Zeremi 45 - Bibeli do fee

Ide iyi walii Zeremi í sɔ̃ Baruku

¹ Walii Zeremi wa ba Baruku amai Neria ide ku fɔ, nɔ nŋu mɔ í wasi ku kɔ ide ŋa iyi Zeremi wa sɔ̃ɔu si tia si adɔ̃ mɛɛsiai bomma ku jɛi Zoakimu amai Zoziasi ilaalui Zudaa.

² Í sɔ̃ɔ í ni, ide iyi Aɔ̃ Lafɛ̃ɛ nŋu iyi í jɛ Lafɛ̃ɛi inɛi Izirɛli ŋau í fɔ si gãmɛi awɔ Baruku wee.

³ Í ni, ì fɔ ì waa ni, inɔ kufɔi í jɛ titom, domi Aɔ̃ Lafɛ̃ɛ wa kɔ̃ɔsi wahala si ara kurom. Ǹ kakaa ǹ gbɛɛji, nɔ n kù ba kusĩmi.

⁴ Waati bɛɛbɛ, ide iyi Aɔ̃ Lafɛ̃ɛ í ni n sɔ̃ɛ wee. Aɔ̃ Lafɛ̃ɛ í ni, mii iyi ǹ mai ǹ wa n lɛgɛ nɔ ǹ wa n wu mii iyi ǹ tako ǹ lɔ wo. Ǹ wa n bɛjɛ mii iyi í wa si ilɛu feii mam mam.

⁵ Ŋɔi awɔ ì jɛ ì waa bee ngɔgɔ iyi í jɛ ti aranfãanii araɛ? Maà bee nkãma, domi wahala iyi an jɔ̀ ku naau, á tosi mii iyi wa mí si hunde feii. Amu Aɔ̃ Lafɛ̃ɛi ǹ fɔ bɛɛbɛ. Amma do nŋu fei, mii iyi an jɔ̀ i ba wee. An jɔ̀ hundeɛ ku ya fita sii tengi bii ì waa bɔ fei.