Zeremi 44 - Bibeli do fee

Ide iyi Aɔ̃ Lafɛ̃ɛ wa sɔ̃ inɛi Zudaa ŋa iyi à bɔ ilɛi Ezibiti

¹ Aɔ̃ Lafɛ̃ɛ í ba Zeremi ide ku fɔ si gãmɛi inɛi Zudaa ŋa iyi à wa si ilui Migidɔli do Tapanɛzi do Nɔfu do si ilɛi Patɔɔsi í ni,

² ide iyi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ wee. Iŋɛ fei ì yɛ wahala iyi ǹ jɔ̀ í naa si Zeruzalɛmu do si ilui Zudaa ŋau fei ŋa. Ilu ŋau bɛ fei, nnyiu ihɛ̃ à baa à kpɔò bomma, inɛ kãma kù wa bɛ má

³ na laalɔ iyi à ce à dedeò idɔɔkɔ̃m. Iwɛ̃ ŋai à ya maa tɔɔ nɔ a maa ce nŋa kuweei tuae ku dɔ̃ inunu iyi à ya jo si ina. Iwɛ̃ ŋau bɛ, aŋa taka nŋa a kù mà ŋa hee má jɛ bala nŋa ŋa.

⁴ Ǹ bɛ si ŋɛ walii woo ce icɛm ŋa wa. N kù gbɛɛjiò ku bɛ ŋa wa a naa a sɔ̃ ŋɛ a ni, i maà ce daa laalɔ iyi ǹ céu bɛ ŋa.

⁵ Amma ì kɔ̀ ku gbɔ ŋa, ì kɔ̀ ku desi ŋa itĩ ŋa, i kù jɛ ku fũsi laalɔ ku ce nŋɛ ŋau awɔ ŋa. I kù jɔ̀ iwɛ̃ ŋa ku joaa tuae ku dɔ̃ inunu ŋau ŋa.

⁶ Ŋɔi idɔɔkɔ̃m í dede si ŋɛ ntɔ ntɔ, nɔ ǹ jo ilui Zudaa ŋau do kpãai Zeruzalɛmu ŋa. Ǹ lɛgɛ iluu ǹ jɔ̀ í kpɔò bomma bɛi ì waa yɔɔ nnyiu ihɛ̃ ŋa.

⁷ Ŋɔi Zeremi í mɔsi do ideɛ má í ni, bɛbɛi, ide iyi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ wee. Í ni, na mii í jɔ̀ ì waa cea ara nŋɛ laalɔ nla nla bɛ ihɛ̃ ŋa. Ì jɔ̀ inɛmɔkɔ nŋɛ ŋa do inaabo nŋɛ ŋa do ama nŋɛ ŋa do ama kpɔtɔɔ nŋɛ ŋa à fita hai ilɛi Zudaa hee í jɔ̀ inɛ kãma kaa gbe si ilɛu má.

⁸ Nɔ mii iyi ì waa ce ŋaui á dede idɔɔkɔ̃m. Tuae ku dɔ̃ inunu iyi ì waa joa iwɛ̃ ŋa si ilɛi Ezibiti bii ì naa ì buba ŋau bɛi á jɔ̀ a nya ŋɛ hai bi titom i baa i jɛ dɔ̃anyi nɔ i kaa nɛ bɛɛrɛ bi inɛi ilɛ ŋau ihɛ̃ fei ŋa.

⁹ Ì gbɛjɛ idei laalɔ ŋa iyi bala nŋɛ ŋau à ce ŋai? Laalɔ ŋa iyi ilaalui Zudaa ŋa à ce do laalɔ ŋa iyi abo nŋa ŋau à ce, ì gbɛjɛ ŋai? Laalɔ ŋa iyi ì ce ŋa do iyi abo nŋɛ ŋau à ce si ilɛi Zudaa do si kpãa ŋa iyi à wa inɔ ilu Zeruzalɛmuu, ì gbɛjɛ ŋai?

¹⁰ Amma hee ku baa nsɛi, i kù nɛ inɔ kufɔ si kuce nŋɛ ŋau, nɔ i kù jirimam ŋa. I kù too si woodam do ikɔm ŋa iyi ǹ jilɛa iŋɛ do bala nŋɛ ŋau.

¹¹ Ŋɔi Zeremi í fɔ má í ni, na nŋu, Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í ni, amu Aɔ̃ Lafɛ̃ɛ ǹ dasi idɔ n jɔ̀ laalɔ ku naa si ŋɛ, nɔ n kpa irii zamaau fei hai si ilɛi Zudaa.

