Zeremi 48 - Bibeli do fee

Ide iyi Aɔ̃ Lafɛ̃ɛ í fɔ si gãmɛi inɛi Moabu ŋa

¹ Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ si gãmɛi Moabu í ni, inɔ kufɔi í jɛ ti inɛi ilui Nebo ŋa, domi à lɛgɛ iluui. Anyɔi í jɛ ti ilui Kiriataimu, domi à muui. Misigabu mɔ si anyɔi í wa, do si zigiida nla nla.

² Mii iyi wa jɛ bɛɛrɛi inɛi Moabu ŋau, kù wɛɛ má. Inɛ ŋa à cea Hɛsebɔ̃ɔ sɔɔlui laalɔ à ni, ka koo kaa kpa irii iluu hai si aninii zamaai inɛi andunya ŋau. Nɔ awɔ mɔ ilui Madimɛni, igũ á naa siɛ nɔ i kpɔò bomma.

³ Ŋɔi à gbɔ anu ku dɔ̃i faaba ku tɔɔ wa naa hai Horonaimu. Inɛ ŋa à waa ni, à ce asɔɔi mii fei, nɔ í jɛ wahala nla nla.

⁴ À ce nfei ilɛi Moabuu, nɔ amaɛ ŋa à wasi ku dɔ̃ anu.

⁵ Inɛ ŋa à gũ geetei Luhiti à waa kooi do kukpata, nɔ do ikpa lɔɔmai Horonaimu ihɔ̃, inɛ ŋa à waa dɔ̃ anu do inɔ kufɔ.

⁶ À wasi ku ni, i sa ŋa, i saò hunde nŋɛ ŋa, nɔ i koo i wa si gbaa ŋa bɛi sɛnga.

⁷ Ntɔ ntɔ Moabu, si bɛi si icɛɛ ŋai ì na araɛ si do si amaniɛ ŋa, aa na a muɛi. Nɔ Kemɔsi iwɛ̃ɛu mɔ aa sooi a nɛò ilɛ mmu do woo weeɛ ŋa do akaweɛ ŋa fei ajɔ.

⁸ Inɛ iyi á naa ku ce nfei ilu ŋau, á lɔ si ilu ŋau feii akã akã, nɔ kãma nŋa kaa fita si. Á ce nfei lɔɔma do cɔɔ ŋau feii. Aɔ̃ Lafɛ̃ɛi í fɔ bɛɛbɛ.

⁹ I mua inɛi Moabu ŋa ikpa ŋa ku ba a fo. Iluɛ ŋau aa baa a kpɔò bommai, inɛ kãma kaa wa bɛ má.

¹⁰ Ikpei á jɛ ti inɛ iyi wa ce icɛi Aɔ̃ Lafɛ̃ɛ do atafii. Ikpei á jɛ ti inɛ mɔ iyi kù bi inɛ ku kpa do taakubaɛ si waatii igũ.

¹¹ Moabu í wɛɛi wo sɛ̃ɛ hai waatii awaasũɛ. Wa sĩmiɛi bɛi fokoi inyi. A kù sindaɛ bɛi à ya sinda ngɔgɔ hai si kaale. Nɔ inɛ kãma kù mu kù nɛòɛ ilɛ mmu gɔ. Didɔ̃ɛ do inunuɛ kãma kù kpaasi.

¹² Ŋɔi Aɔ̃ Lafɛ̃ɛ í ni, na nŋu, waati wa naa bii an jɔ̀ inɛ ŋa a naa siɛ nɔ a sindaɛ si kaale mmu. Aa sinda boonyi ŋa si bii í wa siui nɔ a lɛgɛ ŋa.

¹³ Inɛi Moabu ŋa aa wɛɛò anyɔ si Kemɔsi iwɛ̃ nŋa bɛi inɛi Izirɛli ŋa à wɛɛò anyɔ si Betɛli iwɛ̃ nŋa si bii naanɛ nŋa fei í wa siu.

¹⁴ Bɛirei aa ce i yɔkɔ i ni ŋa, awa woo ja igũ ilu gbugbã ŋai. Awa sooge woo ja igũ ŋai do ntɔ.

¹⁵ À kɛkɛ ilui Moabu ŋau, nɔ cua í dede. Woo ja igũi hai waatii awaasũɛu í bɔ bi ku kpa mɛɛmu ŋa. Ilaalu iyi à ya kpe Aɔ̃ Lafɛ̃ɛi lele do ilɛui í fɔ bɛɛbɛ.

¹⁶ Kucukui Moabu í maai wa mbɛ. Nɔ kaa kpɛ má wahala ku naa siɛ.

