboi à ya maa ceò kugbasiu.

³ Aɔ̃ Lafɛ̃ɛ, mii iyi ì bii í jɛ kuwɛɛ si ntɔ. Wee nsɛi ì kpã ŋa iju, amma kù jɛ nŋa si nkãma. Ì bi i tã do aŋa, amma à kɔ̀ ku gbɔ ide iyi ì waa sɔ̃ ŋa. À lele idɔ nŋa ŋa bɛi kuta, nɔ à kɔ̀ ku nyi wa bi tɛɛ.

⁴ Ǹ ya n fɔi wo n maa n ni, inɛ ŋa iyi a kù nɛ kumà ŋai, nɔ ǹ ya n ni idei nnyɛii à waa ce, si na iyi í jɔ̀ a kù mà kpãai Ilaaɔ̃ ku too do woodai Aɔ̃ Lafɛ̃ɛ nŋa.

⁵ Bɛbɛi bi inɛ ngbo ŋai an bɔ n sɔ̃ ŋa ide, domi ngu ŋa a mà kpãai Ilaaɔ̃ ku too do woodai Aɔ̃ Lafɛ̃ɛ nŋa. Amma aŋa mɔ, aŋaò ŋa fei akãi. Tilasi do anu akã iyi í wa si gãmɛ nŋa do Aɔ̃ Lafɛ̃ɛ nŋau fei, à daai.

⁶ Na ŋɔi í ce muusu nla í fita wa hai sako wa kpa ŋa. Nɔ gbeegbekũi gbaa wa ce nfe nŋa. Muãa wa manji kɔkɔi ilu nŋa. Inɛ nŋa iyi á fita fei, á gagagaai, domi dulum du ŋau í kpɔ wa kɔ̃ɔsii. Zamba nŋa mɔ kù nɛ baa jia.

⁷ Na mii á jɔ̀ amu Aɔ̃ Lafɛ̃ɛ n ceɛ suuru, Zeruzalɛmu. Amaɛ ŋa à kɔ̀sim. À waa ce kugbasi do irii iwɛ̃ ŋa iyi a kù jɛ Ilaaɔ̃. Ǹ na ŋa bukaatai mii iyi à nɛ fei, amma à wasi sakara ku ce. À na ara nŋai mam mam si sakarau ku ce,

⁸ bɛi wùaa iyi wa yo nɔ í sɛi wa dabii. Aŋa fei à ya maa dɔ̃ anui si aboi kpaasi.

⁹ Amu Aɔ̃ Lafɛ̃ɛ, n kù nɛ n kpã kookoosu ŋau bɛ iju de. N kaa n baò inɛi ilɛ dimiɛ ŋa ija de.

¹⁰ I koo i da jĩi ndii rezɛ̃ɛɛ ŋau i kɛkɛɛ ŋa. Amma i maà kɛkɛɛ fei mam mam ŋa. I bu amaawɔ ŋau, domi a kù jɛ amaawɔm ŋa.

¹¹ Ntɔ ntɔ, hai inɛi Izirɛli ŋa do inɛi Zudaa ŋau fei, kãma nŋa kù leekĩ do amu. Amu Aɔ̃ Lafɛ̃ɛi ǹ fɔ bɛɛbɛ.

Iyi á ba inɛi Izirɛli ŋa

¹² Inɛi Zudaa ŋa à kɔ̀si Ilaaɔ̃, à ni kù nɛ gbugbã kãma. Nɔ à ni má, laalɔ kãma kaa ba aŋa. À ni igũ kaa naa si aŋa hee má jɛ ari.

¹³ À ni walii ŋau fei inya ngbɛ ŋai. Ilaaɔ̃ ci ya sɔ̃ ŋa ide kãma bɛ. Ide ŋa iyi à waa fɔ ŋau bɛ fei, kú cuku si iri nŋa bɛ.

¹⁴ Na nŋu, amu Aɔ̃ Lafɛ̃ɛi lele do ilɛ ǹ ni, si na iyi í jɔ̀ à waa fɔ bɛɛbɛ, an jɔ̀ idem ku yɛ bɛi ina si gɛlɛɛ, nɔ zamaau ku yɛ bɛi jĩi iyi inau á jo.

¹⁵ Nɔ Aɔ̃ Lafɛ̃ɛ í ni, iŋɛ inɛi Izirɛli ŋa mɔ, an jɔ̀ dimi gɔ ku naa si ŋɛ wa hai ilɛ jĩijĩ gɔ. Inɛi ilɛ ŋau, i kaa yɔkɔ i jɛ ŋa igũ ŋa. Ilɛu í nɛ gbugbã, nɔ ilɛ nwoi. Dimi gɔi iyi i kù waa gbɔ feeɛ ŋa, nɔ i kù waa gbɔ yaasei ide ku fɔɛ ŋa.

¹⁶ Tongoɛ í yɛi bɛi balɛ iyi wa cĩ. Aŋa fei woo mà igũ ŋai do ntɔ.