¹² Nɔ inɛ ŋa iyi à gbe ŋau, aŋa iyi à sa a koo a wa si ilɛi Ezibitiu, an ce nfei aŋa feii mam mam si ilɛi Ezibiti bɛ. Aa ce nfei si igũ do si ari. Hai inɛ iyi í kere í re hee do inɛ iyi í la í re fei, aŋa fei aa kpa irii mam mam. Ntɔ ntɔ igũ do ariu bɛi á kpa ŋa. Nɔ aŋai aa jɛ yaase iyi inɛ ŋa aa ya so waati iyi à waa bi a ceekpe inɛ gɔ walakɔ bii à waa bi a fɔ idei mii laalɔ gɔ walakɔ idei inɛ gɔ iyi à waa bi a dasi anyɔ.

¹³ An naa si inɛ ŋa iyi à wa ilɛi Ezibiti ŋau n kpã ŋa iju bɛi ǹ cea inɛ ŋa iyi à wa Zeruzalɛmu ŋau. Bɛi ǹ jɔ̀ igũ do ari do patapoo í naa si ŋau, bɛɛbɛi an cea aŋa mɔ.

¹⁴ Si gãmɛi inɛi Zudaa ŋa iyi à gbe, nɔ à sa a koo a buba si ilɛi Ezibitiu, kãma nŋa kaa ba ku sa, nɔ kãma nŋa kaa ba ku fita si, nɔ inɛ kãma nŋa kaa ba ku dasi idɔ ku sinda ku nyi koo buba si ilɛi Zudaau má baa do iyi aa nɛ lasabui aŋa a sinda a nyi a koo a buba bɛ má fei. Ntɔ ntɔ a kaa ba a nyi bɛ má, í gbe inɛ gɔ ŋa iyi aa ba a sa a fita si.

Kuwee ŋa iyi à cea ilaalu inaaboi lelei Aɔ̃

¹⁵ Ŋɔi inɛmɔkɔ ŋa iyi à mà iyi aboi aŋa à ya cea iwɛ̃ ŋa kuweei tuaeu, do inaabo ŋa iyi à tɔtɔɔ bɛ nkpɔ nkpɔu do zamaa iyi í wa ilɛi Ezibiti si ilui Patɔɔsiu fei à jɛa Zeremi à ni,

¹⁶ a kù bi ide iyi ì waa sɔ̃ wa do irii Aɔ̃ Lafɛ̃ɛu bɛ ku gbɔ má.

¹⁷ Amma ide iyi wa fita wa hai si gɛlɛ nwa fei, nŋui à bi ka ceò icɛ. Aa ka cea ilaalu inaaboi lelei Aɔ̃u kuweei tuae ku dɔ̃ inunu nɔ ka ceaa kuweei atɛ̃ vɛ̃ɛ ŋa bɛi à nɛ dɔ̃ɔnɛi ku ceɛ awa do bala nwa ŋa do ilaalu nwa ŋa do akawe nwa ŋa si ilui Zudaa ŋa do si kpãa ŋa iyi à wa si ilui Zeruzalɛmu ŋa. Nɔ à nɛ pɛ̃ɛ ŋa bãm bãm. À wɛɛò inɔ didɔ̃ nɔ a kù ba wahala kãma.

¹⁸ Amma hai waati iyi à leekĩò tuae ku dɔ̃ inunu ku kooa ilaalu inaaboi lelei Aɔ̃u do kuweei atɛ̃ vɛ̃ɛ ŋa, mii feii à kua, nɔ igũ do arii í ce nfe nwa.

¹⁹ Ŋɔi inaabo ŋau à nyi à ni má, waati iyi à waa cea ilaalu inaaboi lelei Aɔ̃u kuwee do tuae ku dɔ̃ inunuu, mɔkɔ nwa ŋa à ya wɛɛò kumàsiɛ. À ya ka kooa kaa ŋa iyi à jɔɔ má do kuweei atɛ̃ vɛ̃ɛ ŋa.

²⁰ Ŋɔi Zeremi í sɔ̃ zamaau fei hai inɛmɔkɔ ŋa do inaabo ŋa hee do zamaa iyi í jɛaa ideu í ni,

²¹ tuae iyi ì kooò si ilui Zudaa ŋau ŋa, do si kpãai Zeruzalɛmu ŋau iŋɛ do bala nŋɛ ŋa do ilaalu nŋɛ ŋa do akawe nŋɛ ŋa do zamaai ilɛu, Aɔ̃ Lafɛ̃ɛ kù ye gigiɛi? Mà kù to si idɔɛi.