¹⁷ Iŋɛ iyi ì jɛ inɛi kɔkɔi ilɛi Moabuu fei, iŋɛ iyi ì màa ŋa, i coo fɔɔi iku ŋa. I bee ara nŋɛ i ni, bɛirei í ce gbugbã nla nla bɛ ihɛ̃ í lɛgɛ, gbugbã iyi í nɛ amboe nla nla bɛ ihɛ̃.

¹⁸ Iŋɛ inɛi ilui Dibɔ̃ɔ ŋa, i kita wa hai si kitã ilu bɛɛrɛ nŋɛu. I koo i buba si iri ankitã ŋa. Inɛ iyi á na ku ce nfei Moabuu wa to wa ku na ku lɔ siɛ. Nŋui á lɛgɛ bindi ku nɛ gbugbãɛ ŋa.

¹⁹ Iŋɛ inɛi ilui Aroɛɛ ŋa, i koo i leekĩ si kpãa nɔ i maa degbe ŋa. Inɛ ŋa iyi à ba à fita si ŋa iyi à waa sa ŋau, i bee ŋa mii iyi wa ce ŋa.

²⁰ Aa jɛ a ni, si anyɔ do si gbugbã ku kuai Moabu í wa. Na nŋu, i dɔ̃ anui inɔ kufɔi iku, i dɔ̃ anu nla nla ŋa. I fɔ laabaauu si itĩi idoi Aanɔɔu i ni à ce nfei Moabu ŋa.

²¹ Ijuukpãi Aɔ̃ Lafɛ̃ɛi í naa si ilɛ iyi í wa si antaii geeteu do si Holɔ̃ɔ do si Yahasi do Mefaati,

²² do si Dibɔ̃ɔ do Nebo do Bɛti-Dibulataimu,

²³ do Kiriataimu do Bɛti-Gamulu do Bɛti-Meɔ̃ɔ,

²⁴ do si Keriɔti do Bɔsura do si ilui ilɛi Moabu ŋau fei iyi à wa hee jĩijĩ do iyi à wa amɛɛ amɛɛ ŋau fei.

²⁵ Nɔ Aɔ̃ Lafɛ̃ɛ í ni má, gbugbãi Moabu í kpa iri mbɛ, nɔ yiikoɛ mɔ í tã.

²⁶ Moabu í tamaa bɛi nŋu í la nŋu í to Aɔ̃ Lafɛ̃ɛi. Na nŋu, a naa atɛ̃ ku mɔ ku kpaa hee ku tu. Waati bɛɛbɛ, inɛ fei á maa yaako nŋu mɔ.

²⁷ Awɔ Moabu ì ya maa yaako Izirɛlii wo. Mà kù jɛ bɛɛbɛ. Izirɛli kù nɔ kù jɛ woo ce ile. To, na mii í jɔ̀ ì ya gbugbã iri i maa yaakoɛ waati iyi ì waa fɔ ideɛ fei.

²⁸ I fũsi ilu ŋau awɔ i koo i lɔ isai kuta ŋa, iŋɛ inɛi ilɛi Moabu ŋa. I ce bɛi ankasiidi iyi í ya ce antɛɛ si isai kuta ŋa.

²⁹ À gbɔ faau iyi Moabu í nɛ, faauu í la í caa. À gbɔ inɛ ku dondaɛ do faauɛ do fufu ku tɔɔɛ do ara ku so lele iyi í nɛ.

³⁰ Ŋɔi Aɔ̃ Lafɛ̃ɛ í ni, amu takam ǹ màa. Í ce wa lɔ sii, nɔ wa tɔɔ fufu, amma mii iyi wa ceu kù nɛ bɛɛrɛ kãma.

³¹ Na ŋɔi í jɔ̀ ǹ wɛɛò inɔ kufɔ na irii Moabu, nɔ ǹ wasi ku dɔ̃ anu na irii inɛi Moabu ŋau fei. Nɔ bɛɛbɛ mɔi ǹ wɛɛò inɔ kufɔ má si gãmɛi inɛi Kii-Herɛsi ŋau mɔ.

³² Awɔ mɔ ilui Sibuma, ǹ wa n kpataɛ í re baa bɛi ǹ wa n kpataa inɛi Yazɛɛ ŋa. Ì jɔ jĩi ndii rezɛ̃ɛ. Amaawɔɛ ŋa à kua à bɔi hee si icei tenkuu, nɔ à nɛ hee Yazɛɛ. Amma woo ce asɔɔu í naa í ce asɔɔi amaajɛɛ iyi ì da do inyii rezɛ̃ɛɛ iyi ì fɔ̃.

³³ Inɔ didɔ̃ nla nlau kù wa si ikoi jĩi ku so isoi inɛi Moabu ŋau má. Atɛ̃ vɛ̃ɛ kù wa si nantaa nŋa ŋau má. Inɛ ŋa a kù wɛɛ iyi aa lɔlɔ rezɛ̃ɛ ŋau má. Anu ku dɔ̃i inɔ didɔ̃ nŋa ŋau fei í coko.