¹⁷ Aa naa a ce nfei mii ndu ŋɛ ŋai fei. Hai amaajɛ nŋɛ do sɔnda nŋɛ ŋa fei. Aa kpa ama inɛmɔkɔ do ama inaabo nŋɛ ŋa. Aa kpa angudã nŋɛ do kɛtɛ nŋɛ ŋa. Aa ce asɔɔi ikoi jĩi ndii rezɛ̃ɛ do ti figi nŋɛ ŋa. Igũ á ce nfei ilu ku nɛ gbugbã nŋɛ ŋa iyi ì waa kaabau ŋa.

¹⁸ Do nŋu fei, si waati nŋuu bɛ, amu Aɔ̃ Lafɛ̃ɛ, n kaa n kpa iri nŋɛ mam mam.

¹⁹ Bii à na à waa bee à waa ni, na mii í ce Aɔ̃ Lafɛ̃ɛ nwa wa ce mii nɔu ihɛ̃ fei. Nɔ i jɛ nŋa i ni, si na iyi í jɔ̀ ì kɔ̀sim ŋa, nɔ ì koo ì waa tɔɔ iwɛ̃i isɛ mmu ŋa si ilɛ nŋɛu, bɛɛbɛ mɔi aa koo i maa cea isɛ mmu ŋa icɛ si ilɛ iyi kù jɛ tu ŋɛ.

A kù mà gbugbãi Ilaaɔ̃

²⁰ Ŋɔi Aɔ̃ Lafɛ̃ɛ í ni, i koo i sɔ̃ tɔkui Zakɔbu ŋa laabaauu ihɛ̃ ŋa. Nɔ i sɔ̃ inɛi Zudaa ŋa i ni,

²¹ i sotĩ i gbɔ, iŋɛ zamaa nnyɛi iyi í kua laakai ŋa. Ì nɛ iju ŋa, amma i kù waa yɛ ilu ŋa. Ì nɛ itĩ ŋa, nɔ i kù waa gbɔ ide ŋa.

²² Aɔ̃ Lafɛ̃ɛ í ni, i kù mà gbugbãm ŋai? I kù wa yaya si wajum ŋa de. Amui ǹ nyaa tenku kɔɔ do sãa. Kɔɔu á maa wɛɛi hee do ajɔ fei, nɔ tenkuu kaa yɔkɔ ku kuaɛ wa. Kutãngãm ndɛɛ ŋau wa yaga, amma a kù nɛ gbugbã. À waa ce iba, do nŋu fei, a kaa yɔkɔ a kua.

²³ Amma zamaau ihɛ̃ í nɛ idɔ ku donda inɛ do ide hai jɛ. À ya kɔ̀ idei nɔ a sinda a maa nɛ nŋa.

²⁴ A ci ya fɔ si idɔ nŋa a maa ni, ka jirima Aɔ̃ Lafɛ̃ɛ nwa iyi í jɔ̀ ijĩ wa wɔ si waatiɛ hai ti jɛadɔ̃ do ti sɔnkpasa. Nɔ í ya muu nwa azuma ŋa si bii aa ka daò amaajɛ.

²⁵ Na laalɔ ku ce nŋɛ ŋai í jɔ̀ mii ŋau a ci ya ce si waati nŋa. Dulum du ŋɛ ŋai à jɔ̀ ì kua mii jiida ŋau bɛ ŋa.

²⁶ Ntɔ ntɔ inɛ laalɔ ŋa à wa si inɔi zamaam nɔu. À ya le taa ŋai bɛi woo mu yɛi ŋa nɔ a si a maa degbe. À ya le cɛkũm ŋai nɔ a mu amanɛ ŋa.

²⁷ Bɛi bii kaika í kɔ̃ò yɛi ŋa í ya yɛ, bɛɛbɛi ile nŋa ŋa à kɔ̃ò asoi ile. Bɛɛbɛi à ce à baò gbugbã à jɛ ilu fia ŋa.

²⁸ À jɛ à ce ikpo, nɔ à kpa kaato. Laalɔ nŋa í caa. A ci ya kɔ̀ò kɔyɔ do ilu are. A ci ya na ŋa ntɔ, si mii iyi í jɛ tu ŋa. A ci ya jirima asaiya nŋa. Amma aŋa, wũa nŋa wa bɔ waju.

²⁹ Amu Aɔ̃ Lafɛ̃ɛ, n kù nɛ n kpã kookoosu ŋau bɛ iju de. N kù nɛ n baò inɛi ilɛ dimiɛ ŋa ijai?

³⁰ Mii laalɔ iyi á dede idɔi inɛ ŋa wa ce si ilɛu.

³¹ Walii ŋa à waa ce walii do ibo. Woo wee ŋau à waa ce idɔɔbi nŋa. Nɔ iyi bɛi wa jɛa zamaam inɔ didɔ̃. Amma bɛirei aa ce ŋa na waju ku bɔi ilɛu.