Zeremi 49 - Bibeli do fee

Ide iyi Aɔ̃ Lafɛ̃ɛ í fɔ si gãmɛi inɛi Amɔɔ ŋa

¹ Ide iyi Aɔ̃ Lafɛ̃ɛ í fɔ si gãmɛi inɛi Amɔɔ ŋa wee. Í ni, Izirɛli kù nɛ ama inɛmɔkɔ? Kù nɛ woo jɛ tubu gɔ má? Bɛirei í ce iwɛ̃ iyi à ya kpe Milikɔmu í gba ilɛi Gadiu. Bɛirei í ce inɛi Amɔɔ ŋa à gba ilɛi inɛi Izirɛli ŋau à buba si.

² Ŋɔi Aɔ̃ Lafɛ̃ɛ í ni, na nŋu ajɔ ŋa wee à waa naa si bii an jɔ̀ inɛ ŋa a gbɔ anu ku dɔ̃i igũ si Raba ilu nlai inɛi Amɔɔ ŋa. Iluu á na ku yɛi bɛi kuta ŋa iyi à timbi, nɔ ilu ŋa iyi à wa kɔkɔɛ ŋau fei, aa jo ŋai. Waati bɛɛbɛ, Izirɛli á nyi ku gba mii iyi í jɛ titɛɛu mái.

³ Iŋɛ inɛi Hɛsebɔ̃ɔ ŋa, i dɔ̃ anu do inɔ kufɔ ŋa, domi à ce nfei ilui Aiu mbɛ. Iŋɛ inɛi Raba ŋa, i dɔ̃ anu i tɔɔ faaba ŋa. I dasi jĩnɛ iyi í jɛ ti kukpata akũ nɔ i kɔ̃ irii inɔ kufɔ ŋa. Bii ì yɔkɔ i sɛi i bɔ bii ì waa bɔ fei ŋa, aa mu iwɛ̃ ilaalu nŋɛui a nɛò ilɛ mmu dei nŋu do woo weeɛ ŋa do amaɛ ŋa fei ajɔ.

⁴ Na mii í ce ì waa saabu araɛ na lɔɔmaɛ ŋau. Lɔɔmaɛ ŋau bɛ si kpãai nfe ku cei à wa bɛ, awɔ iyi ì jɛ bɛi ama inaabo, awɔ woo kɔ̀ ide iyi naanɛɛ fei í wa si amaniɛ ŋa, nɔ ì ya fɔ i maa ni, yooi á jɛ ku naa sim igũ.

⁵ Nsɛi an jɔ̀ zigiida nla nla ku naa siɛ. Amu Aɔ̃ Lafɛ̃ɛi lele do ilɛi ǹ fɔ bɛɛbɛ. Zigiida nla nla iyi ǹ wa n fãau á naa siɛi hai do bii feiò bii fei. Aa maa sa ŋai, nɔ inɛ fei á maa sai do wajuɛ, nɔ inɛ kãma kaa ba ku tɔtɔɔ woo sa ŋau.

⁶ Amma si anyii nŋu, an jɔ̀ inɛi Amɔɔ ŋa iyi à mu aru ŋau a nyi a baa má. Amu Aɔ̃ Lafɛ̃ɛi ǹ fɔ bɛɛbɛ.

Ide iyi Aɔ̃ Lafɛ̃ɛ í fɔ si gãmɛi inɛi Edɔmu ŋa

⁷ Si gãmɛi inɛi Edɔmu ŋa, Aɔ̃ Lafɛ̃ɛi lele do ilɛ í fɔ í ni, ilu laakai kãma kù wa Temaa? Ikɔ ŋau fei à kpa iri bi ama inɛmɔkɔ ilu laakaiɛ ŋaui? Laakai ku nɛ nŋau í bɛjɛi?

⁸ I sinda i sa ŋa. I manji ku ce ncɛɛ iŋɛ inɛi Dedãa ŋa, domi ǹ wa n naaò nfe ku ce wa si tɔkui Esau ŋa. Waatii ijuukpã nŋa mbɛ.

