Zeremi 46 - Bibeli do fee

¹ Ide iyi Aɔ̃ Lafɛ̃ɛ í sɔ̃ walii Zeremi í ni ku fɔ si gãmɛi inɛi andunya ŋa wee.

Kucukui inɛi Ezibiti ŋa si ilui Kaakemisi

² Nebukanɛsaa ilaalui Babilɔni í jɛ Faraɔ̃ Neko ilaalui Ezibiti do soogeɛ ŋa igũ si ilui Kaakemisi itĩi idoi Efarata si adɔ̃ mɛɛsiai bomma ku jɛi Zoakimu amai Zoziasi ilaalui Zudaa. Waati bɛɛbɛi, Aɔ̃ Lafɛ̃ɛ í fɔ idei ijuukpã si gãmɛi inɛi Ezibiti ŋa.

³ Inɛ ngboi soogei Ezibiti ŋau à ni, i ce sɔɔlui tɛli keeke do tɛli nla nɔ i nɛ i koo i ce igũ ŋa.

⁴ Iŋɛ masa ŋa, i dĩaa acĩ nŋɛ ŋau sarɛtii igũ ŋa. I lɔ inɔ sarɛti ŋau ŋa. I dasi fulai isɔ ŋa nɔ i koo i leekĩ ŋa. I teese kaka nŋɛ ŋa nɔ i dasi ibɔi isɔ ŋa.

⁵ Ŋɔi Aɔ̃ Lafɛ̃ɛ í ni, na mii í jɔ̀ à waa yaya do zigiida, nɔ à waa nyi do anyi. Sooge woo ja igũ nŋa ŋau à jɛ ŋa igũ. Ŋɔi à wasi ku sa. À waa sa mɔm nii do anyi anyi. À wɛɛò zigiidai bii fei.

⁶ Amma baa inɛ iyi í gbãa í re kaa yɔkɔ ku sa ku fita si. Nɔ woo ja igũ ŋau mɔ a kaa fita si. Ikpa awɔ njɛi kpãai inunu, si itĩi idoi Efarata, aa koosɛi nɔ a cuku.

⁷ Yooi í yɛ bɛi idoi Nili iyi í kɔ̃ hee wa dikãu.

⁸ Ezibitii í kɔ̃ wa koo bɛi idoi Nili hee wa dikã. Nɔ í fɔ wa ni, an kɔ̃ n maa n kooi nɔ n bii ilɛu. An ce asɔɔi ilu ŋai do inɛi ilu ŋau fei.

⁹ Acĩ ŋa, i gũ i koo ŋa, nɔ sarɛtii igũ ŋau a sɛi jiida jiida. Iŋɛ sooge woo ja igũ ŋau, i koo ŋa do inɛi Etiopi ŋa do inɛi Puti ŋa aŋa iyi à waa mu tɛli keeke ŋa do inɛi Ludi ŋa iyi à waa mu bioo ŋau.

¹⁰ Ajɔu bɛ, ajɔi Aɔ̃ Lafɛ̃ɛi. Ti Aɔ̃ Lafɛ̃ɛi lele do ilɛi, nɔ ajɔi gbese ku sãi si bii á sãa mbɛɛɛ ŋa gbese. Taakuba á jɛ inɛ ŋai hee ku yo. Njɛ nŋai á mɔ hee ku yo. Nɔ iyi bɛ kuwee iyi í jɛ ti Aɔ̃ Lafɛ̃ɛi, ti Aɔ̃ Lafɛ̃ɛi lele do ilɛ feii do ikpa awɔ njɛi kpãai inunu ikpa idoi Efarata.

¹¹ Iŋɛ inɛi Ezibiti ŋa, baa bii ì bɔ Galaadi iwɔ ku dɛdɛ ŋa ngbɛi. Do iwɔ nkpɔ nkpɔ ku dɛdɛ nŋɛ fei, kumɛɛ nŋɛ ŋau kaa tã.

¹² Inɛi andunya ŋa à gbɔ baaui anyɔ iyi í ba ŋɛ, nɔ anu ku dɔ̃ nŋɛ í kɔ̃ andunyau, domi woo ja igũ í kosi woo ja igũ isɛ, nɔ aŋa minji fei à cuku.

Nebukanɛsaa í faata si Ezibiti wa

¹³ Ide iyi Aɔ̃ Lafɛ̃ɛ í sɔ̃ walii Zeremi si gãmɛi kunaai Nebukanɛsaa ilaalui Babilɔni iyi wa naa igũ ku ce si ilɛi Ezibiti wee.

¹⁴ I fɔ laabaauu si ilɛi Ezibiti ŋa. I jɔ̀ Migidɔli ku gbɔ ŋa, do Nɔfu do Tapanɛzi. I sɔ̃ ŋa i ni, i dede i leekĩ, nɔ i ce sɔɔlu ŋa, domi igũ wa jɛ inɛ ŋa wa kaako ŋɛ.

¹⁵ Na mii í ce Apisi iwɛ̃ nŋɛ iyi í yɛ bɛi kɛtɛ kombo kù yɔkɔ kù leekĩ. Aɔ̃ Lafɛ̃ɛi í kɛkɛɛ.