²² Ntɔ ntɔ Aɔ̃ Lafɛ̃ɛ kù yɔkɔ kù temuaò kuce hai nɛ bɛɛrɛ nŋɛ ŋa. Na ŋɔi í jɔ̀ ilɛ í ce nfe í baa í kpɔò bomma nɔ í jɛ yaase iyi aa so bii à waa bi a ceekpe inɛ gɔ, nɔ inɛ kãma kù wa si inɔ iluu. Ŋɔi í jɔ̀ ì waa yɔɔ bɛ ihɛ̃ nnyiu bɛ ŋa.

²³ Wahala iyi wa ba ŋɛ nnyiu ihɛ̃, í naai si na iyi í jɔ̀ ì ya maa cea iwɛ̃ ŋa kuwee ŋa, nɔ ì faa ara nŋɛ taale bi Aɔ̃ Lafɛ̃ɛ ŋa. Ì kɔ̀ ku gbɔ ide iyi wa sɔ̃ ŋɛ nɔ i kù too si ikɔɛ ŋa do woodaɛ ŋa hee do bɛi wa sɔ̃ ŋɛ í ni i ce laakai ŋa fei.

²⁴ Ŋɔi Zeremi í nyi í sɔ̃ zamaau fei má do inaabo ŋau fei í ni, iŋɛ inɛi Zudaa ŋau, iŋɛ iyi ì wa si ilɛi Ezibiti feiu, i sotĩ i gbɔ idei Aɔ̃ Lafɛ̃ɛ ŋa.

²⁵ Bɛi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ wee. Í ni, iŋɛ do abo nŋɛ ŋa iŋɛi ì fɔ do gɛlɛ nŋɛ, nɔ awɔ nŋɛ ŋau mɔ à ce bɛi ì fɔ ŋau. Ì ni ì bi i kɔ̃ kuwã ŋa iyi ì ce i cea ilaalu inaaboi lelei Aɔ̃u kuwee do tuae do ti vɛ̃ɛ ŋa. Aa nɔ i maa mu kuwã nŋɛ ŋaui dim dim. Aa ceò kuwã nŋɛ ŋau icɛ ŋai.

²⁶ Na nŋu, iŋɛ inɛi Zudaa ŋa iyi ì wa si ilɛi Ezibitiu fei, i sotĩ i gbɔ idei amu Aɔ̃ Lafɛ̃ɛ ŋa. Ǹ gbasii do iri nlai amu takam fei, inɛi Zudaa kãma kaa fɔ ide ku kpeò irim má. Nɔ si ilɛi Ezibitiu fei, inɛ kãma kaa ce kugbasi ku ni, hee do irii Aɔ̃ Lafɛ̃ɛ fei.

²⁷ Nsɛi, an dasi ŋa ijui, nɔ iju ku dasim nɔu kù jɛ ti n ce nŋa jiidaɛ, amma laalɔi an jɔ̀ ku naa si ŋa. Inɛ ŋa iyi à wa si ilɛi Ezibitiu fei, igũ do arii á naa si ŋa hee a koo a kpa iri mam mam.

²⁸ Zamaa keekei á ba ku sa ku fita si igũu nɔ hai Ezibiti bɛ a sinda a nyi ilɛi Zudaa má. Nɔ waati bɛɛbɛ, inɛi Zudaa ŋa iyi à ba à tako à fita si nɔ à koo à manji si ilɛi Ezibitiu aa mà bii í jɛ idem nii í na í ce walakɔ bii í nɔ í jɛ ide nŋai í ce.

²⁹ Nɔ Aɔ̃ Lafɛ̃ɛ í ni má, an jɔ̀ i yɛ mii iyi á jɛ nyinda ku jɔ̀ i mà ŋa iyi an na n naa si ŋɛ si inyau ihɛ̃ ku ba i mà ŋa iyi ntɔ ntɔ idei laalɔ iyi ǹ fɔ si gãmɛ nŋɛu á ce dei.

³⁰ Aɔ̃ Lafɛ̃ɛ í nyi í fɔ má í ni, Faraɔ̃ Ɔfara ilaalui Ezibitiu, an soo n daa mbɛɛɛ ŋau si awɔ do si awɔi inɛ ŋa iyi à waa dɛdɛ ku kpaɛ, bɛi ǹ so Sedesiasi ilaalui Zudaa ǹ daa Nebukanɛsaa ilaalui Babilɔni mbɛɛɛu iyi wa dɛdɛ ku kpaɛu si awɔ.