⁹ Bii woo ka isoi rezɛ̃ɛ ŋa à to wa bi titɛɛ, iso keekei aa jɔ̀ɛ. Bii woo ce ile ŋa mɔ à naa idũ, aa ce asɔɔi zaka bɛi aa yɔkɔ fei.

¹⁰ Ntɔ ntɔ amui an ko mii ndii Esau fei, nɔ amui an jɔ̀ inɛ ŋa a mà bi ku manjiɛ ŋa, nɔ kaa yɔkɔ ku manji má. Tɔkuɛ ŋa, do nyaanzeɛ, do inɛi kɔkɔɛ ŋa fei, aa ce nfei, a kaa wɛɛ má.

¹¹ Aa sa i jɔ̀ ama nŋɛ ŋa kɔyɔ ŋai, amma amui an jɔ̀ a wɛɛ, nɔ amui jaaɔ̃ nŋɛ ŋau aa dasi naanɛ.

¹² Bɛi Aɔ̃ Lafɛ̃ɛ í fɔ wee. Aɔ̃ Lafɛ̃ɛ í ni, inɛ ŋa iyi n kù yɛ taale nŋa a mɔ kɔɔfui idɔɔkɔ̃m, do nŋu fei aŋai à na à mɔɔ. Nɔ awɔ Edɔmu, ì waa bi n ceɛi bɛi inɛ iyi kù nɛ taale kãma? Iyi bɛ kaa ce. Kɔɔfui idɔɔkɔ̃m nɔu, aa mɔɔi.

¹³ Ntɔ ntɔ, ǹ ce kugbasii do irii amu takam. Amu Aɔ̃ Lafɛ̃ɛi ǹ fɔ bɛɛbɛ. Bɔsura ilu nlaɛu aa lɛgɛɛi ku baa ku jɛ inya hai nɛ bɛɛrɛ. Á baa ku kpɔò bomma, nɔ nŋui á jɛ yaase iyi aa ya so bii à waa bi a ceekpe inɛ gɔ, nɔ iluɛ ŋau fei aa baa a ce bommai hee do ajɔ fei.

¹⁴ Ŋɔi Aɔ̃ Lafɛ̃ɛ í jɔ̀ ǹ gbɔ laabaau iyi inɛ gɔ iyi à bɛ wa bi inɛi andunya ŋa í naaò wa. Inɛɛu í ni, i tɔtɔɔ wa ŋa, i bɔ igũ bi inɛi Edɔmu ŋau ŋa. I dede i ce igũ ŋa.

¹⁵ Aɔ̃ Lafɛ̃ɛ í ni, iŋɛ inɛi Edɔmu ŋa, amui an jɔ̀ i kere i re ŋa si inɔi inɛ ŋa iyi à gbe si ilɛ ŋau ihɛ̃ ŋa. Nɔ yaakoi aa jɛ bi amanɛ ŋa.

¹⁶ Awɔi ì ya jɔ̀ njo ku maa mu inɛ fei, nɔ ì waa tamaa bɛi awɔi ì wa si antaii inɛ fei. Amma lasabu iboi ì waa ce bɛ. Awɔ iyi si isai kuta ŋai ì wa nɔ ì waa kɔa lele, baa bii í jɛ ì kɔa antɛɛ hee lele bɛi ti kungbã, an kitaɛ wa. Amu Aɔ̃ Lafɛ̃ɛi ǹ fɔ bɛɛbɛ.

¹⁷ Aa lɛgɛ Edɔmui. Inɛ ŋa iyi à waa lɔ kɔkɔɛ fei, aa ya bitii, nɔ aa ya maa fã fooi na wahalaɛ ŋau fei.

¹⁸ Ŋɔi Aɔ̃ Lafɛ̃ɛ í ni, bɛi í ce si waatii Sodomu do Gomɔɔ nɔ hee do ilu ŋa iyi à wa kɔkɔ nŋa ŋau fei à cukuu, bɛɛbɛi ti Edɔmu mɔ á jɛ. Inɛ kãma kaa buba si iluu bɛ má, nɔ inɛ kãma kaa jɛ kuwɛɛɛ bɛ má.