¹⁶ Nŋui í jɔ̀ inɛ nkpɔ nkpɔ nŋa í koosɛ. Ŋɔi à cuku à waa bata njɛ nɔ à waa ni, ka dede, ka nyi bi inɛ nwa ŋa si ilɛ bii à bí wa tengi bii aa ka jĩò taakubai mbɛɛ.

¹⁷ I sɔ Faraɔ̃ ilaalui Ezibitiu iri i ni ŋa, ilu faau, nŋu iyi í ya jɔ̀ awaati ku lɔ wa.

¹⁸ Ŋɔi ilaalu iyi iriɛ í jɛ Aɔ̃ Lafɛ̃ɛi lele do ilɛ í ni, hee do kuwɛɛm feii ǹ ceò kugbasiu ihɛ̃ ǹ ni, bɛi à mà iri kutai Tabɔɔ nŋui í gboka í re iri kuta ŋa iyi à gbe, do bɛi à mà iyi Kaamɛli iri kuta gɔi iyi í wa kɔkɔi tenku, bɛɛbɛi kù nɛ sika kãma à mà iyi mbɛɛ á naa ku faata wa si ŋa.

¹⁹ Na nŋu, iŋɛ inɛi Ezibiti ŋa, waatii jĩnɛ nŋɛ ŋa ku koi í to wa bɛ i nɛò ilɛ bii aa koo i maa jɛ aru ŋa. Inɛ ŋa aa ce nfei ilui Nɔfu. Aa na a jo iluui, nɔ inɛ kãma kaa wa bɛ má.

²⁰ Ezibiti ilɛ kusĩa gɔi bɛi kɛtɛ zãu, amma leka gɔ wa naa siɛ hai awɔ njɛi kpãai inunu.

²¹ Woo ce igũ ŋa iyi í haya wa ŋau mɔ, à wa bi tɛɛ bɛi ama kɛtɛ ku nɛ ikpo ŋa. Nɔ aŋa mɔ à sinda, aŋa fei à sa, kãma nŋa kù leekĩ, domi ajɔi wahala í to wa si ŋa. Waatii ijuukpã nŋaui í to si ŋa wa bɛ.

²² Mbɛɛ ŋa à to wa aŋa nkpɔ nkpɔ, à na à lɔ si inɛi Ezibiti ŋa do dagba si awɔ bɛi woo da jĩi ŋa. Ŋɔi soogei Ezibiti ŋau à sa bɛi njo, a kù ce iba kãma.

²³ Aɔ̃ Lafɛ̃ɛ í ni, à ya da jĩi ndii inɔ agboi, inɔ agbo iyi kaa jɛ baa ku lɔ. À ya naai nkpɔ nkpɔ bɛi kɛtɛngbo ŋa iyi a kù nɛ baa jia.

²⁴ Anyɔ nla nlai á jɛ ti Ezibiti. Á dasi awɔ gbugbãi zamaa gɔ iyi wa naa hai ikpa awɔ njɛi kpãai inunui.

²⁵ Aɔ̃ Lafɛ̃ɛi lele do ilɛ, Lafɛ̃ɛi inɛi Izirɛli ŋau í ni, an naa si Amɔɔ iwɛ̃i Tɛbɛɛsi do si ilɛi Ezibiti do si iwɛ̃ɛ ŋa do si ilaaluɛ ŋa do si Faraɔ̃ hee do si inɛ ŋa iyi à waa kaabaɛ fei.

²⁶ An so ŋai n daa inɛ ŋa iyi à waa dɛdɛ ku kpa nŋa si awɔ. An so ŋai n daa Nebukanɛsaa ilaalui Babilɔni si awɔ do si awɔi inɛ ngboi soogeɛ ŋa. Amma bii í na í kpɛ, inɛ ŋa aa na a buba ilɛi Ezibiti má bɛi tako. Amu Aɔ̃ Lafɛ̃ɛi ǹ fɔ bɛɛbɛ.

Faabai Izirɛli

²⁷ Amma awɔ Zakɔbu woo ce icɛm, maà jɔ̀ zigiɛ ku da. Izirɛli, maà yaya, domi an faabaɛ wa hai ilɛ jĩijĩ awɔ do tɔkuɛ ŋa hai ilɛ bii ì waa jɛ aruu. Zakɔbu á na ku sinda ku baa, nɔ ku buba sɛ̃ɛ do laakai ku sũ cau, nɔ inɛ kãma kaa dede laakaiɛ má.

²⁸ Awɔ Zakɔbu woo ce icɛm, maa jɔ̀ zigiɛ ku da. Amu Aɔ̃ Lafɛ̃ɛi ǹ fɔ bɛɛbɛ, domi ǹ wɛɛ do awɔ. An kpa irii dimi mmu ŋa bii ǹ jɔ̀ ì fangaa ì bɔ ŋau ŋa. Amma awɔ, n kaa n ce nfeɛ. Ntɔi ǹ kpãɛ ijui dee dee si yaase bɛi ì nɛ ku jɛ, domi n kaa n jɔ̀ɛ bɛi hai nɛ taale.