Zeremi 42 - Bibeli do fee

Inɛ ŋa iyi à ba à fita si ŋau à bɔ kubee ku ce bi Zeremi

¹ Ŋɔi inɛ ngboi sooge ŋau fei, hai Yohanaa amai Karea do Yezania amai Hosaya do zamaau fei, hai inɛ iyi í kere í re hee do inɛ iyi í la í re fei à sɛkɛɛ wa,

² nɔ à sɔ̃ walii Zeremi à ni, jɔ̀ i gba nwa mii iyi à waa tɔɔɛ. Tɔɔ Aɔ̃ Lafɛ̃ɛɛ na irii awa iyi à gbeu ihɛ̃ fei, domi awa nkpɔ nkpɔi à wɛɛ wo, amma nsɛi wee a kù kpɔ má bɛi awɔ takaɛ ì waa yɔɔ.

³ Aɔ̃ Lafɛ̃ɛɛ ku nyisi wa kpãa iyi à nɛ ka too do mii iyi à nɛ ku ce.

⁴ Ŋɔi walii Zeremi í sɔ̃ ŋa í ni, ǹ gbɔ. An tɔɔ Aɔ̃ Lafɛ̃ɛ nŋɛ si gãmɛi mii iyi ì waa tɔɔm nsɛiu ihɛ̃ ŋa. Nɔ ide iyi Aɔ̃ Lafɛ̃ɛ á jɛ nŋɛ wa fei, an sɔ̃ ŋɛ mam mam, n kaa n singa nŋɛ kãmaɛ gɔ.

⁵ Nɔ à nyi à sɔ̃ Zeremi má à ni, Aɔ̃ Lafɛ̃ɛ ku jɛ sɛɛda nwa si ntɔ do si dee dee ku jɛ bii a kù ce bɛi nŋu iyi í jɛ Aɔ̃ Lafɛ̃ɛɛu í ni i sɔ̃ wa mam mam nɔu.

⁶ Bii jiidai, walakɔ bii í nɔ í jɛ laalɔ mɔi, aa ka jirima idei Aɔ̃ Lafɛ̃ɛ nwa nŋu iyi awa taka nwa à waa bɛɛ bi titɛɛ. Nɔ do yaase bɛɛbɛ, mii fei á nɛ nwa dee dee na idei Aɔ̃ Lafɛ̃ɛ nwa iyi à jirima.

⁷ Si anyii ajɔ mɛɛwa, ŋɔi Aɔ̃ Lafɛ̃ɛ í ba Zeremi ide ku fɔ.

⁸ Nɔ Zeremi mɔ í kpe Yohanaa amai Karea do inɛ ngboi sooge ŋa iyi à wa bi titɛɛu do zamaau hai keeke do nla fei.

⁹ Nɔ í sɔ̃ ŋa í ni, Aɔ̃ Lafɛ̃ɛi inɛi Izirɛli ŋa nŋu iyi ì bɛm bi titɛɛ ì ni n koo n tɔɔɛu ŋa,

¹⁰ í ni, bii ì mɔsi ì waa jɛ kuwɛɛ nŋɛ si ilɛu ihɛ̃ ŋa, an mu nŋɛ gbugbãi, n kaa n kpa ŋɛ. An lɔ ŋɛi, n kaa n tu ŋɛ, domi ǹ nɛ inɔ kufɔ na laalɔ iyi ǹ ce nŋɛ.

¹¹ I maà ce njoi ilaalui Babilɔniu ŋa, i maà jɔ̀ zigi nŋɛ ku da na iriɛ ŋa. Amu Aɔ̃ Lafɛ̃ɛi ǹ wa n sɔ̃ ŋɛ, i maà ce njoɛ ŋa, domi ǹ wɛɛ do iŋɛ ku ba n faaba ŋɛ nɔ n nya ŋɛ hai si awɔɛ.

¹² An nyisi ŋɛ araarem, nɔ nŋu mɔ á ce araare nŋɛ nɔ ku jɔ̀ i baa si ilɛ nŋɛu ŋa.