¹⁹ Ŋɔi Aɔ̃ Lafɛ̃ɛ í ni, an yɛi bɛi muusu nla iyi í fita wa hai si inɔ agbo iyi í wa si itĩi idoi Zuudɛ̃ɛu nɔ wa nɛ do ikpa bii mandi í wa. An lele inɛ feii anu akã, si anyiɛ nɔ n jilɛ inɛ iyi an cica ku jɛ ilaalu si ilɛi Edɔmu. Ntɔ ntɔ, yooi í yɛ bɛi amu. Yooi á yɔkɔ ku beem yaase bɛi ǹ wa n ce mii ŋa. Nɔ ilaalu yoomai á yɔkɔ ku leekĩ si wajum ku kɔ̀ ide.

²⁰ Na nŋu, i sotĩ i gbɔ lasabu iyi Aɔ̃ Lafɛ̃ɛ í so si gãmɛi inɛi Edɔmu ŋa, do mii ŋa iyi í dasi idɔ nŋu ku cea inɛi ilui Temaa ŋau. Kù nɔ kù nɛ sika kãma, aa maa fa ŋai ntɔ ntɔ bɛi mɛɛmu gaa wɛwɛɛ ŋa. Nɔ na iri nŋa, aa lɛgɛ aro nŋaui kù nɛ sika kãma.

²¹ Ibai kucuku nŋau á jɔ̀ ilɛ ku yayai. Hai bɛ, aa maa gbɔ anu ku dɔ̃ nŋaui hee Tenkui Njee ŋau.

²² Mbɛɛu á yɛi bɛi kungbã iyi í fo hee lele, nɔ í tɛ́ ikpaɛ ŋa wa si Bɔsura. Ajɔ nŋu bɛ, woo ja igũ jiida jiidai Edɔmu ŋau, njo á mu ŋai bɛi inaabo iyi wa gbɔ ara kuroi kubí.

Ide iyi Aɔ̃ Lafɛ̃ɛ í fɔ si gãmɛi inɛi Damasi ŋa

²³ Ŋɔi Aɔ̃ Lafɛ̃ɛ í jɔ̀ à gbɔ laabaau gɔ si gãmɛi ilui Damasi. Inɛi ilui Amati do Aapadi ŋau à gbɔ laabaau sãmiu nɔ anyɔ nla nla í bii ŋa. Si anyii nŋu, nɔ à wɛɛò zigiida hee à baa à yɛ bɛi tenku iyi í wasi ku tãngãm iyi kaa yɔkɔ ku leekĩ cau.

²⁴ Ŋɔi inɔi inɛi Damasi ŋau í fɔ, nɔ à waa ce sɔɔlui ku sa. À waa yaya do njo. Njo í mu ŋa nɔ à waa wahala bɛi inaabo iyi wa gbɔ ara kuroi ku bí.

²⁵ Bɛirei í ce ilu iyi à ya kɔ̃ iri a maa cĩu, ilu iyi inɛ í ya nɛ si inɔ didɔ̃u, à fũsiɛ awɔ.

²⁶ Nɔ Aɔ̃ Lafɛ̃ɛi lele do ilɛ í ni má, na nŋui í ce ajɔ nŋu bɛ, awaasũɛ ŋau fei aa cuku si bantumaɛ ŋau. Nɔ soogeɛ ŋau fei aa kui.

²⁷ An dasi bindii idĩ ŋa iyi à waa jɛ gbugbãi Damasiu inai nɔ ku jo kabai Bɛni-Hadadiu.

Ide iyi Aɔ̃ Lafɛ̃ɛ í fɔ si gãmɛi dimii Arabi ŋa

²⁸ Ide iyi Aɔ̃ Lafɛ̃ɛ í fɔ si gãmɛi dimii Kedaa do si bommai Hasɔɔ ŋa aŋa iyi Nebukanɛsaa ilaalui Babilɔni í jɛ igũu wee. Í ni, i dede i bɔ igũ si inɛi Kedaa ŋau ŋa. I ce nfei mii fei bi inɛ ŋa iyi à wa ikpa nunui daakɔu ŋa.

