Zeremi 47 - Bibeli do fee

Ide iyi Aɔ̃ Lafɛ̃ɛ í fɔ si gãmɛi inɛi Filisi ŋa

¹ Ide iyi Aɔ̃ Lafɛ̃ɛ í sɔ̃ walii Zeremi si gãmɛi inɛi Filisi ŋa hee Faraɔ̃ ku maa lɔ si inɛi Gaza ŋa wee.

² Í ni, amu Aɔ̃ Lafɛ̃ɛ ǹ ni, inyi nla nlai í dede wa hai ikpa awɔ njɛi kpãai inunu. Inyiu í yɛi bɛi inyii ido nla iyi í kɔ̃ nɔ í mi ilɛu do mii iyi í wa si fei, hai ilu nla ŋau hee do inɛɛ ŋau fei. Inɛ ŋau fei à wasi ku dɔ̃ anu, nɔ inɛi ilu ŋau fei à wasi ku weewea.

³ Waati iyi à waa gbɔ ibai kɔbisii acĩi soogei Ezibiti ŋa do ibai sarɛtii igũ ŋau do ibai kutɛi sarɛti nŋa ŋau, baa ŋau a kù waa ce baa idei ama nŋa ŋau má domi aŋa taka nŋa à kua gbugbã.

⁴ Ajɔ nŋu bɛ, ajɔi nfe ku cei inɛi Filisi ŋau feii í to wa bɛ, nɔ inɛ kãma kù gbe iyi á sobi inɛi Tii do inɛi Sidɔ̃ɔ ŋau. Ntɔ ntɔ Aɔ̃ Lafɛ̃ɛ á ce nfei inɛi Filisi ŋaui fei hee do inɛi gũngũm dii Kafitɔɔ ŋa iyi à gbe ŋau fei.

⁵ Si ilui Gaza, à gbogooa inɛ ŋa iri na inɔ kufɔ, nɔ inɛi Asikalɔ̃ɔ ŋa mɔ hee do inɛ ŋa iyi à gbe iyi à wa si lɔɔma nŋa ŋau fei a kù nɛ ide kãma ku fɔ má. To, iŋɛ iyi ì gbe si hunde ŋa, hee waati yoomai aa maa bu ara nŋɛ ŋa.

⁶ Nɔ ì fɔ ì waa ni ŋa, aa, taakubai Aɔ̃ Lafɛ̃ɛ, hee waati yoomai aa leekĩ i sĩmi. Sinda i nyi si inɔ ankɔ̃ɔɛ, nɔ i wa bɛ sɛ̃ɛ i maà ce nkãma má.

⁷ Nɔ bɛirei á ce ku leekĩ bii Aɔ̃ Lafɛ̃ɛi í naa wooda ŋau. Á bɔi hee Asikalɔ̃ɔ ikpa itĩi tenkuu. Ikpa bii í jilɛa ku bɔ mbɛ.