¹³ Amma bii ì fɔ ŋa ì waa ni i kaa buba si ilɛu ihɛ̃ ŋa, nɔ i kù waa desi idei Aɔ̃ Lafɛ̃ɛ nŋɛ itĩ ŋa,

¹⁴ nɔ bii ì fɔ ì waa ni ŋa, aawo, ilɛi Ezibitii awa aa ka nɛ tengi bii igũ kaa naa si wa, tengi bii a kaa ka gbɔ anu ku dɔ̃i kuu, tengi bii a kaa ka kua sɔnda, tengi bɛi aa ka buba,

¹⁵ waati bɛɛbɛ, iŋɛ inɛi Zudaa ŋa iyi ì gbe ŋau i sotĩ i gbɔ bɛi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau wa fɔ ŋa. Í ni, bii ì dasi idɔ i bɔ ilɛi Ezibiti ŋa, bii ì koo ì buba bɛ ŋa,

¹⁶ taakuba iyi ì waa ce njoɛ ŋau, á naa si ŋɛ si ilɛi Ezibiti bɛ, nɔ ari iyi wa da zigi nŋɛu, á ba ŋɛ si ilɛi Ezibiti bɛ, nɔ bɛi aa ku ŋa.

¹⁷ Inɛ ŋa iyi à dasi idɔ aŋa a nɛ ilɛi Ezibiti a koo a buba bɛ fei, aa kui si igũ do ari walakɔ do patapoo, nɔ si inɔ nŋa inɛ kãma kaa fita si. Ntɔ ntɔ wahala iyi an jɔ̀ ku naa si ŋau, inɛ kãma kaa fita si.

¹⁸ Ntɔ ntɔ Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í ni do yaase bɛi idɔɔkɔ̃ɛ í naa si inɛi Zeruzalɛmu ŋa, bɛɛbɛ mɔi idɔɔkɔ̃ɛ á naa si iŋɛ mɔ bii ì dede ì nɛ Ezibiti ŋa. Iŋɛi aa jɛ yaase iyi inɛ ŋa aa ya so waati iyi à waa bi a ceekpe inɛ gɔ, walakɔ bii à waa bi a fɔ idei mii laalɔ gɔ, walakɔ idei inɛ gɔ iyi à ceekpe, walakɔ inɛ gɔ iyi à waa bi a dasi anyɔ, nɔ i kaa yɛ ilɛu ihɛ̃ má ŋa.

¹⁹ Zeremi í ni, iŋɛ iyi ì gbe si ilɛi Zudaa ŋa, Aɔ̃ Lafɛ̃ɛ wa sɔ̃ ŋɛ wa ni i maà bɔ ilɛi Ezibiti ŋa. Ntɔ ntɔ nŋui ǹ sɔ̃ ŋɛ bɛ hai nnyi.

²⁰ Nɔ i jɔ̀ i mà ŋa iyi iŋɛ taka nŋɛi ì waa lɛlɛ ara nŋɛ, domi iŋɛi ì ni n bɔ bi Aɔ̃ Lafɛ̃ɛ nwa nɔ n tɔɔɛ na iri nŋɛ. Nɔ ì nyi ì ni má ŋa ide iyi Aɔ̃ Lafɛ̃ɛ í fɔ fei n sɔ̃ ŋɛ mam mam. Nɔ ì ni ŋa bɛi í fɔ fei iŋɛ aa ceò icɛ.

²¹ Nɔ nnyi, ǹ sɔ̃ ŋɛ fei ndɛɛ fei, amma wee ì kɔ̀ ku gbɔ idei Aɔ̃ Lafɛ̃ɛ nŋɛu ŋa. Ide ŋa iyi í ni n sɔ̃ ŋɛu, i kù gbɔ kãmaɛ ŋa.

²² Na nŋu nsɛi, i jɔ̀ i mà sãa sãa iyi aa ku ŋai si igũ, nɔ ari mɔ á kpa ŋɛ, walakɔ mɔ aa ku ŋai si patapoo iyi á naa si inya bii ì waa bi i koo i buba ŋau.