²⁹ Aa gba ilei acɔ nŋa ŋa do mɛɛmu gaa nŋa ŋa. Aa gba bi kuwa nŋa hee do mii ndu ŋa ŋau fei ŋa. Aa gbã kpookpo nŋa ŋa a nɛò ŋa, nɔ a dɔ̃ si ŋa anu a ni, zigiida í wai bii fei.

³⁰ Nɔ Aɔ̃ Lafɛ̃ɛ í ni, iŋɛ inɛi Hasɔɔ ŋa, i sa ŋa, i nɛ ńya ńya ŋa. I koo i manji si isai kuta ŋa, domi Nebukanɛsaa ilaalui Babilɔniu í ce sɔɔlui mii iyi á ce na iri nŋɛ, nɔ í nɛ lasabu iyi í ce í jilɛ na iri nŋɛ.

³¹ Ŋɔi Aɔ̃ Lafɛ̃ɛ í ni, i dede i bɔ igũ si ilɛ iyi í wɛɛ sɛ̃ɛ nɔ í nɛ laakai ku sũ bɛ ŋa. Inɛ ŋau à waa yɔɔ iyi aŋa à wɛɛò laakai ku sũ, ŋɔi í jɔ̀ a kù nɛ gambo ŋa hee má jɛ sɔkɔ ŋa. Nɔ à wɛɛ nŋai aŋa akã nŋa.

³² Mbɛɛ ŋa aa ce ilei kpookpo nŋa ŋai do kɛtɛ nŋa ŋa. Aa kooi bɛi à ya ko amani ŋa si igũ. Nɔ Aɔ̃ Lafɛ̃ɛ í nyi í ni má, an fɛ ŋai si fufu iyi wa ce fei, hee do inɛ ŋa iyi à waa wa kɔkɔlɛi agbã nŋa ŋau fei. An jɔ̀ wahala nŋa ku naai hai do bii fei.

³³ Ilu nlai Hasɔɔu, bi kuwai ajaako ŋai á baa ku jɛ, nɔ ku baa ku kpɔò bomma hee do ajɔ fei. Inɛ kãma kaa buba bɛ má ajɔ kãma.

Ide iyi Aɔ̃ Lafɛ̃ɛ í fɔ si gãmɛi inɛi Elamu ŋa

³⁴ Aɔ̃ Lafɛ̃ɛ í ba walii Zeremi ide ku fɔ si gãmɛi inɛi ilɛi Elamu ŋa si waati iyi Sedesiasi ilaalui Zudaa í jɛ bommau gbakã í ni,

³⁵ an kpa woo ta afa ŋa iyi à jɛ gbugbãi inɛi Elamu ŋau.

³⁶ Nɔ an jɔ̀ hai gonta mɛɛi andunyau, fufu ku naa si Elamu wa. An fangaa inɛi Elamu ŋaui bii fei. Inɛi Elamu ŋa aa sa a koo a manjii si andunya fei.

³⁷ An jɔ̀ inɛi Elamu ŋau a maa yayai si wajui mbɛɛ nŋa ŋa, do si wajui inɛ ŋa iyi à waa dɛdɛ ku kpa ŋa. Nɔ Aɔ̃ Lafɛ̃ɛ í nyi í ni má, si idɔɔkɔ̃ nla nla nɔu an jɔ̀ wahala ku naa si ŋai. An jɔ̀ igũ ku naa si ŋai hee n koo n kpa iri nŋa fei mam mam.

³⁸ Ŋɔi Aɔ̃ Lafɛ̃ɛ í nyi í ni má, an kpa ilaalui Elamuui hee do akaweɛ ŋau fei, nɔ n jilɛ bommam si ilɛu bɛ.

³⁹ Nɔ í ni má, ajɔ akã an jɔ̀ inɛi Elamu ŋa iyi à mu aru ŋau à nɛò ŋau a baa má.