³⁴ Ŋɔi inɛi Hɛsebɔ̃ɔ ŋa à dɔ̃ anu à waa tɔɔ faaba, nɔ à waa gbɔ anu ku dɔ̃ nŋau hee Elale. Anu ku dɔ̃ nŋau í nyi wa bɔi má hee Yahasi. Hai Soaa mɔ wa bɔi hee Horonaimu do hee Egalati-Selisia. Nɔ baa tengi bii inyii Nimurimu ŋau à wa fei à gbɛ.

³⁵ Nɔ hai Moabu, inɛ ŋa iyi à ya maa bɔ geete bii à ya ce kuwee ŋau, kuwee ŋa ku cea iwɛ̃ nŋa ŋau fei, an kpa iri nŋai. Amu Aɔ̃ Lafɛ̃ɛi ǹ fɔ bɛɛbɛ.

³⁶ Na ŋɔi í jɔ̀ ǹ wa n kɔ̃ irii inɔ kufɔ si gãmɛi inɛi Moabu ŋa. Nɔ bɛɛbɛi ǹ nyi ǹ wa n kɔ̃ irii inɔ kufɔ má si gãmɛi inɛi Kii-Herɛsi ŋa, domi amani iyi à ko fei wo, à kuaɛ.

³⁷ Inɛmɔkɔ ŋa à gbogoo iri nŋa, nɔ à ja agbã nŋa ŋa. À kɔkɔkɔ awɔ nŋa ŋa, nɔ à waa dasi ibɔ ŋa iyi à jɛ ibɔi akũ.

³⁸ Ŋɔi Aɔ̃ Lafɛ̃ɛ í ni má, si antaii ile sikifai inɛi Moabu ŋau fei, do si bantuma nŋa ŋa, kukpatai akũ nŋu akãi inɛ í ya maa gbɔ, domi ǹ lɛgɛ Moabui bɛi caka iyi a kù bi má.

³⁹ Ŋɔi à wɛɛò zigiida, à wasi ku dɔ̃ anu, nɔ à wɛɛò anyɔ nla nla si na iyi í jɔ̀ à sinda à toaa anyi. Inɛi kɔkɔɛ ŋa fei à wasi ku yaakoɛ, nɔ à wɛɛò zigiida.

⁴⁰ Aɔ̃ Lafɛ̃ɛ í ni, mbɛɛ í yɛi bɛi yembeeku iyi wa fo, nɔ í fũ ikpaɛ ŋa si inɛi Moabu ŋau.

⁴¹ À gba ilu nŋa ŋau, hee do ile ku nɛ gbugbã bi ku manji nŋa ŋau, nɔ idɔi woo ja igũi Moabu ŋau í yɛi ajɔ nŋu bɛ bɛi ti inaabo iyi wa gbɔ ara kuroi kubí.

⁴² Aa lɛgɛ ilɛi Moabui nɔ zamaaɛ kaa wɛɛ má, domi à dedeò ide ku kɔ̀ si gãmɛi Aɔ̃ Lafɛ̃ɛ.

⁴³ Ŋɔi Aɔ̃ Lafɛ̃ɛ í ni má, njo do isa nla nla, do cɛkũm nii á maa wa do waju nŋɛ, iŋɛ inɛi Moabu ŋa.

⁴⁴ Inɛ iyi njou í jɔ̀ wa sa, á dasi inɔ isaui, nɔ bii wa bi ku fita wa, cɛkũm nɔui á muu, domi an jɔ̀ adɔ̃i ijuukpã ku naa si inɛi Moabu ŋaui. Amu Aɔ̃ Lafɛ̃ɛi ǹ fɔ bɛɛbɛ.

⁴⁵ Inɛ ŋa à kua gbugbã nɔ à sa à waa bɔ ku manji Hɛsebɔ̃ɔ, amma ina gɔ í dede si iluu. Amɛi ina gɔi á dede si kpasɛ̃i ilaalu Sioni. Inau á jo kɛkɛlɛi Moabui do koko irii inɛ laalɔ ŋa.

⁴⁶ Inɔ kufɔi á jɛ titɛɛ awɔ Moabu. Awɔ iyi ì jɛ zamaai iwɛ̃ iyi à ya kpe Kemɔsiu ì nyɔ mbɛ. Ama inɛmɔkɔɛ do ama inaaboɛ ŋa fei, à mu ŋa aru à nɛò ŋa.

⁴⁷ Amma bii í na í to waati gɔ, an jɔ̀ inɛi Moabu ŋa iyi à mu aru à nɛò ŋau a baa má. Amu Aɔ̃ Lafɛ̃ɛi ǹ fɔ bɛɛbɛ si gãmɛi ijuukpã iyi á jɛ ti inɛi Moabu ŋau.