Zeremi 43 - Bibeli do fee

À mu Zeremi do gbugbã à bɔòɛ ilɛi Ezibiti

¹ Waati iyi Zeremi í sɔ̃ zamaau fei ide ŋa iyi Aɔ̃ Lafɛ̃ɛ nŋa í fɔu fei, ide ŋa iyi í ni ku sɔ̃ ŋau,

² ŋɔi Azaria amai Hosaya do Yohanaa amai Karea hee do inɛ ŋa iyi à gbe iyi à jɛ ilu faau ŋau fei à sɔ̃ Zeremi à waa ni, ide iyi ì waa fɔu bɛ, iboi ì waa sɔ. Aɔ̃ Lafɛ̃ɛ nwa kù bɛɛ wa kù ni i naa i sɔ̃ wa ka maà bɔ Ezibiti kaa buba.

³ Baruku amai Neriai wa dasiɛ ide ŋau bɛ ku fɔ na iri nwa, ku ba i so wa i daa inɛi Kaladee ŋa si awɔ ku ba a kpa wa walakɔ mɔ a mu wa a nɛò wa Babilɔni.

⁴ Yohanaa amai Kareau do inɛ ngboi sooge ŋau fei do zamaau à kɔ̀ ku gbɔ idei Aɔ̃ Lafɛ̃ɛ iyi wa sɔ̃ ŋa wa ni a buba si ilɛi Zudaau.

⁵ Ŋɔi Yohanaa amai Karea do inɛ ngboi sooge ŋau fei à gbã inɛi Zudaa ŋa iyi à gbe feiu, do inɛi Zudaa ŋa iyi à tako à sa à nɛ ilɛ mmu ŋa nɔ à nyi à baa si ilɛi Zudaau má.

⁶ À gbã aŋa feii hai inɛmɔkɔ ŋa do inaabo ŋa do amu ŋa do ama inaabo ŋa iyi à jɛ amai ilaaluu hee do inɛ ŋa iyi Nebuzaradãa iyi í jɛ inɛ ngboi woo degbei ilaaluu í jɔ̀ bɛ bi Gedalia amai Ahikamu iyi wa jɛ tɔkui Safãa. À gbã walii Zeremi mɔ do Baruku amai Neriau.

⁷ Waati iyi à dede, ilɛi Ezibitii à nɛ, domi a kù gbɔ idei Aɔ̃ Lafɛ̃ɛ, nɔ à nɛ à to ilui Tapanɛzi.

Zeremi wa fɔ idei kunaai soogei Babilɔni ŋa wa

⁸ Aɔ̃ Lafɛ̃ɛ í ba Zeremi ide ku fɔ waati iyi à wa Tapanɛzi í ni,

⁹ so kuta nla nla gɔ ŋa nɔ i si ŋa ilɛ si wajui inɛi Zudaa ŋau tengi bii à ma í gboka keeke, hai bii inɛ ŋa à ya lɔò inɔ kabai ilaalu Faraɔ̃ si ilui Tapanɛziu.

¹⁰ Nɔ i sɔ̃ ŋa i ni, ide iyi Aɔ̃ Lafɛ̃ɛi lele do ilɛ nŋu iyi í jɛ Lafɛ̃ɛi inɛi Izirɛli ŋau í fɔ wee. Í ni, wee amu Aɔ̃ Lafɛ̃ɛ ǹ wa n bɛ inɛ ŋa a koo a dɛdɛ Nebukanɛsaa ilaalui Babilɔni woo ce icɛm nɔu wa. An jilɛ bommaɛi si kuta ŋa iyi ǹ jɔ̀ à tu isa à singau ihɛ̃, nɔ si antaiɛi bɛi á tɛsi bataɛ ŋa.

¹¹ Waati iyi á na ku to wa, nŋui á cã Ezibiti ku lɛgɛɛ. Waati bɛɛbɛ, inɛ ŋa iyi aa ku, aa kui, inɛ ŋa mɔ iyi aa mu aru, aa mu ŋa arui, inɛ ŋa mɔ iyi aa kpa do taakuba, aa kpa ŋai do taakuba.

¹² Nɔ ilei iwɛ̃ ŋa iyi à wa Ezibiti ŋau mɔ, an jɔ̀ Nebukanɛsaa ku dasi ŋa inai nɔ ku jo iwɛ̃ nŋa ŋau. Á so gɔgɔ ŋa mɔi ku nɛò. Á wusɛ ilɛi Ezibitiui mam mam bɛi woo degbe í ya wusɛ gãi ŋa hai jĩnɛɛ ŋa ku nya ŋa. Si anyiɛ, á fitai ku nɛ do laakai ku sũ.

¹³ Nɔ kuta iyi à lɔ a jɛ ti iwɛ̃ ŋa iyi à wa Bɛti-Semɛsi á kɛkɛ ŋai, nɔ ku jo ilei iwɛ̃i ilɛi Ezibiti ŋau.